তামিলনাডুৰ সমুদ্ৰ উপকূলত ভাঁহি উঠিছে দৈত্যাকাৰ এক মাছ, এই প্ৰাণী সমুদ্ৰৰ পৰা উঠি অহা মানেই প্ৰাকৃতিক বিপৰ্যয়ৰ ইংগিত নেকি?

তামিলনাডুৰ সমুদ্ৰ উপকূলত ভাহি উঠিল এক বিৰল সামুদ্ৰিক প্ৰাণী ‘ডুমছডে ফিছ’৷ প্ৰায় ৩০ ফুট দীঘল এই অতিকায় মাছটোক লৈ চাঞ্চল্য বিয়পি পৰিছে সমগ্ৰ উপকূলবৰ্তী অঞ্চলত৷ স্থানীয় লোকে প্ৰথমে মাছটো দেখা পায় তাৰপিছতেই কোনোৱে ভিডিঅ’ কৰি সেই মাছৰ ছবি ভাইৰেল কৰিছে সামাজিক মাধ্যমত৷ ঘটনাটোক প্ৰায়সংখ্যকেই প্ৰাকৃতিক বিপৰ্যয়ৰ পূৰ্বাভাস হিচাপে কৈছে৷

ডুমছডে ফিছ নামেৰে পৰিচিত এই মাছৰ প্ৰকৃত নাম ওৰফিছ৷ বৈজ্ঞানিক নাম Regalecus glesne, ই পৃথিৱীৰ দীৰ্ঘতম মাছ বুলিও পৰিচিত৷ সাধাৰণতে এই মাছ সমুদ্ৰৰ গভীৰত প্ৰায় ১ হাজাৰ মিটাৰ তলত বসবাস কৰে৷ ৰূপালী ৰঙৰ দেহ আৰু ৰঙা পাংখা বিশিষ্ট এই মাছ খুব কমেইহে পানীৰ উপৰিভাগলৈ উঠি আহে৷

জাপান আৰু পূৰ্ব এছিয়াৰ বহু সংস্কৃতিত ওৰফিছক ভূমিকম্প বা ছুনামীৰ দৰে দুৰ্যোগৰ পূৰ্বাভাস হিচাপে ধৰা হয়৷ ২০১১ চনৰ জাপান ছুনামীৰ পূৰ্বে উপকূলত একাধিক ওৰফিছ উঠি আহিছিল, সেই স্মৃতি এতিয়াও বহুতৰে মনত উজ্জ্বল৷ ফলত তামিলনাডুৰ এই সাম্প্ৰতিক ঘটনাৰ পাছতেই প্রশ্ন উঠিছে, আকৌ কি কোনো ডাঙৰ প্ৰাকৃতিক বিপৰ্যয় আসন্ন নেকি?

বিজ্ঞানীয়ে এতিয়াও এনে কোনো সিদ্ধান্ত লোৱা নাই৷ সমুদ্ৰজগতৰ বিশেষজ্ঞৰ মতে, ওৰফিছ গভীৰ সমুদ্ৰৰ পৰিবৰ্তিত পৰিবেশ, পানীৰ তাপমাত্ৰা বৃদ্ধি বা নিজৰ অসুস্থতাৰ কাৰণে ওপৰলৈ উঠি আহে৷ ফলত এক বিপৰ্যয়ৰ পূৰ্বাভাস বুলিও বহুতে দাবী কৰিছে৷ এতিয়াও এই তত্ত্ব কিন্তু বৈজ্ঞানিকভাৱে প্ৰমাণিত নহয়৷

বিজ্ঞান আৰু সংস্কাৰৰ দ্বন্দ্বৰ মাজত এই ঘটনাই আমাক এটাই বাৰ্তা দিয়ে যে প্ৰকৃতিৰ প্ৰতি আমাৰ নজৰ আৰু সচেতনতা পূৰ্বতকৈ বঢ়াব লাগে৷ হয়তো এই মাছে কোনো অশনিসংকেত বহন কৰা নাই কিন্তু এই ঘটনাত লুকাই আছে গভীৰ এক ইংগিত৷ প্ৰকৃতিয়ে নিঃশব্দে কিছু ক’ব খুজিছে যি আমি শুনিব পৰা নাই৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ