মাথো এটা উইকেট ল’লেই মহাৰেকৰ্ড হ’ব বুমৰাহৰ, ভংগ হ’ব মালিংগাৰ ৰেকৰ্ড
আন এক ৰেকৰ্ডৰ গৰাকী হ’বলৈ গৈ আছে জশপ্ৰীত বুমৰাহ। আৰু মাথো এটা উইকেট ল’লেই এক মহান ৰেকৰ্ডৰ গৰাকী হব পাৰিব বুম বুম বুমৰাহ। কেৱল ৰেকৰ্ড গঢ়াই নহয়, ভংগ কৰিব পাৰিব লাচিথ মালিংগাৰ দৰে দ্বিগ্বজ খেলুৱৈৰ ৰেকৰ্ড।
এই মহাৰেকৰ্ড গঢ়িবলৈ সাজু হৈছে আই পি এলৰ পথাৰত। মুম্বাই দলৰ হৈ এই ৰেকৰ্ড কৰিব বুমৰাহে। বৰ্তমানে বুমৰাহ কেৰিয়াৰৰ সেই পৰ্যায়ত উপনীত হৈছে য’ত তেওঁ প্ৰতিখন মেচ আৰু প্ৰতিটো উইকেটতে নতুন অভিলেখ গঢ়িবলৈ সক্ষম হৈছে।
হায়দৰাবাদৰ বিৰুদ্ধে টি-২০ ক্ৰিকেটত ভাৰতৰ হৈ সৰ্বাধিক দ্ৰুততম ৩০০ উইকেট দখল কৰাৰ অভিলেখ গঢ়িবলৈ সক্ষম হয় বুমৰাহ। এতিয়া লক্ষ্ণৌৰ বিৰুদ্ধে খেলখনত নিজৰ কেৰিয়াৰত আন এক ঐতিহাসিক মুহূৰ্ত সংযোজন কৰাৰ সোণালী সুযোগ পাব বুমৰাহে।
দৰাচলতে বৰ্তমান আই পি এলৰ ইতিহাসত মুম্বাইৰ হৈ সৰ্বাধিক উইকেট দখল কৰা বলাৰৰ তালিকাৰ শীৰ্ষত আছে যৌথভাৱে লাচিথ মালিংগা আৰু বুমৰাহ। এম আইৰ জাৰ্চিত মুঠ ১৭০টা উইকেট দখল কৰিছে মালিংগা আৰু বুমৰাহে।
এতিয়া যদি বুমৰাহে ২৭ এপ্ৰিল তাৰিখে অনুষ্ঠিত হব লগা লক্ষ্ণৌৰ বিৰুদ্ধে খেলখনত এটা উইকেট ল’বলৈ সক্ষম হয় তেন্তে বুমৰাহ মুম্বাইৰ সৰ্বাধিক উইকেট দখলকাৰী হিচাপে পৰিগণিত হ’ব।
মুম্বাইৰ হৈ সৰ্বাধিক উইকেট লোৱা তালিকাত বুমৰাহ-মালিংগাৰ পাছত ১২৭ টা উইকেটেৰে আছে হৰভজন সিং।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
