বাল্যকালৰ বান্ধৱীক ডিঙি কাটি হত্যা কৰাৰ অপৰাধত আদালতে মৃত্যুদণ্ড দিছে এগৰাকী যুৱকক৷ আনহাতে হত্যাকাণ্ডটোত জড়িত থকা অন্য দুই অভিযুক্তক ১০ বছৰৰ কাৰাদণ্ড বিহা হৈছে৷ এই ৰায় প্ৰদান কৰিছে পাকিস্তানৰ এখন আদালতে৷
উল্লেখ্য যে বিগত বৰ্ষৰ ২০ জুলাইলত পাকিস্তানৰ এগৰাকী প্ৰাক্তন কূটনৈতিক বিষয়া চৌকত মুকাদ্দমৰ কন্যা ২৭ বছৰীয়া নুৰ মুকাদ্দমক ডিঙি কাটি অতি নৃশংসতাৰে হত্যা কৰা হৈছিল৷
এই হত্যাকাণ্ডৰ পিছতে নুৰৰ পিতৃয়ে পাকিস্তানৰ এগৰাকী ধন কুবেৰৰ পুত্ৰৰ জাহিৰ জাবৰ নামৰ ৩০ বছৰীয়া যুৱকজনৰ বিৰুদ্ধে অভিযোগ দাখিল কৰিছিল৷ আৰক্ষীয়ে জাহিৰৰ বাসগৃহৰ পৰা নুৰৰ খণ্ডিত মৃতদেহ উদ্ধাৰ কৰিছিল৷ অভিযোগ অনুসৰি নুৰে জাহিৰৰ সৈতে বিবাহপাশত আৱদ্ধ হ’বলৈ অস্বীকাৰ কৰাৰ বাবেই হত্যা কৰা হৈছিল৷
এই নৃসংশ হত্যাকাণ্ডটোৱে সমগ্ৰ পাকিস্তান জুৰি তীব্ৰ চাঞ্চল্যৰ সৃষ্টি কৰিছিল৷ দেশজুৰি হত্যাকাৰীক দৃষ্টান্তমূলক শাস্তি দিয়াৰ দাবী উঠিছিল৷ মূল অভিযুক্তগৰাকী বৰ্তমান আমেৰিকাৰ নাগৰিক তথা উদ্যোগপতি হোৱাৰ বাবে শাস্তি লাভ নকৰিব বুলি ধাৰণা কৰা হৈছিল৷
কিন্তু নুৰৰ পিতৃৰ অভিযোগৰ ভিত্তিত আৰক্ষীয়ে তদন্ত কৰি আদালতত সকলো তথ্য প্ৰমাণ দাখিল কৰাৰ পিছতে মাত্ৰ ডেৰটা বছৰৰ পিছতে সেই নৃশংস হত্যাকাণ্ডটোৰ ৰায় প্ৰদান কৰিছে পাকিস্তানৰ এখন আদালতে৷
আদালতে হত্যাকাণ্ডটোত জড়িত থকা দুই অভিযুক্ত ক্ৰমে ইফতিকাৰ আৰু জামিলক ১০ বছৰৰ কাৰাদণ্ড বিহিছে৷ আনহাতে আদালতে জাহিৰৰ পিতৃ-মাত আৰু তেওঁলোকৰ ব্যক্তিগত ৰান্ধনীগৰাকীক উক্ত হত্যাকাণ্ডত জড়িত নাই বুলি ঘোষণা কৰি ৰেহাই প্ৰদান কৰিছে৷
ইফালে আদালতৰ এই ৰায়ত অসন্তুষ্টি প্ৰকাশ কৰি নুৰৰ পিতৃ চৌকত মুকাদ্দমে তেওঁৰ পৰিয়ালে ন্যায় লাভ কৰা বুলি সদৰী কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
