প্ৰদৰ্শন উন্নত নোহোৱাৰ পাছতো শ্ৰীলংকা ভ্ৰমণৰ ভাৰতীয় দলত ৰিয়ান পৰাগৰ বাছনিৰ ৰহস্য কি!
শ্ৰীলংকা ভ্ৰমণৰ বাবে ভাৰতীয় দল ঘোষণা হোৱাৰ ২৪ ঘণ্টা হ’ল যদিও বহু কথা এতিয়াও ৰহস্যৰ আৱৰ্তত আছে। বিশেষকৈ এদিনীয়া দলৰ নিৰ্বাচন, য’ত পুনৰ যুৱ চামক সুযোগ দিয়া হৈছে। প্ৰথম বাৰৰ বাবে ভাৰতৰ এদিনীয়া দলত নিৰ্বাচিত হৈছে ৰিয়ান পৰাগ আৰু হৰ্ষিত ৰাণা। সূৰ্য কুমাৰ যাদৱে নেতৃত্ব দিব লগা এই দলত স্থান পাইছে ৰিয়ান পৰাগে।
শ্ৰীলংকা ভ্ৰমণৰ বাবে ভাৰতীয় নিৰ্বাচকসকলে বাছনি কৰা দলটোত দুটা কথা স্পষ্ট। প্ৰথম- আগন্তুক ৩-৪ বছৰৰ কথা মনত ৰাখি এই দলটো বাছনি কৰা হৈছে। দ্বিতীয়- এই দলটোত গৌতম গম্ভীৰৰ দৃষ্টিভংগী সন্নিবিষ্ট কৰা হৈছে। এই দুটা কথা মনত ৰাখি ৰিয়ান পৰাগৰ বাছনি কৰা হৈছে।
২২ বছৰীয়া ৰিয়ান পৰাগক ইয়াৰ পূৰ্বে জিম্বাবুৱে ভ্ৰমণত নিৰ্বাচিত কৰা হৈছিল। কিন্তু পিছত দুৰ্বল প্ৰদৰ্শনৰ বাবে প্ৰথম দুখন টি-২০ মেচৰ পিছত ৰিয়ানক প্লেইং ১১ৰ পৰা বাদ দিয়া হৈছিল। সেই সময়ত বহু লোকৰে ধাৰণা আছিল ৰিয়ানৰ পুনৰ দলত স্থান পাবলৈ সময় লাগিব পাৰে। কিন্তু সকলোকে আচৰিত কৰি পুনৰ নিৰ্বাচিত হয় ৰিয়ান।
জিম্বাবুৱে ভ্ৰমণত চমক সৃষ্টি কৰি শতক অৰ্জন কৰা অভিষেক শৰ্মা আৰু ঋতুৰাজ গাইকোৱাডো আনকি শ্ৰীলংকা ভ্ৰমণৰ ভাৰতীয় দলত স্থান লাভ নকৰিলে।
ৰিয়ান পৰাগে দলত স্থান কৰাৰ মূলতে সহায় কৰিলে বিজয় হাজাৰে ট্ৰফীৰ প্ৰদৰ্শনে। দ্বিতীয়তে ঘৰুৱা ক্ৰিকেটতো ৰিয়ানে পাঁচ নম্বৰ স্থানত বেটিং কৰি সফল হৈ আছিল। সেয়ে ৰিয়ানৰ শ্ৰীলংকা ভ্ৰমণৰ সুযোগ দি পুনৰ পৰীক্ষা-নিৰীক্ষা চলাইছে নিৰ্বাচকসকলে। যদিহে ৰিয়ানে এই সুযোগৰ সুবিধা লয় তেন্তে ভৱিষ্যতে দলৰ নিয়মীয়া সদস্যও হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
