কাহিনীৰ দৰে কথাবোৰ৷ আৰম্ভণি ডেষ্টিনেছন ৱেডিঙৰ পৰাই হৈছিল৷ বিয়া নহয় ৱেডিং, কাৰণ তাত দেখা গৈছিল সম্পূৰ্ণ ৱেষ্টাৰ্ণ কালচাৰ৷ ৱাইন সলাই আৰম্ভ হৈছিল প্ৰাক বিবাহৰ পৰা বিবাহৰ অনুষ্ঠান৷ চলিছিল মেহেন্দি, হালধিকে ধৰি কেইবাটাও অনুষ্ঠান৷ হতবাক অসমীয়া, হতবাক কেইদিনমান আগলৈকে চিনেমাত নৃত্য শিকাবলৈ মতা পৰিচালকো৷ ক’ত কেনেকৈ চুমিৰ হাতত পৰিল আলাদ্দিনৰ চাকি? ঠিকেই ভাৱিছে, কাহিনী আপোনাৰ মোৰ চিনাকি কৰিঅ’গ্ৰাফাৰ চুমি বৰাৰেই৷ আমাৰ সপোন বুলি কোৱা সেই ডেষ্টিনেছন ৱেডিং মনত আছেনে? সেই চুমিকেই বিচাৰি ফুৰিছে আৰক্ষীয়ে৷ পাতি লোৱা ভায়েকক ধৰি এইবাৰ আৰক্ষীয়ে বিচাৰিছে বায়েকক৷
পাতি লোৱা ভায়েক বিশাল ফুকনক গ্ৰেপ্তাৰ কৰাৰ পিছতে অন্তৰ্ধান অভিনেত্ৰী-কৰিঅ’গ্ৰাফাৰ চুমি বৰা। ম’বাইল অফ কৰি আত্মগোপন কৰিছে চুমি বৰাই। প্ৰৱঞ্চনাৰে কোটি কোটি টকাৰ মালিক হোৱা বিশাল ফুকনৰ সৈতে চুমি বৰাৰ নাম সাঙোৰ খোৱাৰ পিছতে এতিয়া বহু প্ৰশ্নৰ উদয় হৈছে ৰাইজৰ মনত।
চুমি বৰাৰ বিয়া আকৌ চৰ্চালৈ আহিছে৷ কেনেকৈ চুমি বৰাই উদয়পুৰত ৰাজকীয় ডেষ্টিনেচন ৱেডিং পাতিছিল তাৰ কিছু আঁত বিচাৰিছে পাইছে বহুতেই। অভিযোগ অনুসৰি, চুমী বৰাৰ বিয়াত পানীৰ দৰে ধন খৰচ কৰিছিল বিশালে।
বিয়াত বিমানৰ ভাড়াৰ নামতে খৰচ কৰিছিল ৬৭ লাখ টকা৷ গুৱাহাটীৰ পৰা বিমানেৰে দিল্লী হৈ জয়পুৰলৈ উৰা মাৰিছিল চুমিৰ আত্মীয়৷ বিয়াৰ বাবে মানুহ কঢ়িয়াইছিল বিমানেৰে৷ বহুলোকে চুমিৰ জহতেই প্ৰথম বিমানতো উঠিছিল৷ উদয়পুৰ পেলেচত অনুষ্ঠিত হৈছিল চুমী বৰাৰ ৰাজকীয় বিবাহৰ অনুষ্ঠান। বলীউডৰ নামী-দামী তাৰকাই সততে বিয়াৰ আয়োজন কৰা এই স্থানতে হৈছিল চুমি বৰাৰ বিয়াৰ অনুষ্ঠান।
উদয়পুৰ পেলেচত বিয়া পাতিবলৈকে লাগে প্ৰায় ডেৰ কোটি টকা চুমি সঁচায়ে ধনী মানুহ৷ সেই পেলেচত ধন খৰচ কৰাতেই সীমাবদ্ধ নহয়৷ চুমি বৰাৰ বিয়ালৈ যোৱা প্ৰতিজন লোকক বিমানবন্দৰৰ পৰা অনা-নিয়াৰ লগতে ৰাজস্থানৰ বিভিন্ন স্থান ভ্ৰমণো কৰাইছিল৷ বিয়াৰ সমস্ত দায়িত্ব দিয়া হৈছিল এটা এজেন্সিক৷ বহুতেই বিয়াখন দেখি সমালোচনা কৰিলেও একাংশই কৈছিল
টকা আছে বাবে পাতিছে সমালোচনা কিয়? ৰহস্যৰ গোন্ধ পালেও উহ বিচৰা নাছিল কোনোৱে৷ বিয়াই শেষ কথা নহয়, অলংকাৰো কোটি টকাৰ লৈছিল চুমিয়ে৷ বিয়াৰ বাবে চুমি বৰাই ক্ৰয় কৰিছিল ডেৰ কোটি টকাৰ হীৰাৰ গহণা। গুৱাহাটীৰ জুৱেলাৰীৰ পৰাই চুমিয়ে বিয়াৰ বাবে গহণা ক্ৰয় কৰিছিল। বহুতৰে ধাৰণা সেই খৰচো বিশালৰেই আছিল!
তথ্য অনুসৰি, চুমী বৰাৰ এই ডেষ্টিনেচন ৱেডিঙত খৰচ হৈছিল প্ৰায় ১৮ৰ পৰা ২২ কোটি টকা। যি খৰচ বহন কৰিছিল পাতি লোৱা ভায়েক বিশাল ফুকনে। নিজে বিলাসী জীৱন কটোৱা বিশালে চুমী বৰাৰ বাবেও খৰচ কৰিছিল কোটি কোটি টকা। তথ্য অনুসৰি, বিশালে চুমিক উপহাৰ দিছিল দুটাকৈ ফ্লেট।
কাহিনী কিন্তু ইয়াতেই শেষ হোৱা নাই৷ বিয়াৰ পিছতে চুমী বৰাই উৰা মাৰিছিল ডুবাইলৈ৷ অসমৰ ইতিহাসৰ আটাইতকৈ বিলাসবহুল ছবিৰ চুক্তিৰ বাবে চুমি গৈছিল৷ বুৰ্জ খালিফাৰ ৭ লাখ টকীয়া বিলাসবহুল কোঠাত হৈছিল চুক্তি৷ কোনো নাম-গোন্ধ নোহোৱা ছবিৰ চুক্তি কি কোনেও নাজানে?
বুৰ্জ খালিফাৰ কোঠাও বুকিং কৰি দিছিল পাতি লোৱা ভায়েক বিশাল ফুকনেই। এতিয়া প্ৰশ্ন উঠিছে। উঠিবই। কাৰণ অসমৰ সাংস্কৃতিক জগতৰ সৈতে জড়িত অভিনেতা-অভিনেত্ৰী বা আন কলা-কুশলীয়ে কিমান উপাৰ্জন কৰে সেয়া ৰাইজে জানে৷ অসমৰ নামজ্বলা অভিনেতা-অভিনেত্ৰীসকলেও আজি পৰ্যন্ত এনেধৰণৰ ৰাজকীয় বিয়া পতা দেখা নাই। মাত্ৰ কিছুদিন পূৰ্বে কেৰিয়াৰ আৰম্ভ কৰা চুমি বৰাই ক’ত পাইছিল ইমান ধন? এতিয়া ৰাইজে বাট চাইছে, আৰক্ষীৰ তদন্ততহে পোহৰলৈ আহিব সমস্ত ঘটনা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
