পাথাৰকান্দিৰ ৰাজ্য কঁপাই যোৱা দুৰ্ঘটনা, মৃতকৰ সংখ্যা ৬ জনলৈ বৃদ্ধি
কৰিমগঞ্জৰ নিলাম বজাৰ এলেকাৰ বেৰাজাল’ত কালি সংঘটিত হোৱা ভয়ংকৰ পথ দুৰ্ঘটনাত ঘটনাস্থলীতে শিশুসহ চাৰিজন লোকৰ মৃত্যু হৈছিল। পাছত হাস্পতালত চিকিৎসাধীন অৱস্থাত প্ৰাণ হেৰুৱাইছিল আন এজনে, যাৰ ফলত মৃতকৰ সংখ্যা বৃদ্ধি পাইছিল ৫ জনলৈ।
কিন্তু নিশাৰ ভাগত আৰু এজনো লোকে চিকিৎসাধীন অৱস্থাত প্ৰাণ হেৰুৱাই, যাৰ ফলত দুৰ্ঘটনাটোত মৃতকৰ সংখ্যা ৬ জনলৈ বৃদ্ধি পায়। অসম ত্ৰিপুৰা সংযোগী ৮ নম্বৰ ৰাষ্ট্ৰীয় ঘাইপথত এই দুৰ্ঘটনা সংঘটিত হৈছে ।
এখন অটো ৰিক্সা আৰু হুণ্ডাই ভেনু বাহনৰ মাজত সংঘটিত হৈছে মুখামুখি সংঘৰ্ষ। দুৰ্ঘটনাত পতিত বাহন দুখনৰ নম্বৰ AS 11 S 8323 নম্বৰৰ ভেনু আৰু AS 01 BC 201 নম্বৰৰ অটো ৰিক্সা ।
দুই বাহনৰ চাৰি গৰাকী লোক’ৰ ঘটনাস্থলীতে মৃত্যু হোৱাৰ সমান্তৰালভাৱে আন যাত্ৰীক সংকটজনক অৱস্থাত প্ৰেৰণ কৰা হৈছিল কৰিমগঞ্জ অসামৰিক চিকিৎসালয়ত । পাছত হাস্পতালত মৃত্যু হয় আন দুগৰাকীৰ।
মৃত্যু হোৱা লোক কেইগৰাকীৰ নাম- গুলজাৰ হুছেইন (৩২) , জাহিদা বেগম (২৬), ছাজিদুল গুছেইন (১৮ মাহ), বেদানা বেগম (৫০) , ৰাহুল আলম (৩০), হাছনা বেগম ( ৪৬) ।
দুই বাহনৰ সংঘৰ্ষৰ ফলত অটো ৰিক্সাখন ৰাজপথৰ পৰা উফৰি পথৰ কাষৰ খাৱৈত বাগৰি পৰিছিল । ঘটনাৰ পিছত উত্তেজিত ৰাইজে অসম ত্ৰিপুৰা সংযোগী ৮ নম্বৰ ৰাষ্ট্ৰীয় ঘাইপথ অবৰোধ কৰিছিল যদিও জিলাধিপতি মৃদুল কুমাৰ যাদৱ’ৰ উপস্থিতিত অৱশেষত ৰাষ্ট্ৰীয় ঘাইপথ অৱৰোধ মুক্ত হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ