ৰাছিয়াৰ ইউক্ৰেইন আক্ৰমণৰ বিভিন্ন ভিডিঅ’ সামাজিক মাধ্যমত ভাইৰেল হৈছে৷ এটা ভিডিঅ’ত ইউক্ৰেইনৰ এগৰাকী নাগৰিকে ৰাছিয়াৰ এখন চলন্ত টেংক হাতেৰে পিছলৈ ঠেলি ৰখোৱাৰ চেষ্টা কৰিছে৷ আন এটা ভিডিঅ’ত ৰাছিয়ান সৈন্যই এৰি যোৱা টেংক টেক্টৰেৰে টানি নিয়া দেখা গৈছে৷
কিছুমান ভিডিঅ’ত ধ্বংসস্তূপত পৰিণত হোৱা হেলিকপ্টাৰ আৰু টেংকসহ ৰাছিয়াৰ যুদ্ধাস্ত্ৰসমূহ দেখা গৈছে৷ বহু ভিডিঅ’ত ৰাছিয়ান সৈন্যৰ বৰ্বৰতাও দেখা গৈছে৷ কিন্তু তাৰ মাজতে এটা ভিডিঅ’ৱে বিশ্ববাসীৰ মোহাৱদ্ধ কৰি তুলিছে৷
লগতে পঢ়ক ইউক্ৰেইনলৈ আমেৰিকাসহ কোন কোন ৰাষ্ট্ৰই কিমান, কি কি সামৰিক সাহায্য আগবঢ়াইছে?
মাৰ্কিন সংবাদ পত্ৰ ৱাল ষ্ট্ৰীট জাৰ্ণালৰ সৈতে জড়িত এগৰাকী সাংবাদিকে টুইটাৰত শ্বেয়াৰ কৰা এই ভিডিঅ’টোত এগৰাকী আত্মসমৰ্পণ কৰা ৰাছিয়ান সৈনিকক দেখুওৱা হৈছে৷ মেথিউ লাস্কম’ৰে নামৰ সাংবাদিকজনে শ্বেয়াৰ কৰা ভিডিঅ’টোত দেখা গৈছে যে এগৰাকী শত্ৰু সৈন্য অৰ্থাৎ ৰাছিয়ান সৈন্য ইউক্ৰেইনৰ নাগৰিকৰ মাজত আৱদ্ধ হৈ আছে৷
আত্মসৰ্পণ কৰা ৰুছ সেনাগৰাকী ইউক্ৰেইনৰ সাধাৰণ নাগৰিকসকলে খাবলৈ আহাৰ আগবঢ়াইছে৷ তেওঁ সেয়া গ্ৰহণ কৰাৰ পিছতে মোবাইলত কিবা এটা দেখুওৱা দেখা গৈছে৷ মোবাইলটো চাই ৰুছ সেনাগৰাকী হুকহুকাই কন্দা দেখা গৈছে৷
Video shared on Ukrainian channels of a captured Russian soldier apparently being fed by locals. The post says he burst into tears when he was allowed to video-call his mother. So many of these troops are just teenagers, with absolutely no clue what this war is really for. pic.twitter.com/oCPUC8cKcO
— Matthew Luxmoore (@mjluxmoore) March 2, 2022
সাংবাদিকগৰাকীয়ে টুইটত লিখিছে যে ইউক্ৰেইনৰ এগৰাকী কিশোৰীয়ে ৰুছ সেনাগৰাকীক মাতৃৰ সৈতে ভিডিঅ’ কলিং কৰি কথা পতোৱাই দিছিল৷ আৰু নিজ মাতৃক মোবাইলত দেখি ৰুছ সেনাগৰাকীয়ে হুকহুকাই কান্দি উঠিছিল৷
এগৰাকী আক্ৰমণকাৰী সেনাক ইউক্ৰেইনৰ সাধাৰণ নাগৰিকে এইদৰে মানৱীয় আচৰণ কৰা ভিডিঅ’টো ভাইৰেল হোৱাৰ পিছতে সমগ্ৰ বিশ্বতে এতিয়া চৰ্চা লাভ কৰিছে৷ যুদ্ধই দেশৰ নেতাৰ মাজত শত্ৰুতাৰ সৃষ্টি কৰিলেও সাধাৰণ জনতাৰ মনত বৈৰিতা জন্ম যে দিব নোৱাৰে ভিডিঅ’টোৱে যেন তাকেই প্ৰমাণ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
