শক্তি বাঢ়ি অন্ধ্ৰপ্ৰদেশৰ উপকূলৰ দিশে আগুৱাইছে ঘূৰ্ণিবতাহ ‘মন্থা’৷ মঙলবাৰে সন্ধিয়া অন্ধ্ৰপ্ৰদেশৰ মছলিপত্তনম আৰু কলিঙ্গপত্তনমৰ মাজত কাকিনাড়াৰৰ চুবুৰীয়া এলেকাত ভয়াৱহ প্ৰভাৱ পেলাব পাৰে মন্থাই৷ মন্থাৰ প্ৰভাৱ পৰিবলৈ আৰম্ভ কৰিছে পশ্চিমবংগতো৷ ইতিমধ্যেই পশ্চিমবংগত আৰম্ভ হৈছে বৰষুণ আৰু ধুমুহাৰ৷ বতৰ বিজ্ঞানৰ তৰফৰ পৰা জাৰি কৰা হৈছে সতৰ্কতা৷
মঙলবাৰে নিশা অন্ধ্ৰপ্ৰদেসৰ উপকূলত সৰ্বোচ্চ ১১০ কিঃমিঃ গতিবেগত বলিছে ঘূৰ্ণিবতাহ৷ এই ঘূৰ্ণিবতাহে প্ৰত্যক্ষভাৱে প্ৰভাৱ পেলাইছে পশ্চিমবংগৰ ওপৰতো৷ অসমতো মন্থাৰ প্ৰভাৱ পৰাৰ আশংকা কৰা হৈছে বতৰ বিজ্ঞান বিভাগৰ তৰফৰ পৰা৷ নামনি অসমত বিশেষ প্রভাৱ পেলাব পাৰে মন্থাই৷
মন্থাৰ প্ৰভাৱ অন্ধ্ৰ প্ৰদেশ, তামিলনাডু, পশ্চিমবংগ আৰু ওড়িশাত সম্পূৰ্ণৰূপে পৰিব বুলি জনাইছে বতৰ বিজ্ঞান বিভাগৰ তৰফৰ পৰা৷ এই ৰাজ্যসমূহত ইতিমধ্যে আৰম্ভ হৈছে প্ৰচণ্ড বতাহ, বহু ঠাইত উভালি পৰিছে গছ৷ বৰষুণো আৰম্ভ হৈছে এইকেইখন ৰাজ্যত৷ এই ৰাজ্যসমূহৰ উপকূলীয় অঞ্চলৰ পৰা ৫০ হাজাৰৰো অধিক লোকক স্থানান্তৰ কৰা হৈছে৷ ইতিমধ্যে ১২০ খন ৰে’ল সোমবাৰ আৰু মঙলবাৰে বাতিল কৰা হৈছে৷ বিশাখাপট্টনম বিমানবন্দৰৰ পৰা ৩২খনকৈ বিমানো বাতিল কৰা হৈছে৷ একেদৰে বিজয়াৱাড়া বিমানবন্দৰৰ পৰা ১৬খন আৰু তিৰুপতি বিমানবন্দৰৰ পৰা ৪খন বিমান বাতিল কৰা হৈছে।
বতৰ বিজ্ঞান বিভাগৰ তথ্য অনুসৰি আগন্তুক ৩ দিন কেৰালা, কৰ্ণাটক, ছত্তীশগড়, মধ্যপ্ৰদেশ, মহাৰাষ্ট্ৰ, ৰাজস্থান আৰু ঝাৰখণ্ডতো বৰষুণৰ সম্ভাৱনা আছে৷ এই ঘূৰ্ণীবতাহৰ নাম ৰাখিছে থাইলেণ্ডে৷ ‘মন্থা’ থাই ভাষাত ইয়াৰ অৰ্থ সুগন্ধি ফুল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
