দীপাৱলিৰ সময়তে প্ৰধানমন্ত্ৰী মুদ্ৰা যোজনাৰ আবেদনকাৰীৰ বাবে সুখবৰ আহিছে৷ এই প্ৰকল্পৰ অধীনত এইবাৰ ঋণৰ অংক দ্বিগুণ কৰিলে কেন্দ্ৰই৷ শুকুৰবাৰ ২৫ অক্টোবৰত এই বিষয়টোক লৈ জাৰি কৰা হৈছে বিজ্ঞাপ্তি৷ বিগত ২৩ জুলাইত চলিত আৰ্থিক বছৰৰ বাজেটত এই সংক্ৰান্তিয় ঘোষণা কৰিছিল কেন্দ্ৰীয় বিত্তমন্ত্ৰী নিৰ্মলা সীতাৰমণে৷ ইমানদিন পৰ্যন্ত মুদ্ৰা যোজনাৰ অধীনত সৰ্বোচ্চ ১০ লাখ টকা ঋণ দিছিল কেন্দ্ৰই৷ যি এইবাৰ বৃদ্ধি কৰি ২০লাখ কৰিলে চৰকাৰে৷ বিজ্ঞাপ্তি অনুসৰি মুদ্ৰা যোজনা প্ৰকল্পৰ মূল লক্ষ্য হৈছে অৰ্থহীনসকলৰ হাতত ধন তুলি দিয়া৷ ঋণৰ পৰিমান বৃদ্ধি হোৱাৰ লগে লগেই বহুতেই এই ঋণৰ প্ৰতি আকৃষ্টও হৈছে৷ যিয়ে প্ৰকল্পটোক এক নতুন গতি দিব৷
শুকুৰবাৰে প্ৰকাশিত বিজ্ঞাপণত তৰুণ প্লাছ বুলি এক শিতানো উল্লেখ থকা দেখা গৈছে৷ ইয়াৰ আওঁতাত ২০ লাখ টকা পৰ্যন্ত গ্ৰাহৰে ঋণ ল’ব পাৰিব৷ তৰুণ কেটাগৰীত পূৰ্বে যিসকলে ঋণ লৈছে আৰু সময়ময়ে পৰিশোধ কৰিছে তেওঁলোকেহে ২০লাখৰ বাবে আবেদন কৰিব পাৰিব৷ এই বৰ্ধিত অৰ্থ পাবলৈ পূৰ্বৰ ঋণ পৰিশোধৰ সংশ্লিষ্ট নথি জমা দিব লাগিব৷
চৰকাৰৰ তৰফৰ পৰা জনোৱা অনুসৰি ক্ৰেডিট গেৰাণ্টি ফাণ্ড ফৰ মাইক্ৰো ইউনিটছৰ অধীনত ২০লাখ টকা পৰ্যন্ত এই ঋণৰ কভাৰেজ দিয়া হ’ব৷ এই প্ৰকল্পত অ-কৰ্পোৰেট সৰু ব্যৱসায়ী, মাইক্ৰ এণ্টাৰপ্ৰাইজ, ক্ষুদ্ৰ চাষী বা কৃষিৰ সৈতে জড়িতসকলক এই ঋণ দিয়ে কেন্দ্ৰই৷ ২০১৫ চনৰ ৮ এপ্ৰিলত এই প্ৰকল্পৰ উদ্বোধন কৰিছিল প্ৰধানমন্ত্ৰী নৰেন্দ্ৰ মোদীয়ে৷
বিগত ৯বছৰ ধৰি মুদ্ৰা যোজনাত ঋণৰ অংকৰ কোনো সলনি কৰা নাই কেন্দ্ৰই৷ অৱশেষত সেয়া দ্বিগুণ কৰি গ্ৰাহকৰ সংখ্যা বৃদ্ধিহে কৰাৰ পৰিকল্পনা লৈছে কেন্দ্ৰই৷ এই ঋণ দিয়াৰ ক্ষেত্ৰত আছে মুঠ ৪টা কেটাগৰী৷ সেইসমূহ হৈছে শিশু, কিশোৰ, তৰুণ আৰু তৰুণ প্লাছ৷
শিশু কেটেগৰীত গ্ৰাহকে ৫০হাজাৰ টকা পৰ্যন্ত ঋণ পায়৷ ৫০ হাজাৰৰ পৰা ৫লাখ পৰ্যন্ত ঋণ দিয়া হয় কিশোৰ কেটেগৰীত৷ তৰুণ বিভাগত ৫ৰ পৰা ১০ পৰ্যন্ত ঋণ দিয়া হয়৷ আৰু তৰুণ প্লাছত এইবাৰৰ পৰা ২০লাখকৈ ঋণ দিয়াৰ সিদ্ধান্ত লৈছে চৰকাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
