শ্বাহৰুখ খানক ধমকি দিয়া লোকৰ উদ্দেশ্য আছিল অন্যহে, পোহৰলৈ সকলো
বলীউডৰ অভিনেতা শ্বাহৰুখ খানক হত্যাৰ ভাবুকি দিয়াৰ লগতে ৫০ লাখ টকা মুক্তিপণৰ দাবীৰ ঘটনাত এক চাঞ্চল্যকৰ তথ্য পোহৰলৈ আহিছে। আৰক্ষী সূত্ৰই জনোৱা মতে, বান্দ্ৰা আৰক্ষীৰ তদন্তত ৰায়পুৰৰ পৰা গ্ৰেপ্তাৰ হোৱা অভিযুক্ত অধিবক্তা ফৈজান খানে কেৱল অভিনেতা শ্বাহৰুখ খানকেই নহয়, পুত্ৰৰ ওপৰতো দৃষ্টি ৰাখিছিল।
ফৈজান খানে শ্বাহৰুখৰ লগতে তেখেতৰ পুত্ৰ আৰিয়ান খানৰো নিৰাপত্তাৰ বাবে নিয়োজিত জোৱানৰ সকলো তথ্য আহৰণ কৰা বুলি জানিব পৰা গৈছে।
এজন বিষয়াই জনোৱা মতে, অভিযুক্তই অনলাইন চাৰ্চ কৰি শ্বাহৰুখৰ নিৰাপত্তা আৰু পুত্ৰ আৰিয়ানৰ সম্পৰ্কে বহু তথ্য সংগ্ৰহ কৰিছিল। অভিযুক্তৰ হাতত থকা দ্বিতীয়টো মোবাইল ফোনত যেতিয়া ভালদৰে পৰীক্ষা কৰা হয়, তেতিয়া ইয়াৰ ইণ্টাৰনেটৰ ইতিহাসত একেই কথা পোহৰলৈ আহে।
সূত্ৰই লগতে দাবী কৰিছে যে অভিযুক্তৰ মোবাইল ফোনৰ পৰা শ্বাহৰুখৰ নিৰাপত্তা আৰু পুত্ৰ আৰিয়ানৰ বিষয়ে অনলাইন চাৰ্চ হিষ্ট্ৰী উদ্ধাৰ কৰিছে যদিও অভিযুক্তই কিয় এই তথ্য সংগ্ৰহ কৰিছে বুলি সোধাত অভিযুক্তই এই বিষয়ে অস্বীকাৰ কৰে।
বান্দ্ৰা আৰক্ষীয়ে জনোৱা মতে, অভিযুক্তই ইণ্টাৰনেটৰ পৰা বান্দ্ৰা থানাৰ লেণ্ডলাইন নম্বৰ উলিয়াইছিল আৰু তাৰ পিছত তেওঁ ফোন যোগে ভাবুকি দিছিল।
বান্দ্ৰা আৰক্ষীৰ তদন্তত এইটোও প্ৰকাশ পাইছে যে অভিযুক্তই শ্বাহৰুখক ভাবুকি দিবলৈ ব্যৱহাৰ কৰা মোবাইলটো এসপ্তাহ আগতে ক্ৰয় কৰা হৈছিল অৰ্থাৎ ৩০ অক্টোবৰত অভিযুক্ত ফৈজান নিজেই এই মোবাইলটো ক্ৰয় কৰিছিল আৰু তেওঁ পুৰণি চিম কাৰ্ড ব্যৱহাৰ কৰিছিল।
২ নৱেম্বৰত মোবাইল চুৰিৰ এজাহাৰ দাখিল কৰিছিল যদিও মোবাইল নম্বৰ চুইচ অফ কৰা নাছিল। বান্দ্ৰা আৰক্ষীৰ তদন্ত অনুসৰি যদি মোবাইলটো চুৰি হ’লহেঁতেন তেন্তে চুৰি কৰা ব্যক্তিয়ে চিমৰ কৰ্ড সলনি কৰি আন এখন চিম লগাই দিলেহেঁতেন, কিন্তু এই ক্ষেত্ৰত এনে একো হোৱা নাই।
আৰক্ষীৰ সন্দেহ যে অভিযুক্তই নিজেই অপৰাধত ব্যৱহৃত মোবাইল ফোনটো ক’ৰবাত লুকুৱাই ৰাখিছে বুলি আৰক্ষীৰ তদন্তত প্ৰকাশ পাইছে যে অভিযুক্তই এই ভাবুকি দিয়াৰ পূৰ্বে পৰিকল্পনা যুগুত কৰিছিল আৰু সেই অনুসৰি সম্পন্ন কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
