‘পিটাৰক বিয়া কৰাই জীৱনত ডাঙৰ ভুল হ’ল!’ কাৰাগাৰৰ পৰা ওলাই কেনে আছে ইন্দ্ৰানী মুখাৰ্জী?

অসম লাইভ২৪ঃ ২০১৫ চনৰ আগষ্ট মাহতেই আৰম্ভ হৈছিল এই কাহিনী৷ ঘটনাৰ প্ৰায় ৮ বছৰ সম্পূৰ্ণ হৈছে৷ সেই সময়ত দেশজুৰি চাঞ্চল্যৰ সৃষ্টি কৰিছিল বিশেষ ঘটনাটোৱে৷ এগৰাকী মাতৃক সেইদিনা সমগ্ৰ দেশৰ জনতাই ঘৃণা কৰিছিল৷ তেওঁ আন কোনো নহয় তেওঁ হৈছে ইন্দ্ৰানী মুখাৰ্জী৷ কন্যাক হত্যা কৰাৰ অপৰাধত অপৰাধী চিনাক্ত হোৱা ইন্দ্ৰানীয়ে প্ৰায় ৮ বছৰৰ পাছত এই সমগ্ৰ ঘটনাক লৈ মুখ খুলিছে৷ এতিয়াও শ্বীনা বৰাৰ হত্যাকাণ্ডক লৈ অব্যাহত আছে তদন্ত৷ আজিও বহুতেই জানিবলৈ আগ্ৰহী কিয় এগৰাকী মাতৃয়েই নিজ কন্যাক হত্যা কৰিবলৈ কুণ্ঠাবোধ নকৰিলে? সমগ্ৰ ঘটনাটোক লৈ শেহতীয়াকৈ ইন্দ্ৰানী মুখাৰ্জীয়ে সংবাদ মাধ্যমৰ সন্মুখত প্ৰদান কৰিছে কেইটামান বিশেষ মন্তব্য৷

ইন্দ্ৰানী মুখাৰ্জী কেনে আছে?
কন্যা শ্বীনা বৰাৰ হত্যাৰ কথা মনলৈ আহিলেই প্ৰথমেই চকুত ভাঁহি আহে মাতৃ ইন্দ্ৰানীৰ মুখ৷ ইন্দ্ৰানীয়ে এই অপৰাধৰ গোচৰত ৬ বছৰৰো অধিক সময় কাৰাবাসো খাটি আহিছে৷ আড়ম্বৰপূৰ্ণ জীৱনৰ পৰা কাৰাগাৰৰ অন্ধকাৰ কোঠৰিত কেনেকৈ পাৰ কৰিছিল সময় এই সমূহ কথাই ইন্দ্ৰানীয়ে প্ৰকাশ কৰিছে৷ ২০১৫ চনত সংঘটিত এই ঘটনাৰ পাছতেই ইন্দ্ৰানী বিচ্ছিন্ন হৈ পৰিছিল পৰিয়ালৰ পৰা৷ পৰিয়াল, বন্ধুবৰ্গ, কামকাজ সকলোৰে পৰা আঁতৰি কাৰাগাৰত থকাৰ পাছতেই নিজৰ মতে জীৱনটোক আকৌ সজাবলৈ গৈ অনুশোচনাৰ ভূগিছে ইন্দ্ৰানী৷ স্বামী হিচাপে পিটাৰ মুখাৰ্জীক গ্ৰহণ কৰাটোৱেই জীৱনৰ আটাইতকৈ ডাঙৰ ভুল বুলিও শেহতীয়া সাক্ষাৎকাৰটোত প্ৰকাশ কৰিছে ইন্দ্ৰানীয়ে৷

৮ বছৰ পূৰ্বে দেশৰ জনতাৰ দৃষ্টিত মষ্ট ৱানটেড নাৰী হিচাপে পৰিচিত হৈ পৰিছিল ইন্দ্ৰানী৷ ৮বছৰ পূৰ্বে পিটাৰ মুখাৰ্জীৰ দক্ষিণ মুম্বাইৰ ঘৰৰ পৰা গ্ৰেপ্তাৰ হৈছিল ইন্দ্ৰানী মুখাৰ্জী৷ গুৱাহাটীৰ পৰী বৰাই তেতিয়াৰে পৰা দেশৰ পৰিচিত মষ্ট ৱানটেড মহিলা ইন্দ্ৰানী৷ পৃথিৱীৰ সকলোতকৈ প্ৰভাৱশালী নাৰীৰ তালিকাতো পৰীৰ পৰা ইন্দ্ৰানী হৈ উঠা এইগৰাকী মহিলা৷ কাৰাগাৰত থকা সময়তো তেওঁৰ চৰ্চা কমি যোৱা নাছিল৷ চৰ্চা হৈছিল ইন্দ্ৰানীৰ বিপক্ষেই৷ এইবাৰ ইন্দ্ৰানীয়ে নিজেই নিজৰ বিৰুদ্ধে কথা কৈ চৰ্চাত আহিছে৷ তেওঁ কোনো সংবাদমাধ্যমতেই সাক্ষাৎকাৰ দিবলৈ আগ্ৰহী নহয় বুলি কাৰাগাৰৰ পৰা ওলোৱাৰ পাছতো বহুদিন আঁতৰি আছিল৷ কিন্তু এইবাৰ নিজেই সংবাদমাধ্যমৰ আগত মন্তব্য প্ৰদান কৰিছে ইন্দ্ৰানীয়ে৷ শেহতীয়াতকৈ তেওঁ নিজৰ জীৱনী লিখিছে৷ সেই বিশেষ জীৱনীখন প্ৰকাশো হৈছে৷

আত্মজীৱনী লিখিছে ইন্দ্ৰানী মুখাৰ্জীয়ে

মুম্বাইৰ নিজা বাসভৱনত বহি ইন্দ্ৰানীয়ে লিখি উলিয়াইছে, ‘আনব্ৰকেনঃদ্যা আনটোল্ড ষ্টৰী’৷ এই গ্ৰন্থখনতেই তেওঁ কন্যা শ্বীনা, পিটাৰ আৰু সংসাৰৰ সৰু সুৰা সকলোবোৰ কথাই উল্লেখ কৰিছে৷ উল্লেখ কৰা প্ৰয়োজন যে ইন্দ্ৰানী এগৰাকী উচ্চ শিক্ষিতাও৷ তেওঁৰ অসমীয়াৰ ওপৰিও, বাংলা, ইংৰাজী, হিন্দী, আৰু স্পেনিছ ভাষাৰো যথেষ্ট জ্ঞান আছে৷ কাৰাগাৰত থকাৰ সময়তেই তেওঁ এই আত্মজীৱনী লিখিবলৈ আৰম্ভ কৰিছিল৷ তেওঁৰ গ্ৰন্থখন সন্দৰ্ভত কয়, ‘আগতে মই লেখামেলা কৰা নাছিলো৷ কিন্তু কাৰাগাৰত সময় পাৰ নহৈছিল৷ সেয়ে ডায়েৰী লিখিবলৈ আৰম্ভ কৰিলো৷ লেখাৰ অভ্যাস এটা থেৰাপীৰ দৰে৷ কাৰাগাৰত অন্য ব্যস্ততা নাথাকে৷ পুৰণি কথাবোৰ খুবেই মনলৈ আহি আছিল৷ সেই সমূহ লিখিবলৈ ল’লো৷ কিবা অলপ লিখাৰ পাছত নিজৰেই ভাল লাগে৷ লিখাৰ ইচ্ছা তেনেকৈয়ে বাঢ়ি থাকিল৷ কেৱল স্মৃতিত ভাঁহি থাকিয়েই মোৰ ভাল লাগিবলৈ ধৰিলে৷ জীৱনত অনেক ভুল কৰিছো সেই কথাবোৰো মনলৈ আহি থাকে৷ ভাল কামো নকৰা নহয়৷ কিন্তু মোৰ ভুলৰ পৰিমান জীৱনত বেছি৷ মানুহ মাত্ৰেই ভুল হয়েই৷’

২০১৫ত ঘটনাটো পোহৰলৈ অহাৰ সময়ত তেওঁক মানুহ বুলি ক’বলৈকো সমাজৰ একাংশই বিচৰা নাছিল৷ আকৌ শূন্যৰ পৰা নিজৰ পৰিচয় গঢ়িবলৈ আৰম্ভ কৰিছে ইন্দ্ৰানীয়ে৷ তেওঁ বিশ্বাস কৰে, তেওঁৰ কন্যা শ্বীনা বৰা এতিয়াও জীয়াই আছে৷ এই কথাক তেওঁ দাবী দিও কয় যে তেওঁৰ চিন্তা অমূলক নহয়৷ প্ৰমাণো পাইছে তেওঁৰ পৰিচিত বহুলোকে৷ আদালততো এই বিষয়টোক লৈ একাংশই সাক্ষী দিছে৷

জীৱনত এইটোৱেই ডাঙৰ ভুল, কি ভুলৰ কথা ক’লে ইন্দ্ৰানীয়ে?
ইন্দ্ৰানীয়ে ভুলৰ প্ৰসংগ ওলিয়াওতে কয় যে, ‘পিটাৰক বিয়া পতাই জীৱনত ডাঙৰ ভুল হ’ল৷ মই মানুহ চিনি নাপালো৷’ ইন্দ্ৰানী গুৱাহাটীৰ জীয়াৰী৷ প্ৰথমে তেওঁ বিবাহপাশত আৱদ্ধ হৈছিল কলকাতাৰ ব্যৱসায়ী সঞ্জীৱ খান্নাৰ সৈতে৷ কিন্তু এই বিবাহ বেছি দিন টিকি নাথাকিল৷ মুম্বাইৰ পিটাৰ মুখাৰ্জীৰ সৈতে কথা পাতি সলনি হয় ইন্দ্ৰানীৰ জীৱন৷ তাৰপিছতেই ইন্দ্ৰানীয়ে সঞ্জীৱ খান্নাক এৰি পিটাৰৰ সৈতে সংসাৰ আৰম্ভ কৰে৷ তাৰপিছতেই পিটাৰ-ইন্দ্ৰানী দেশৰ মিডিয়া জগতত অতি পৰিচিত নাম হৈ পৰিল৷ কেনেকৈ ইন্দ্ৰানীয়ে পিটাৰক লগ পালে, কেনেকৈ দুয়োৰে মাজত প্ৰেম হয় সেই কথাও ইন্দ্ৰানীয়ে নিজেই প্ৰকাশ কৰিছে৷

ইন্দ্ৰানীয়ে পিটাৰ সন্দৰ্ভত কয়, ‘ভালপাইছিলো পিটাৰক৷ মস্তিষ্কতকৈ হৃদয়ৰ কথাবোৰ শুনিছিলো৷ মোৰ মস্তিষ্কতকৈ হৃদয়ক বেছি গুৰুত্ব দিয়াৰ বদভ্যাস বহুদিনীয়া৷ পিটাৰক আঁকোৱালী লোৱাটোৱেই মোৰ ডাঙৰ ভুল হ’ল৷ এনে ক্ষোভ, দুখ সামৰি জীৱনটো কেনেকৈ চলাই ৰাখো?’ ২০১৫ চনৰ আগত ইন্দ্ৰানী এনে বিধ্বস্তপ্ৰায় অৱস্থাত নাছিল৷ সেই ইন্দ্ৰানী আছিল চৌখিন ইন্দ্ৰানী৷ পাৰ্টী কৰি ভালপোৱা, ফুৰি ভালপোৱা ইন্দ্ৰানী৷ নিজৰ এইসমূহ চখৰ কথা তেওঁ নিজা গ্ৰন্থখনত উল্লেখ কৰিছে৷ ২০ বছৰ আগতে তেওঁ কোন নৈশভোজত কেনে পোছাক পিন্ধি গৈছিল, নিজকে কেনেকৈ সুন্দৰ কৰি ৰাখিছিল এই সকলোবোৰ কথা উল্লেখ কৰিছে৷

চৌখিন ইন্দ্ৰানী এতিয়া কেনে অৱস্থাত আছে?

কাৰাগাৰৰ পৰা ওলাই আহি ইন্দ্ৰানীয়ে নিজকে আকৌ সজাই পৰাই পুৰণি চৌখিন ইন্দ্ৰানী হিচাপে পৰিচয় দিয়াৰ চেষ্টা কৰিও বাৰে বাৰে বিফল হৈছে৷ সকলো হেৰুৱালেও ইন্দ্ৰানী কিন্তু জীৱন যুদ্ধত হাৰি যাব খোজা নাই৷ তেওঁ জীৱনক ভালপোৱাৰ কথা উল্লেখ কৰি কয়, ‘সকলোৱে বিচৰামতেই সকলোবোৰ নাপায়৷ কাৰোবাৰ হাতত যদি পৰিয়াল থাকে৷ কাৰোবাৰ হাতত থাকে কেৰিয়াৰ, কাৰোবাৰ হাতত আকৌ একোৱেই নাথাকে৷ পৰিয়াল বুলি মোৰ এতিয়া কোনো নাই৷ কেইবা বছৰ পূৰ্বে পিটাৰৰ সৈতেও বিবাহ বিচ্ছেদ হৈছে৷ পুত্ৰ মিখেলেও তেওঁৰ নামত নানান অভিযোগ আনিছে৷ কন্যা শ্বীনাও হেৰাই গ’ল৷ কেৱল নিজৰ বুলিবলৈ আছে এগৰাকী কন্যাহে৷ কন্যা ভিধি আছে যদিও মাতৃৰ পৰা দূৰত্ব বজাই ৰাখিছে ভিধিয়ে৷ মান-অভিমান আত্মীয়ৰ সৈতেই বেছি হয়৷ কাষত নিজৰ বুলি কোনো নাই৷ জীৱনটো ন’কৈ সজাম কাক লৈ? তথাপিও মোৰ কন্যা ভীধিৰ নামটো লওঁতেও মোৰ ভিতৰৰ পৰা মাতৃত্বৰ মমতা জাগি উঠে৷ তাইয়ো মোৰ বিৰুদ্ধেই কথাবোৰ কয়৷ পিটাৰে তাইক মোৰ বিৰুদ্ধে মনত বেয়া ভাৱ সোমোৱাই দিছে৷ এতিয়া মোৰ পৰিয়াল বুলিবলৈ কেৱল ভিধি আছে৷’

‘প্ৰথম স্বামীৰ পৰিয়ালৰ পৰাই সঁচা ভালপোৱা পাইছিলো’

পৰিয়ালৰ কথা কওঁতে ইন্দ্ৰানীয়ে কয়, ‘পৰিয়াল বুলিবলৈ মোৰ কাষত এটাই সঁচা পৰিয়াল আছিল৷ সেয়া আছিল মোৰ পূৰ্বৰ স্বামী সঞ্জীৱৰ পৰিয়াল৷ তেঁওলোকৰ সৈতে সম্পৰ্ক নিস্বাৰ্থ আছিল৷ সেই নিস্বাৰ্থ ভালপোৱা মই অইন ক’তো নাপালো৷ যিয়েই নহওক মই হাৰি যাব নোখোজো৷ নতুনকৈ কিছু পৰিকল্পনা হাতত লৈছো৷ সমাজসেৱাতেই মই জীৱনৰ বাকীছোৱা কাল খৰচ কৰিব খোজো’

কেৱল কামেই কৰিব খোজে ইন্দ্ৰানীয়ে তেনে নহয়৷ সামগ্ৰীকভাৱে সুন্দৰ জীৱন কটাব খোজে ইন্দ্ৰানীয়ে৷ তেওঁ বৰ্তমান যোগাসন, নাচ, পূজা অৰ্চনা আদি কৰিয়েই সময় কটায়৷ পৰিপূৰ্ণ জীৱনৰ প্ৰতি তেওঁৰ দুৰ্বলতা আজিও আছে বুলি সাক্ষাৎকাৰত নিজেই উল্লেখ কৰিছে ইন্দ্ৰানীয়ে৷ সম্প্ৰতি তেওঁ সামাজিক মাধ্যমত একাউণ্টো খুলিছে৷ সামাজিক মাধ্যমত প্ৰতি সময়তে এক্টিভ নহলেও তেওঁ মাজে মাজে এটা দুটা পোষ্ট শ্বেয়াৰ কৰি থাকে৷ পোষ্টৰ সংখ্যাতকৈ তেওঁৰ অনুৰাগীৰ সংখ্যা লক্ষ্যাধিক৷ ইয়াৰ পৰাই প্ৰমাণ হয় যে, ইন্দ্ৰানীক এতিয়াও নজৰ ৰাখিছে লাখ লাখ লোকে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ