এক ভাইৰেল ভিডিঅ’ৱে সামাজিক মাধ্যমৰ লগতে দেশৰ সংবাদ মাধ্যমত বিশেষ চৰ্চা লাভ কৰিছে৷ চলন্ত ৰে’লৰ ট্ৰেকৰ পৰা এগৰাকী যুৱতীৰ প্ৰাণৰক্ষা কৰিছে এজন লোকে৷
টুইটাৰত এই ভিডিঅ’টো ভাইৰেল হোৱাৰ পিছতে এতিয়া ৩৭ বছৰীয়া দুঃসাহসী লোকজন দেশজুৰি চৰ্চা লাভ কৰিছে৷
শুকুৰবাৰে আনুষ্ঠানিকভাৱে ভাইৰেল হোৱা ঘটনাটো যোৱা ৫ ফেব্ৰুৱাৰিত সংঘটিত হৈছিল৷
ঘটনাৰ বিৱৰণীৰ মতে মধ্য প্ৰদেশৰ ভূপাল চহৰৰ বাৰখেদীৰ মহম্মদ মেহবুব নামৰ কাঠমিস্ত্ৰীগৰাকীয়ে নিশা ৮ বজাত কৰ্মস্থানৰ পৰা ঘৰলৈ ওভতি আহি আছিল৷
তেনে সময়তে এগৰাকী যুৱতীয়ে হাতত বেগ লৈ ৰে’লৱে ক্ৰ’ছিং পাৰ হ’বলৈ চেষ্টা কৰে৷ নাতিদূৰৈত পাইছিলহি এখন মালবাহী দ্ৰুতবেগী ৰে’ল৷
এনেতে হঠাৎ যুৱতীগৰাকী কিবা কাৰণত ৰে’লৱে ট্ৰেকৰ মাজতে আৱদ্ধ হৈ পৰে৷ ইফালে দ্ৰুতগতিৰ ট্ৰেইনখনে যুৱতী গৰাকীৰ তেনেই ওচৰত, সকলো প্ৰত্যক্ষদৰ্শীৰ বুকুত ধপধপনি৷ যুৱতীগৰাকীৰ পিতৃ আৰু ভাতৃয়ে নিজৰ কন্যা আৰু ভগ্নীক হেৰুওৱাক নিশ্চিত সম্ভাৱনাত চকু মুদি দিছে!
এক লহমা পলম হ’লেই যে যুৱতীগৰাকীৰ নিৰ্ঘাত মৃত্যু! ঠিক তেনে সময়তে মৃত্যু ভয়ক নেওচা দি মহম্মদ মেহবুবে ৰে’লৱেৰ ট্ৰেকলৈ জঁপিয়াই দিয়ে৷ আৰু থিয় হৈ ৰে’লৱে ট্ৰেকত আৱদ্ধ হৈ থকা যুৱতীগৰাকীক তক্ষণাৎ টানি ৰে’লৱে ট্ৰেকত সমান্তৰালভাৱে শুৱাই দি নিজেও শুই দিয়ে৷
আৰু তৎমুহূৰ্ততে তেওঁলোকৰ শৰীৰ ওপৰেৰে মালবাহী ৰে’লখনৰ ১৮ টা দবা পাৰ হৈ যায়৷ আৰু যুৱতীগৰাকীৰ লগতে মহম্মদ মেহবুবৰ জীৱনো ৰক্ষা পৰে৷
আৰু এই সমগ্ৰ কাণ্ডটোৰ ভিডিঅ’ সামাজিক মাধ্যমত ভাইৰেল হোৱাৰ পিছতে যুৱতীগৰাকীৰ প্ৰাণৰক্ষা কৰা মহম্মদ মেহবুবক অসংখ্য লোকে ধন্যবাদ আৰু কৰ্তৃজ্ঞতা প্ৰকাশ কৰিছে৷
ইফালে প্ৰাণৰক্ষা পৰা পিছতে যুৱতীগৰাকীয়ে ঘটনাস্থলীতে উপস্থিত থকা নিজ পিতৃ আৰু ভাতৃক সাৱটি কান্দিবলৈ আৰম্ভ কৰে৷ সেই সময়ত যুৱতাগৰাকীৰ পিতৃ আৰু ভাতৃয়েও ৰে’লৱে ট্ৰেকটো পাৰ হ’বলৈ তাতে ৰৈ আছিল৷
আনহাতে, নিৰ্ঘাত মৃত্যুৰ পৰা যুৱতীগৰাকীৰ প্ৰাণৰক্ষা কৰা মহম্মদ মেহবুবৰ ঘৰ চহৰখনৰ অশোক বিহাৰত বুলি জানিব পৰা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ