গাড়ী আৰু ভূমি নাই উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ৷ কিন্তু আছে দুটাকৈ মাৰণাস্ত্ৰ৷ কিন্তু কিমান সম্পত্তিৰগৰাকী উত্তৰ প্ৰদেশৰ মুখ্যমন্ত্ৰী যোগী আদিত্যনাথ?
আগন্তুক উত্তৰ প্ৰদেশ বিধানসভা নিৰ্বাচনত গৌৰখপুৰ নগৰ সমষ্টিৰ প্ৰাৰ্থী হিচাপে দাখিল কৰা শপতনামাত উত্তৰ প্ৰদেশৰ মুখ্যমন্ত্ৰী যোগী আদিত্যনাথে নিজৰ সম্পত্তিৰ তথ্য সন্নিৱিষ্ট কৰিছে৷
উল্লেখ্য যে পাঁচবাৰকৈ গৌৰখপুৰ লোকসভা সমষ্টিৰ পৰা বিজয়ী হোৱা যোগী আদিত্যনাথে গৌৰখপুৰ বিধানসভা সমষ্টিৰ পৰা প্ৰথমবাৰ বিধায়ক হিচাপে প্ৰতিদ্বন্দ্বিতা কৰিছে৷
এগৰাকী প্ৰাৰ্থী হিচাপে যোগী আদিত্যনাথে নিৰ্বাচন আয়োগৰ ওচৰত শপতনামাৰ যোগে নিজৰ সম্পত্তিৰ পৰিমাণ দাখিল কৰিছে৷
শপতমানাত সন্নিৱিষ্ট কৰা অনুসৰি যোগী আদিত্যনাথৰ স্বাৱৰ আৰু অস্থাৱৰ সম্পত্তিৰ পৰিমাণ হৈছে ডেৰ কোটি টকাৰো অধিক৷ শপনামাত উল্লেখ কৰা অনুসৰি যোগীৰ সম্পত্তিৰ মুঠ পৰিমাণ হৈছে ১ কোটি ৫৪ লাখ ৯৪ হাজাৰ ৫৪ টকা৷
নগদ এক লাখ টকা ৰখা যোগীৰ ছটা বেংক একাউণ্টত জমা আছে ধন৷ দিল্লী ষ্টেট বেংকৰ পাৰ্লিয়ামেন্ট শাখাত ২৫ লাখ, ৯৯ হাজাৰ ১৭১ টকা, গৌৰখপুৰৰ গৌৰখনাথ শাখাৰ পঞ্জাৱ নেশ্যনেল বেংকত ৪ লাখ ৩২ হাজাৰ, ৭৫১ টকা, লক্ষ্ণৌৰ বিধানসভা মাৰ্গৰ ষ্টেট বেংক শাখাত ৬৭ লাখ, ৮৬ হাজাৰ ৩৯৫ টকা আৰু গোৰখপুৰ ষ্টেট বেংক শাখাত ৭ হাজাৰ ৯০৮ টকা জমা আছে৷
আনহাতে, দুটা ফিক্সড ডেপ’জিটৰ এটাত ৮ লাখ আৰু আনটো ৭ লাখ টকাৰো কিছু বেছি ধন আছে যোগীৰ৷ ইফালে ডাকঘৰৰ দুটা একাউণ্টৰ লক্ষ্ণৌ দিল্লীৰ পাৰ্লিয়ামেন্ট ডাকঘৰত নেচশ্যনেল ছেভিংকছ প্ৰকল্পত জমা আছে ৩৬ লাখ টকাৰো অধিক ধন৷ আনটো গৌৰখপুৰ গৌৰখনাথ শাখাৰ ডাকঘৰত কিষাণ বিকাশ পত্ৰ প্ৰকল্পৰ শিতানত জমা আছে ২ লাখ ৩৩ হাজাৰ টকা৷
উত্তৰ প্ৰদেশৰ মুখ্যমন্ত্ৰীগৰাকীৰ এখনো বাহন আৰু ভূমি নাই৷ কিন্তু ২০১৭ চনত উত্তৰ প্ৰদেশৰ মুখ্যমন্ত্ৰীগৰাকীয়ে ৯৬ লাখ সম্পত্তিৰ সৈতে দুখন এচ ইউ ভি বাহন থকা বুলিও উল্লেখ কৰিছিল৷
আনহাতে যোগীৰ দুপাত গহনা আছে৷ ১০ গ্ৰামৰ এডাল সোণৰ চেইনৰ মূল্য হৈছে ২৬ হাজাৰ টকা আৰু ২০ গ্ৰামৰ কাণত পিন্ধা এটা সোণৰ ৰিং যাৰ মূল্য ৪৯ হাজাৰ টকা৷
যোগীৰ ভূমি নাই আৰু যোৱা তিনিটা বছৰত যোগীৰ বাৰ্ষিক আয় ক্ৰমাৎ হ্ৰাসহে পাইছে৷
যোগীৰ ভূমি-গাড়ী নাথাকিলেও নিজৰ সৈতে আছে দুটাকৈ মাৰণাস্ত্ৰ৷ ইয়াৰে এটা হৈছে ১ লাখ টকা মূল্যৰ ৰিভলভাৰ আৰু আনটো হৈছে ৮০ হাজাৰ টকা মূল্যৰ ৰাইফল৷
ইয়াৰ পিছতে বিভিন্নজনে প্ৰশ্ন কৰিছে নিজকে ফকীৰ বুলি জাহিৰ কৰা যোগী আদিত্যনাথক দুটাকৈ মাৰণাস্ত্ৰৰ কিয় প্ৰয়োজন হ’ল?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
