অসমীয়া চলচ্চিত্ৰ জগতৰ লগতে ৰাজ্যসহ দেশলৈ পুনৰ গৌৰৱ কঢ়িয়াই আনিছে ভেলেজ ৰকষ্টাৰ, বুলবলু কেন ছিং ছবিৰ নিৰ্দেশিকা তথা অসমৰ আন্তঃৰাষ্ট্ৰীয় ছবি পৰিচালিকা ৰীমা দাসে৷
বিশ্বৰ অন্যতম প্ৰসিদ্ধ চলচ্চিত্ৰ মহোৎসৱ টৰণ্ট’ আন্তঃৰাষ্ট্ৰীয় চলচ্চিত্ৰ মহোৎসৱত স্থান লাভ কৰিছে ৰীমা দাসৰ নৱতম ছবি Tora’s Husbandএ৷ ছবিখনে মহোৎসৱখনৰ ৱৰ্ল্ড প্ৰিমিয়াৰত স্থান লাভ কৰি পুনৰ অসমীয়া ছবি জগতলৈ গৌৰৱ কঢ়িয়াই আনিছে৷
উল্লেখ্য যে বিশ্বৰ অন্যতম প্ৰসিদ্ধ তথা শ্ৰেষ্ঠ এই ছবি মহোৎসৱৰ ৱৰ্ল্ড প্ৰিমিয়াৰলৈ বিশ্বৰ বিভিন্ন ভাষাৰ মাত্ৰ ১০ খন ছবিকহে বাছনি কৰা হৈছে। ইয়াৰ ভিতৰত ৰীমা দাসৰ তৰা’জ হাজবেণ্ড (Tora’s Husband) নামৰ ছবিখনেও স্থান লাভ কৰিছে।
এই ১০খন ছবিয়ে বেষ্ট প্লেটফৰ্ম প্ৰাইজৰ যোগ্যতাও অর্জন কৰিছে। এই বঁটাৰ মূল্য ২০,০০০ চিএডি। ১০ খন ছবিৰ ভিতৰত বিচাৰকে বাছনি কৰা শ্ৰেষ্ঠ ছবিখনক এই বঁটা প্ৰদান কৰা হ’ব।
তৰা’জ হাজবেণ্ডএ টৰণ্ট’ আন্তঃৰাষ্ট্ৰীয় চলচ্চিত্ৰ মহোৎসৱত স্থান লাভ কৰাৰ পিছতে উৎফুল্লিত হৈ পৰিছে ছবিখনৰ পৰিচালক-নিৰ্মাতা ৰীমা দাস, কলা-কুশলীসকলৰ লগতে অসমবাসী।
উল্লেখ্য যে ইয়াৰ পূৰ্বে ৰীমা দাসে ভেলেজ ৰকষ্টাৰ আৰু বুলবুল কেন ছিং ছবি নিৰ্মাণেৰে আন্তঃৰাষ্ট্ৰীয় পৰ্যায়ত ভুয়সী প্ৰশংসা লাভ কৰিবলৈ সক্ষম হৈছিল৷
লগতে পঢ়ক পত্নী হত্যাৰ অপৰাধত ১০ বছৰৰ কাৰাবাস স্বামীৰ, এতিয়া জীৱন্ত অৱস্থাত পত্নী উপস্থিত
উক্ত দুয়োখন ছবিয়ে বিশ্বৰ আগশাৰী ছবি মহোৎসৱসমূহত প্ৰদৰ্শিত হোৱাৰ লগতে বঁটা লাভ কৰিবলৈও সক্ষম হৈছিল৷
ভেলেজ ৰকষ্টাৰএ টৰণ্ট’ আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হোৱাৰ লগতে ভাৰতৰ পৰা অস্কাৰলৈ মনোনয় লাভ কৰিছিল৷
ৰীমা দাসৰ নৱতম ছবি তৰা’জ হাছবেণ্ডএ টৰণ্ট’ আন্তঃৰাষ্ট্ৰীয় চলচ্চিত্ৰ মহোৎসৱলৈ নিৰ্বাচিত হোৱাৰ পিছতে অসমীয়া চলচ্চিত্ৰমোদীয়ে উৎফুল্লিত হৈ পৰা দেখা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
