মধ্য প্ৰদেশৰ জলোৰ এগৰাকী দলিত ছাত্ৰক উচ্চ বৰ্ণৰ শিক্ষকে প্ৰহাৰ কৰি হত্যা কৰাৰ ঘটনাৰ চাঞ্চল্যৰ মাৰ নৌযাওঁতেই দেশত পুনৰ একাধিক তদ্ৰূপ কাণ্ড সংঘটিত হোৱাৰ খবৰ সংবাদ মাধ্যমত প্ৰকাশ পাইছে৷
এইবাৰ ৰাজস্থানৰ বালমৌত সংঘটিত হৈছে তদ্ৰূপ এক ঘটনা৷ এগৰাকী শিক্ষকে পৰীক্ষালৈ কিছু পলমকৈ অহাৰ বাবেই এগৰাকী দলিত ছাত্ৰক অতি বৰ্বৰভাৱে প্ৰহাৰ কৰিছে৷ ছাত্ৰগৰাকীক সংকটজনক অৱস্থাত স্থানীয় চিকিৎসালয়ত ভৰ্তি কৰোৱা হৈছে৷
কোটৱাল আৰক্ষী বিষয়া গংগাৰামে প্ৰকাশ কৰা ঘটনাৰ বিৱৰণীৰ মতে সপ্তম শ্ৰেণীৰ দলিত ছাত্ৰ কৃষ্ণই পৰীক্ষাৰ সময়ত কিছু পলমকৈ উপস্থিত হোৱাৰ বাবেই অশোক মালিক নামৰ শিক্ষকগৰাকীয়ে বৰ্বৰভাৱে প্ৰহাৰ কৰে৷ শিক্ষকৰ প্ৰহাৰত গুৰুতৰভাৱে আহত হোৱা ছাত্ৰগৰাকীক ততাতৈয়াকৈ চিকিৎসালয়ত ভৰ্তি কৰোৱা হয়৷
লগতে পঢ়ক যুৱ সাহিত্যিক প্ৰদ্যুম্ন কুমাৰ গগৈলৈ ২০২২ বৰ্ষৰ সাহিত্য অকাডেমিৰ যুৱ পুৰস্কাৰ
ঘটনা সন্দৰ্ভত তথ্য লাভ কৰাৰ পিছতে শিশুটিৰ পৰিয়ালৰ লোক আৰু দলিত নেতাসকলে জিলা চিকিৎসালয়ত উপস্থিত হয়। পৰিয়ালৰ লোকে আৰক্ষী বিষয়াক সাক্ষাৎ কৰি শিক্ষকগৰাকীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে। ইয়াৰ পিছতে আৰক্ষীয়ে অভিযুক্ত শিক্ষক অশোক মালিক থানালৈ লৈ যায়।
কোটৱাল আৰক্ষী থানাৰ SHO গংগাৰামে জনোৱা মতে, শিশুটিৰ পৰিয়ালৰ ৰিপৰ্টৰ ভিত্তিত তদন্তৰ গোচৰটো তদন্ত কৰি শিক্ষকগৰাকীৰ বিৰুদ্ধে ব্যৱস্থা গ্ৰহণ কৰা হ’ব। সমান্তৰালভাৱে শিক্ষা বিভাগেও ঘটনা সংক্ৰান্ত তদন্ত আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
