বিলাসী বাহন ক্ৰয় কৰিবলৈ গৈ এটা নিশাৰ নৈশ যাপনৰ বাবে মহিলা কৰ্মচাৰীক প্ৰস্তাৱ দি বিতৰ্কত সোমাই পৰিছে ডিব্ৰুগড়ৰ অসম চিকিৎসা মহাবিদ্যালয় আৰু চিকিৎসালয়ৰ জ্যেষ্ঠ স্ত্ৰী ৰোগ বিশেষজ্ঞ ডাঃ লিথিংগা লোথাৰ৷
ঘটনাটো যোৱা বৃহস্পতিবাৰে সংঘটিত হৈছিল৷ ঘটনাৰ বিৱৰণীৰ মতে যোৱা বৃহস্পতিবাৰে ডাঃ লোথাৰে ডিব্ৰুগড়ৰ চাউলধোৱাস্থিত বিমল অ’টো নামৰ গাড়ী ডিলাৰটোৰ পৰা এখন বিলাসী বাহন ক্ৰয়ৰ বাবে গৈছিল৷
বাহন ক্ৰয় কৰাৰ পাছতে ডিলাৰ কৰ্মচাৰীসকলৰ সন্মুখতে চিকিৎসক ডাঃ লোথাৰৰ বিৰুদ্ধে এগৰাকী মহিলা কৰ্মচাৰীক অশ্লীল প্ৰস্তাৱ আগবঢ়োৱাৰ অভিযোগ উত্থাপন হৈছে৷ অভিযোগ অনুসৰি ডাঃ লোথাৰে বাহনৰ সৈতে অতিৰিক্ত কি অফাৰ পোৱা যাব বুলি প্ৰশ্ন কৰি এগৰাকী মহিলা কৰ্মচাৰীক এটা নিশা নৈশ যাপনৰ বাবে বিচাৰে৷
লগতে পঢ়ক কঁকালৰ বিষ আৰু শ্লীপ ডিস্কৰ সমস্যা আৰু ইয়াৰ পৰা উপশম পোৱাৰ উপায়
ঘটনাৰ সন্দৰ্ভত মহিলাগৰাকীয়ে এটা ফেচবুক পোষ্ট দিয়াৰ পাছতে সমগ্ৰ ঘটনাটো সংবাদ মাধ্যমৰ পোহৰলৈ আহে৷ ইয়াৰ পাছতে ডিলাৰ কৰ্তৃপক্ষই ডাঃ লোথাৰক বাহনখন বিক্ৰী নকৰি চেকখন ওভতাই দিয়া হ’ব বুলি প্ৰকাশ কৰি ডিলাৰলৈ মাতি পঠিয়াই যদিও প্ৰথমাৱস্থাত ডঃ লোথাই নিজৰ চালকজনকহে প্ৰেৰণ কৰে৷
অৱশেষত চিকিৎসক ডাঃ লোথাই পত্নীসহ ডিলাৰখনত উপস্থিত হৈ ক্ষমা খুজিবলৈ ৰাজী হৈছিল যদিও দুটা চৰ্ত আৰোপ কৰে৷ ডাঃ লোথাই মহিলাগৰাকীক ক্ষমা খোজাৰ সময়ত কোনো লোকে ভিডিঅ’ ৰেকৰ্ডিং কৰিব নোৱাৰিব আৰু তেওঁ জেনেৰেল মেনেজাৰৰ কক্ষতহে ক্ষমা খুজিব বুলি চৰ্ত আৰোপ কৰে৷ এই চৰ্তকলৈ পুনৰ দুয়োপক্ষৰ মাজত বিবাদৰ সৃষ্টি হয় আৰু ডাঃ লোথাই মহিলাগৰাকীক ক্ষমা ভিক্ষা নকৰাকৈ ডিলাৰৰ পৰা ওলাই যায়৷
লগতে পঢ়ক চাৰে তিনি বছৰ ধৰি দুই নাবালিকা ছাত্ৰীক ধৰ্ষণ! লিংয়াত মঠৰ বিশিষ্ট সাধুক গ্ৰেপ্তাৰ আৰক্ষীৰ
ডাঃ লোথাই ক্ষমা নুখুজি ওলাই যোৱাৰ পিছতে অভিযোগ উত্থাপন কৰা মহিলাগৰাকীয়ে ঘটনা সংক্রান্তত ডিব্ৰুগড় সদৰ আৰক্ষী থানাত এজাহাৰ দাখিল কৰে আৰু আৰক্ষীয়ে ৫১৭/২২ নম্বৰত গোচৰ ৰুজু কৰি তদন্ত অব্যাহত ৰাখিছে।
ইফালে জানিব পৰা মতে, এই মহিলা কৰ্মচাৰীগৰাকীৰ বিৰুদ্ধে প্রতি-গোচৰ ৰুজু কৰিছে চিকিৎসক লিথিংগা লোথাই। ডাঃ লোথাৰ মতে এয়া তেওঁৰ বিৰুদ্ধে ষড়যন্ত্ৰ৷ মহিলাগৰাকীয়ে তেওঁৰ পৰা বৃহৎ অংকৰৰ ধন সৰকোৱাৰ পাং পাতি ব্লেকমেইল কৰাৰহে অভিযোগ উত্থাপন কৰিছে ডাঃ লোথাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
