টেষ্টত ১৪ বছৰীয়া ‘বিৰাট’ যাত্ৰাৰ অন্ত, ৰোহিতৰ পাছত টেষ্ট ক্ৰিকেটক বিদায় বিৰাটৰ
১৪ বছৰীয়া বিৰাট যাত্ৰাৰ অন্ত পেলাই টেষ্ট ক্ৰিকেটৰ পৰা বিদায় বিৰাট কোহলীৰ। ভাৰতীয় ক্ৰিকেটাৰ বিৰাট কোহলীয়ে আনুষ্ঠানিকভাৱে ঘোষণা কৰিলে টেষ্ট ক্ৰিকেটৰ পৰা অৱসৰ লোৱাৰ কথা। কোহলীয়ে ২০২৫ চনৰ ১২ মে’ সোমবাৰে পুৱা ১১:৪৩ বজাত ছ’চিয়েল মিডিয়াত এটা পোষ্টৰ জৰিয়তে টেষ্ট ক্ৰিকেটৰ পৰা অৱসৰ লোৱাৰ বিষয়ে অৱগত কৰে।
বিৰাট কোহলীয়ে টেষ্ট জাৰ্চি পিন্ধা ফটো শ্বেয়াৰ কৰি লিখিছে, “টেষ্ট ক্ৰিকেটত প্ৰথমবাৰৰ বাবে বেগী নীলা জাৰ্চি পিন্ধা আজি ১৪ বছৰ হ’ল। সঁচা কথা ক’বলৈ গ’লে মই কেতিয়াও কল্পনা কৰা নাছিলো যে এই ফৰ্মেটে মোক কেনে যাত্ৰালৈ লৈ যাব। ই মোক পৰীক্ষা কৰিছিল, গঢ় দিছিল আৰু শিকাইছিল যিবোৰ মই আজীৱন লগত লৈ যাম।”
টেষ্ট ক্ৰিকেটে মোক আশা কৰাতকৈ বেছি দিছে বুলিও উল্লেখ কৰে বিৰাট কোহলিয়ে।
কোহলীয়ে আৰু লিখিছে, “বগা জাৰ্চি পিন্ধি খেলাটো এটা অতি ব্যক্তিগত অভিজ্ঞতা। নিৰৱ কঠোৰ পৰিশ্ৰম, দীঘলীয়া দিন, সৰু সৰু মুহূৰ্ত যিবোৰ কোনেও দেখা নাপায় কিন্তু যিবোৰ আপোনাৰ লগত চিৰদিনৰ বাবে থাকে। যেতিয়া মই এই ফৰ্মেটৰ পৰা আঁতৰি আহিছো, তেতিয়া ই সহজ নহয়, কিন্তু ই সঠিক অনুভৱ হয়। মই ইয়াত মোৰ সকলোখিনি দিছো আৰু ই মোক আশা কৰাতকৈও অধিক দিছে।”
টেষ্ট ক্ৰিকেটৰ পৰা অৱসৰৰ কথা ঘোষণা কৰাৰ সময়তে বিৰাট কোহলীয়ে লগতে কয় যে তেওঁ নিজৰ কেৰিয়াৰলৈ উভতি চাব বিচাৰিব হাঁহিমুখে। কিন্তু, ক’ৰবাত তেওঁ নিজৰ সপোনত জীয়াই থাকিব নোৱাৰাৰ বাবে নিশ্চয় অনুশোচনা কৰিব। বিৰাট কোহলীৰ সেই সপোন তেওঁৰ ১০,০০০ টেষ্ট ৰাণৰ সৈতে জড়িত, যিটো সম্পূৰ্ণ নকৰাকৈয়ে তেওঁ এই ফৰ্মেটৰ পৰা বিদায় লয়। সপোন আধৰুৱা হৈয়ে ৰৈ যায় বিৰাটৰ।
১৪ বছৰীয়া টেষ্ট ক্ৰিকেট কেৰিয়াৰত বিৰাট কোহলীয়ে ১২৩খন টেষ্ট খেলিছিল, য’ত তেওঁ ২১০ ইনিংছত গড়ে ৪৬.৮৫ ৰান কৰি ৯২৩০ ৰান সংগ্ৰহ কৰিছিল। অৰ্থাৎ বিৰাট কোহলী ১০ হাজাৰ টেষ্ট ৰানৰ সপোনৰ পৰা ৭৭০ ৰান দূৰত থাকি যায়। বিৰাট কোহলীৰ টেষ্ট শতক আৰু অৰ্ধশতকৰ সংখ্যা প্ৰায় সমান হৈয়েই থাকিল। টেষ্টত তেওঁ ৩০টা শতক আৰু ৩১টা অৰ্ধশতক অৰ্জন কৰিছে।
উল্লেখ্য যে, ২০১১ চনৰ ২০ জুনত ৱেষ্ট ইণ্ডিজৰ বিৰুদ্ধে টেষ্টত অভিষেক মেচ খেলিছিল বিৰাট কোহলিয়ে প্ৰথম ইনিংছত ৪ ৰান আৰু দ্বিতীয় ইনিংছত ১৫ ৰান সংগ্ৰহ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
