অসম লাইভ ২৪ঃ ৰাজ্য তোলপাৰ লগোৱা নগাঁৱৰ ছাত্ৰ নেতা কীৰ্তিকমল বৰাৰ একাউন্টাৰ ঘটনাই এইবাৰ নতুন মোৰ লৈছে৷
ঘটনাৰ সন্দৰ্ভত মুখ্যমন্ত্ৰীয়ে উচিত তদন্ত কৰা হ’ব বুলি ঘোষণা কৰাৰ পিছতো অভিযুক্ত আৰক্ষী বিষয়া প্ৰদীপ বনিয়াই ছাত্ৰ নেতাগৰাকীৰ বিৰুদ্ধে জামিন বিহীন ধাৰাত গোচৰ ৰুজু কৰাৰ খবৰ আহিছিল৷
ইয়াৰ পিছতে অভিযুক্ত আৰক্ষী বিষয়া প্ৰদীপ বনিয়াৰ বিৰুদ্ধে জামিন বিহীন ধাৰাত গোচৰ ৰুজু কৰা হৈছে৷ আৰক্ষীৰ গুলীত আহত কীৰ্তিকমল বৰাৰ পিতৃয়ে দাখিল কৰা এক এজাহাৰৰ ভিত্তিত অভিযুক্ত আৰক্ষী বিষয়াগৰাকীৰ বিৰুদ্ধে নগাঁও আৰক্ষীয়ে এই গোচৰ ৰুজু কৰা বুলি জানিব পৰা গৈছে৷
নগাঁও সদৰ আৰক্ষী থানাত ১৩৯/২২নম্বৰত ভাৰতীয় দণ্ডবিধি আইনৰ ৩২৬/৩০৭/৫০৬ ধাৰাৰ অধীনত গোচৰ ৰুজু হৈছে অভিযুক্ত আৰক্ষী বিষয়া প্ৰদীপ বনিয়াৰ বিৰুদ্ধে।
ইফালে ঘটনাটোক কেন্দ্ৰ কৰি ৰাজ্যজুৰি প্ৰতিবাদৰ ঢৌ উঠাৰ পিছতে নগাঁৱৰ আৰক্ষী অধীক্ষ আনন্দ মিশ্ৰই অভিযুক্ত আৰক্ষী বিষয়া প্ৰদীপ বনিয়াসহ ঘটনাটোৰ সৈতে জড়িত আটাইকেইজন আৰক্ষীক ৰিজাৰ্ভ ক্ল’জ কৰা বুলি সংবাদ মাধ্যমৰ আগত প্ৰকাশ কৰিছিল৷
আনহাতে, সামাজিক মাধ্যম আৰু ৰাজ্যজুৰি ঘটনাটোৰ বিৰুদ্ধ তীব্ৰ প্ৰতিবাদ হোৱাৰ পিছতে নগাঁও আৰক্ষীয়ে ঘটনাটোৰ ব্যাখ্যা সলনিৰ চেষ্টা কৰাৰো অভিযোগ উঠিছে৷
মুখ্যমন্ত্ৰী ডঃ হিমন্ত বিশ্ব শৰ্মাই দোষী আৰক্ষীৰ বিষয়াৰ বিৰুদ্ধে উচিত ব্যৱস্থা লোৱা হ’ব বুলি সংবাদ মাধ্যমৰ আগত প্ৰকাশ কৰাৰ পিছত সমগ্ৰ ঘটনাটোৰ তদন্তই কি গতি লাভ কৰে তাকেই লৈ ৰাজ্যবাসী উৎসুক হৈ ৰোৱা পৰিলক্ষিত হৈছে৷ মুখ্যমন্ত্ৰীয়ে কোৱাৰ দৰে সঁচাই দোষী আৰক্ষী বিষয়াক উচিত শাস্তি বিহা হ’ব নে? এই প্ৰশ্নটোও এতিয়া ৰাজ্যবাসীৰ মনত উদয় হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
