অসম লাইভ২৪ঃ ৰক্ষণশীলতাৰ পৰা লাহে লাহে নিজেই ওলাই আহিছে ছৌদী আৰৱ৷ এটাৰ পাছত আনটো ঐতিহ্যগত মৌলবাদী ইছলামী আইন পৰিবৰ্তনৰ গতি তৰাম্বিত কৰিছে মক্কা আৰু মদিনাৰ দেশ ছৌদীয়ে৷ ছৌদী আৰৱৰ বৰ্তমান ক্ৰাউন প্ৰিন্স মহম্মজ বিন ছলমানৰ হাতত ধৰি এটাৰ পাছত আনটো নিয়মৰ বেৰ ভাঙি ওলাই আহিছে ছৌদী৷
সেয়া লাগে বিশ্ব সুন্দৰীৰ প্ৰতিযোগীতাত নিজৰ দেশৰ প্ৰতিযোগী পঠিয়াই হওক কিংবা প্ৰথম বাৰৰ বাবে দেশৰ মাটিত ছুইমিং কষ্টিওমৰ RAMP শ্ব’ অনুষ্ঠিত কৰাই হওক৷ এইবাৰ আধুনিকতাৰ তালিকাত ছৌদীত নতুন সংযোজন হ’ল নাইট ক্লাব৷ ক্ৰাউন প্ৰিন্স মহম্মদ বিন ছলমানৰ প্ৰচেষ্টাতেই তৈয়াৰ হৈ উঠিছে এই নাইট ক্লাব৷ পাৰ্টী প্ৰেমী তৰুণসকলক আকৃষ্ট কৰিবৰ বাবেই প্ৰথমখন নাইট ক্লাব মুকলি কৰা হৈছে ৰাজধানী ৰিয়াধত৷
ছৌদী আৰৱৰ প্ৰথম নাই ক্লাবটোৰ নাম দিয়া হৈছে ‘নিউ লাইফ’৷ ৰাজধানী ৰিয়াধত এই নাইট ক্লাবটো দ্যা বিষ্ট হাউছ নামেৰে পৰিচিত৷ এই নাইট ক্লাবত প্ৰৱেশ কৰাটো মদ্যপায়ীসকলৰ বাবে কিন্তু সহজ নহয়৷ ছৌদীৰ এই নাইট ক্লাবত অত্যন্ত বিলাসবহুল ইণ্টেৰিয়ৰ তৈয়াৰ কৰা হৈছে৷ ইয়াৰোপৰি বিলাসবহুল সুবিধাও দিয়া হৈছে৷ এই নাইট ক্লাবৰ গৰাকীৰ আশা যে এই ক্লাব শিল্প আৰু সংগীতৰ কেন্দ্ৰ হৈ উঠিব৷ এই নাইট ক্লাবটোত আছে কেইবাটাও ষ্টুডিঅ’৷ ইয়াৰোপৰি আছে ডাইনিং এৰিয়াও৷ ডিজে আৰু সংগীত প্ৰযোজকসকলেও এই নাইট ক্লাবত অনুষ্ঠান কৰিব৷ ছৌদীয়ে এই নাইট ক্লাবলৈ বিদেশীসকলক আমন্ত্ৰণ জনাইছে৷ বিদেশী পৰ্যটকসকলৰো এই ক্লাব পছন্দৰ হ’ব বুলি দাবী কৰিছে নাইট ক্লাবৰ গৰাকীয়ে৷
কাৰণ বৰ্তমানলৈকে ছৌদী আৰৱৰ কোনো স্থানতেই বিদেশীসকলে কোনো পাৰ্টী কৰিব নোৱাৰে৷ ছৌদী আৰৱত ডিজে নাইটৰ ক’তোৱেই অনুমতি নাই৷ কোনোৱে ডিজে নাইটৰ আনন্দ ল’ব খুজিলে দেশৰ বাহিৰলৈ যাব লাগে৷ ছৌদীৰ ডিজে বজোৱা বহু বেণ্ডে এই খবৰৰ অন্ততেই নিজৰ প্ৰতিক্ৰিয়াও ব্যক্ত কৰিছে৷ তেঁওলোকৰ মত, ‘আমি আজি অত্যন্ত সুখী৷ আমাৰ দেশত ক্লাব এটা হৈছে৷ এই ক্লাব আমাৰ বাবে পৃথিৱী৷ অৱশেষত আমি আমাৰ দেশত আমাৰ সংগীত দক্ষতা প্ৰদৰ্শন কৰিব পাৰিম৷’
এই নাইট ক্লাবত প্ৰৱেশ কৰাটো অৱশ্যে খুব এটা সস্তা নহ’ব৷ ছৌদীৰ প্ৰথম নাইট ক্লাৱত প্ৰৱেশ কৰিবলৈ হ’লে এই ক্লাবৰ সৰ্বনিম্ন বাৰ্ষিক সদস্য ফি হিচাপে দিব লাগিব ১ লাখ ৭১ হাজাৰ টকা৷ কেৱল সেয়াই নহয়, অত্যধিক সুবিধা বিচাৰিলে ২ লাখ ৫১ হাজাৰ টকা দিব লাগিব মেম্বাৰচিপৰ বাবে৷ পূৰ্বৰ বাধা নিষেধ আঁতৰাই এই ক্লাৱত সোমাবলৈ দিয়া হ’ব মহিলাকো৷ সেই দেশৰ মহিলাৰ বাবে এয়া এক নতুন জীৱনৰ দৰে৷ একাংশ মহিলাৰ মত, ‘এইয়া আমাৰ নতুন জীৱন৷ আমি জীয়াই উঠিছো৷’
ছৌদী আৰৱ এখন ইছলামিক দেশ হোৱাৰ বাবে ইয়াত মদ একেবাৰেই নিষিদ্ধ৷ সেয়ে এই নাইট ক্লাবত মদ নিষিদ্ধ কৰা হৈছে৷ কেৱল সেয়াই নহয় কোনোৱে তাত মদ খাই প্ৰৱেশ কৰিলেও তেওঁলোকক বিহা হ’ব মোটা অংকৰ জৰিমনা৷ এই নাইট ক্লাবত অতিথিক মদৰ পৰিবৰ্তে মকটেইল দিয়া হ’ব৷ উল্লেখ্য যে ছৌদীত ১৯৫০ চনৰ পৰা এলকহল ব্যৱহাৰ নিষিদ্ধ কৰা হৈছে৷ ছৌদীত অৱশ্যে শেহতীয়াকৈ বিদেশী দূতাবাসৰ বাবে এখন ৱাইন শ্বপ খোলাৰ অনুমতি দিয়া হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
