বৰ্তমান সময়ত তৎক্ষণাত ঋণ দিয়াৰ প্ৰতিশ্ৰুতি দি বহু ভুৱা লোন এপে সৰ্বসাধাৰণক প্ৰতাৰণা কৰি আহিছে। এই এপসমূহে নিজকে বৈধ বেংক বা NBFC-ৰ অনুমোদিত বুলি দাবী কৰিলেও বাস্তৱত ইয়াৰ মূল উদ্দেশ্য হৈছে ব্যৱহাৰকাৰীৰ ব্যক্তিগত তথ্য চুৰি কৰি আৰ্থিক আৰু মানসিকভাৱে শোষণ কৰা। সেইবাবে যিকোনো লোন এপ ব্যৱহাৰ কৰাৰ আগতে ভালদৰে পৰীক্ষা কৰাটো অত্যন্ত প্ৰয়োজন।
৮টা ভুৱা Loan App চিনাক্তকৰণ
ভুৱা লোন এপসমূহ সাধাৰণতে কম সুদত অতি কম সময়ৰ ভিতৰত ঋণ দিয়াৰ প্ৰলোভন দিয়ে। এপ ডাউনলোড কৰাৰ পিছত ই ফোনৰ কন্টাক্ট লিষ্ট, ফটো গেলেৰী, মাইক্ৰ’ফোন, কেমেৰা, SMS, লোকেচন আদি বহু অপ্রয়োজনীয় অনুমতি বিচাৰে। এই অনুমতিসমূহৰ জৰিয়তে চাইবাৰ ক্ৰাইমত জড়িত প্ৰতাৰকে ব্যক্তিগত তথ্য সংগ্ৰহ কৰি ব্লেকমেইল, ভয়-ভাবুকি আৰু অবৈধ ধন দাবী কৰিবলৈ আৰম্ভ কৰে।
সম্প্ৰতি Indian Cyber Crime Coordination Centre (I4C)-এ ৮টা ভুৱা লোন এপৰ বিষয়ে জনসাধাৰণক সতৰ্ক কৰিছে। এই এপসমূহ হ’ল— FinMona–Personal Credit, Dhanashree Salah, SafalScore–Easy Loan, FinCure–Credit Assistant, RupeeJar–Asset Access, S Large Quick Loan Assistant, LoanBloom আৰু BrioCredit–Credit Assistant। এই এপসমূহ ব্যৱহাৰ নকৰিবলৈ বিশেষভাৱে পৰামৰ্শ দিয়া হৈছে।
কেনেকৈ ব্লেকমেইলিং কৰে এই Appসমূহে?
এই ধৰণৰ এপসমূহে সাধাৰণতে আৰ্থিক সংকটত থকা লোক, ছাত্ৰ-ছাত্ৰী, চাকৰিয়াল যুৱক-যুৱতী, মহিলা, জ্যেষ্ঠ নাগৰিক আৰু ডিজিটেল সজাগতা কম থকা লোকক সহজে লক্ষ্য হিচাপে নিৰ্বাচন কৰে। জৰুৰী প্ৰয়োজনত টকাৰ অভাৱ, বেংকৰ পৰা ঋণ নোপোৱা, চিকিৎসা বা সন্তানৰ শিক্ষাৰ খৰচৰ বাবে বহুতে এনে ভুৱা এপৰ ফান্দত পৰি যায়। ভুৱা লোন এপে ঋণ দিয়াৰ পিছত অতি কম সময়তে ধন ঘূৰাই বিচাৰে। সময়মতে পৰিশোধ কৰিব নোৱাৰিলে ব্যৱহাৰকাৰীৰ কন্টাক্ট লিষ্টত থকা আত্মীয়-স্বজন বা বন্ধুবৰ্গলৈ মেছেজ পঠিয়াই বদনাম কৰাৰ চেষ্টা কৰে। কেতিয়াবা “ডিফল্টাৰ” বা “প্ৰতাৰক” বুলি অপমানজনক বাৰ্তা প্ৰেৰণ কৰে, WhatsApp গ্ৰুপ তৈয়াৰ কৰি ৰাজহুৱাভাৱে হেয় প্ৰতিপন্ন কৰে, অশ্লীল ভাষা ব্যৱহাৰ কৰে আৰু অবিৰত ফোন কৰি মানসিক চাপ সৃষ্টি কৰে।
কেনেকৈ চিনাক্ত কৰিব বৈধ Loan App?
আনহাতে বৈধ লোন এপসমূহ RBI-ৰ অনুমোদিত বেংক বা NBFC-ৰ সৈতে সংযুক্ত থাকে। ইয়াত ঋণৰ সকলো নিয়ম, সুদৰ হাৰ, চাৰ্জ আৰু চৰ্ত স্পষ্টকৈ উল্লেখ থাকে। বৈধ এপে কেতিয়াও অপ্রয়োজনীয় ব্যক্তিগত তথ্য বা ফোনৰ সকলো অনুমতি নাবিচাৰে। সেয়ে কোনো লোন এপ ডাউনলোড কৰাৰ আগতে কোম্পানীটোৰ নিবন্ধন, অফিচিয়েল ৱেবছাইট, প্ৰাইভেচি পলিচি, ব্যৱহাৰকাৰীৰ মতামত আৰু RBI-ৰ অনুমোদন ভালদৰে পৰীক্ষা কৰিব লাগে। কেৱল Play Store-ত উপলব্ধ বা উচ্চ ৰেটিং থকা বুলিয়েই কোনো এপ সম্পূৰ্ণ নিৰাপদ বুলি ধৰি ল’ব নালাগে, কিয়নো ভুৱা ৰিভিউ আৰু ৰেটিঙো সৃষ্টি কৰিব পৰা যায়।
ভুৱা Loan Appৰ জালত পৰিলে কি কৰিব?
যদি ভুলবশতঃ কোনো ভুৱা লোন এপৰ জালত পৰে, তেন্তে ভয় নকৰি তৎক্ষণাত ব্যৱস্থা গ্ৰহণ কৰিব লাগে। চাইবাৰ হেল্পলাইন ১৯৩০ নম্বৰত যোগাযোগ কৰিব লাগে, National Cyber Crime Reporting Portal-ত অভিযোগ দাখিল কৰিব লাগে, নিকটৱৰ্তী চাইবাৰ আৰক্ষী শাখা বা আৰক্ষী থানাত খবৰ দিব লাগে। লগতে স্ক্ৰীণশ্বট, কল ৰেকৰ্ড, লেনদেনৰ তথ্য আদি সকলো প্ৰমাণ সংৰক্ষণ কৰি বেংককো তৎক্ষণাত অৱগত কৰিব লাগে। সচেতনতা, সতৰ্কতা আৰু সঠিক তথ্যই ভুৱা লোন এপৰ প্ৰতাৰণাৰ পৰা নিজকে সুৰক্ষিত ৰখাৰ আটাইতকৈ ফলপ্ৰসূ উপায়। কেৱল RBI-ৰ অনুমোদিত বেংক বা NBFC-ৰ বিশ্বাসযোগ্য লোন প্লেটফৰ্মৰ জৰিয়তেই ঋণ লোৱাটো সদায় নিৰাপদ।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
