গ্লাছগো কমনৱেলথ গেমছ ২০২৬ৰ উদ্বোধনী অনুষ্ঠানৰ লগে লগে ভাৰতৰ প্ৰথমটো পদক নিশ্চিত হৈছে। অসমকন্যা তথা ভাৰতৰ তাৰকা মহিলা বক্সাৰ, অলিম্পিক পদক বিজয়ী লাভলীনা বৰগোহাঁয়ে অতি কমেও ব্ৰঞ্জৰ পদক নিশ্চিত কৰিছে। নিজৰ শাখাত বাই লাভ কৰাৰ সুবাদত লাভলীনা বৰগোহাঁয়ে কমনৱেলথ গেমছৰ ছেমি ফাইনেলত পোনপটীয়াকৈ প্ৰৱেশ নিশ্চিত কৰিছে। ছেমি ফাইনেলত স্থান লাভ কৰি ইতিমধ্যে লাভলীনাৰ জৰিয়তে CWG26ৰ আৰম্ভণিৰ পূৰ্বেই ভাৰতে ন্যূনতম ব্ৰঞ্জৰ পদক লাভ কৰিছে অৰ্থাৎ বক্সিং ৰিঙত প্ৰৱেশ কৰাৰ আগতেই ইতিমধ্যে লাভলীনাৰ প’ডিয়ামৰ স্থান নিশ্চিত হৈ পৰিছে।
৩১ জুলাইত লাভলীনাৰ ছেমি ফাইনেল
উল্লেখ্য যে ৩১ জুলাইত অনুষ্ঠিত হ’বলগীয়া ছেমিফাইনেলত অৱতীৰ্ণ হ’ব অসমকন্যা লাভলীনা। মহিলাৰ ৭৫ কেজি শাখাৰ ছেমি ফাইনলেত লাভলীনাৰ প্ৰতিদ্বন্দ্বী হব টুভালুৰ টাৰোনা টাফাকি। ছেমি ফাইনেলত পৰাস্ত হোৱা প্ৰতিযোগীয়ে ব্ৰঞ্জৰ পদক নিশ্চিত কৰাৰ লগতে জয়ী হোৱা প্ৰতিযোগীয়ে প্ৰৱেশ কৰিব ফাইনেলত।
এইবাৰ হ্ৰাস পাব পাৰে ভাৰতৰ পদকৰ সংখ্যা
বিগত কমনৱেলথ গেমছত ভাৰতৰ মুঠ পদকৰ সংখ্যা আছিল ৩১টা। কিন্তু এইবাৰৰ কমনৱেলথ গেমছত ভাৰতৰ পদকৰ সংখ্যা হ্ৰাস পোৱাৰ আশংকা কৰা হৈছে। ইয়াৰ একমাত্ৰ কাৰণটো হৈছে এইবাৰ ৪বিধ খেলক অন্তৰ্ভুক্তিৰ পৰা বিৰত আছে কমনৱেলথ গেমছ কমিটীয়ে। এই ৪ বিধ খেল হৈছে হকী, বেডমিণ্টন, ক্ৰিকেট আৰু মল্লযুঁজ। উল্লেখ্য যে এই চাৰিওটা গেমতে ভাৰতৰ পাৰদৰ্শিতা আছিল প্ৰশংসনীয়। এই চাৰিওবিধ খেলতে ভাৰতৰ পদক নিশ্চিত আছিল। কিন্তু এই খেলকেইবিধক অন্তৰ্ভুক্তি নকৰাত পদকৰ সংখ্যা পূৰ্বৰ সংস্কৰণৰ তুলনাত হ্ৰাস পোৱাৰ আশংকা প্ৰকাশ কৰা হৈছে। চলিত কমনৱেলথ গেমছ ভাৰতে এথলেটিকছ, বক্সিং, ভাৰোত্তোলন, জুডো, আৰ্টিষ্টিক জিমনাষ্টিক, ট্ৰেক চাইকেলিং, লন বাউল আৰু সাঁতোৰকে ধৰি ৮বিধ খেলত অংশগ্ৰহণ কৰিছে। অহা ২৭ জুলাইৰ পৰা ১ আগষ্টলৈ অনুষ্ঠিত হ’বলগীয়া এই এথলেটিকছ প্ৰতিযোগিতাত বিশ্বৰ মনোযোগ কেন্দ্ৰীভূত হ’ব নীৰজ চোপ্ৰাৰ ওপৰত। ২০১৮ চনৰ গোল্ড কোষ্ট চি ডব্লিউ জিত নীৰজে স্বৰ্ণ পদক লাভ কৰে। ২০২২ চনত বাৰ্মিংহামত অনুষ্ঠিত হোৱা কমনৱেলথ গেমছত আঘাতৰ বাবে তেওঁ অংশ ল’ব নোৱাৰিলে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
