ঘূৰ্ণীবতাহৰ প্ৰকোপত কঁপি উঠিছে দক্ষিণ এছিয়াৰ দেশ ফিলিপাইন৷ ঘণ্টাত ২১৫ কিঃমিঃ বেগত অহা এই ঘূৰ্ণীবতাহে বিধ্বস্ত কৰিছে ফিলিপাইনছৰ কেইবাখনো চহৰ৷ এই বিপৰ্যয়ৰ বাবেই বন্ধ কৰি দিয়া হৈছে সমূহ স্কুল, কলেজ৷ সাগৰৰ নৌকা, জাহাজ সকলোবোৰৰ চলাচল বন্ধ কৰি দিয়া হৈছে৷ উপকূলীয় অঞ্চলত বাস কৰা লোকসকলক সেই স্থানৰ পৰা আঁতৰি আহিবলৈ বাৰে বাৰে আহ্বান জনোৱা হৈছে৷
এই ধুমুহাৰ নাম দিয়া হৈছে ক্ৰাথন৷ বতৰ বিজ্ঞান কেন্দ্ৰৰ পৰা জনোৱা অনুসৰি কাগায়ান আৰু বাটানেছ প্ৰদেশৰ বালিণ্টাং দ্বীপৰ উপকূলীয় এলেকাত ঘণ্টাত ১৭৫ ৰ পৰা ২১৫ কিঃমিঃ বেগত আহিছে ধুমুহা৷ টাইফুন ক্ৰাথন ধীৰে ধীৰে পশ্চিম দিশলৈ অগ্ৰসৰ হৈছে বুলিও জনাইছে বতৰ বিজ্ঞান কেন্দ্ৰই৷
আগন্তুক ৪৮ ঘণ্টাৰ ভিতৰত মধ্য বাটানছৰ উপকূলীয় গাওঁ, নিকটবৰ্তী বাবুয়ান দ্বীপ আৰু কাগায়ান প্ৰদেশক বিশেষভাৱে সতৰ্ক কৰি দিয়া হৈছে৷ শক্তিশালী ধুমুহাই প্ৰাণনাশো কৰিব পাৰে বুলি আগতীয়াকৈয়ে সকলোকে নিৰাপদ স্থানত আশ্ৰয় ল’বলৈ আহ্বান জনোৱা হৈছে৷
ফিলিপাইনত প্ৰতি বছৰে প্ৰায় ২০টাকৈ টাইফুনে আঘাত কৰে৷ দ্বীপপুঞ্জটো ‘পেছিফিক ৰিং অফ ফায়াৰ’ত অৱস্থিত৷ য’ত বহু আগ্নেয়গিৰিও আছে৷ ফলত ইয়াত ভূমিকম্পইয়ো বাৰে বাৰে আঘাত কৰে৷ দক্ষিণ পূৰ্ব এছিয়াৰ এই দেশ বিশ্বৰ অন্যতম দুৰ্যোগ কবলিত দেশ হিচাপেও পৰিচিত৷ উল্লেখ্য যে ২০১৩ চনত বিশ্বত ৰেকৰ্ড সৃষ্টিকৰা শক্তিশালী ঘূৰ্ণীবতাহে কঁপাই গৈছিল ফিলিপাইনছক৷ এই বিপৰ্যয়ত প্ৰাণ হেৰুৱাইছিল ৭৩০০জনতকৈয়ো বেছি লোকে৷ নিখোজ হৈছিল বহুজন৷ সম্পূৰ্ণ এখন গাওঁ মৰাশালী হৈ পৰিছিল৷ এই বিপৰ্যয়ত ৫০ হাজাৰতকৈ বেছি লোক গৃহহীন হৈ পৰিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
