এইবাৰ আন এখন চৰকাৰৰ চমক, প্ৰতিটো পৰিয়াললৈ ১০ লাখ টকাৰ স্বাস্থ্য বীমা
বিহাৰ মুখ্যমন্ত্ৰী নীতিশ কুমাৰৰ আজি ঘোষণা কৰা চৰকাৰী চাকৰিত মহিলাৰ বাবে ৩৫ শতাংশ সংৰক্ষণৰ আঁচনিৰ পাছতে এইবাৰ আন এখন চৰকাৰৰ বৃহৎ ঘোষণা। এইবাৰ এই চৰকাৰে ৰাজ্যৰ প্ৰতিটো পৰিয়ালক দিব ১০ লাখ টকাৰ স্বাস্থ্য বীমা।
পঞ্জাৱৰ আম আদমি পাৰ্টি চৰকাৰে লৈছে এই বৃহৎ সিদ্ধান্ত। চৰকাৰে প্ৰতিটো পৰিয়ালৰ বাবে বাৰ্ষিক ১০ লাখ টকাৰ নগদবিহীন স্বাস্থ্য বীমা প্ৰদান কৰাৰ কথা ঘোষণা কৰিছে, যাৰ ফলত ৰাজ্যৰ ৬৫ লাখ পৰিয়াল উপকৃত হ’ব। এই নগদবিহীন বীমা আঁচনিৰ কথা ঘোষণা কৰে মুখ্যমন্ত্ৰী ভগৱন্ত মান আৰু অৰবিন্দ কেজৰিৱালে।
চৰকাৰী আৰু বেচৰকাৰী চিকিৎসালয়ত প্ৰতিটো ৰোগৰ চিকিৎসা বিনামূলীয়া হ’ব বুলি চৰকাৰে কয়। চৰকাৰী কৰ্মচাৰী, অংগনবাড়ী, আশা কৰ্মীও এই বীমাত ১০০ শতাংশ সামৰি লোৱা হ’ব। তিনিমাহৰ ভিতৰত কাৰ্যকৰী হ’ব এই আঁচনি।
পঞ্জাৱৰ মুখ্যমন্ত্ৰী ভগৱন্ত মানে কয়, আমি ‘মুখ্যমন্ত্ৰী স্বাস্থ্য আঁচনি’ আৰম্ভ কৰিবলৈ ওলাইছো, এই আঁচনিৰ অধীনত প্ৰতিটো পৰিয়ালে প্ৰতি বছৰে ১০ লাখ টকা পৰ্যন্ত বিনামূলীয়া আৰু ভাল চিকিৎসা লাভ কৰিব।
পঞ্জাৱৰ মুখ্যমন্ত্ৰীয়ে এটা পোষ্টত লিখিছে, ‘মুখ্যমন্ত্ৰী সেহত যোজনা’ই পঞ্জাৱৰ প্ৰায় ৩ কোটি জনসংখ্যাক সামৰি ল’ব। চৰকাৰী কৰ্মচাৰী আৰু পেঞ্চনাৰকে ধৰি ৰাজ্যৰ স্থায়ী বাসিন্দাক প্ৰদান কৰা হ’ব এমএমএছৱাই হেল্থ কাৰ্ড। এই কাৰ্ডেৰে সকলো চৰকাৰী আৰু বেচৰকাৰী চিকিৎসালয়ত বিনামূলীয়া আৰু নগদবিহীন চিকিৎসাৰ ব্যৱস্থা কৰা হ’ব। পঞ্জাৱক স্বাস্থ্যৰ ক্ষেত্ৰত উত্তম সুবিধা প্ৰদান কৰাটো আমাৰ দায়িত্ব, যিটো আমি সম্পূৰ্ণ নিষ্ঠা আৰু দায়বদ্ধতাৰে পালন কৰি আছো।
এই উপলক্ষে আম আদমি পাৰ্টিৰ মুৰব্বী অৰবিন্দ কেজৰিৱালে কয় যে, পঞ্জাৱৰ মুখ্যমন্ত্ৰী সেহাত যোজনাৰ অধীনত ৰাজ্যৰ প্ৰতিটো পৰিয়ালে প্ৰতি বছৰে ১০ লাখ টকা পৰ্যন্ত বিনামূলীয়া চিকিৎসা লাভ কৰিব। আম আদমি পাৰ্টিৰ দুটা ডাঙৰ অগ্ৰাধিকাৰ হ’ল শিক্ষা আৰু স্বাস্থ্য কাৰণ প্ৰতিজন দৰিদ্ৰ লোকে ভাল শিক্ষা আৰু সুচিকিৎসাৰ সুবিধা নোপোৱালৈকে কোনো দেশেই আগবাঢ়িব নোৱাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
