২০০৯ চনত উত্তৰপ্ৰদেশৰ ৮০খন লোকসভা আসনৰ মাজত মাত্ৰ ১০খন আসন লাভেৰে আৰম্ভ হৈছিল বিজেপিৰ যাত্ৰা। তাৰপিছত সেই ৰাজ্যত বিজেপিৰ উত্থান আৰু উত্থান। মোদী ছুনামীত ২০১৪ চনত ৭১ আসনত জয়লাভ কৰিছিল গেৰুৱা শিৱিৰে। তাৰপিছত ২০১৯ৰ লোকসভা নিৰ্বাচনত ৬২আসন লাভ কৰিছিল বিজেপি দলে। ৰাম মন্দিৰ নিৰ্মাণেৰে বিজেপিয়ে এইবাৰ আশা কৰিছিল ৮০ৰ ভিতৰত ৮০খন আসনেই বিজেপিৰ হাতলৈ আহিব।
কিন্তু কাৰ্যত উত্তৰপ্ৰদেশৰ সমাজবাদী পাৰ্টীৰ ঢাক্কাত ভাঙি পৰিল মোদী-যোগীৰ ডাবল ইঞ্জিনৰ চৰকাৰ। ২৩খন আসনত জয়ী সমাজবাদী পাৰ্টী ইয়াৰোপৰি অন্য ১৪খনতো আগুৱাই আছে সমাজবাদী পাৰ্টী। সকলো মিলি মুঠ ৩৭খন আসন জয়ৰ সম্ভাৱনা নিশ্চিত সমাজবাদী পাৰ্টীৰ। কংগ্ৰেছেও আগুৱাই আছে ৬খন আসনত। আনফালে উত্তৰপ্ৰদেশত বিজেপিয়ে ২২খন আসনতেই থমকি ৰব লগা হৈছে। আগুৱাই আছে অন্য ১১ আসনত। মুঠ ৩৩ খন আসনতহে বিজেপি আগুৱাই আছে। ৰামমন্দিৰৰ দৰে উপহাৰ দিয়াৰ পাছতো কত কি ভুলৰ বাবে থমকি ৰব লগা হল বিজেপি দল?
বিশ্লেষকৰ মতে মোদীৰ ৪০০পাৰ শ্লোগানেই বিজেপিক এই ঢাক্কা দিলে। এই শ্লোগানেই ক্ষতি কৰিছে বিজেপি দলক। বহুতেই ধাৰণা কৰি ললে যে ৪০০পাৰ হলেই দেশৰ সংবিধান সলনি হৈ পৰিব। ইফালে বিৰোধীয়েও এই প্ৰচাৰেই চলাইছিল যে এন ডি এ ৪০০তকৈ বেছি আসন পালে সংবিধান সংশোধন কৰি সংৰক্ষণ বাতিল কৰি পেলাব। এই প্ৰচাৰেই অনগ্ৰসৰ শ্ৰেণী, দলিত আৰু সংখ্যালঘূৰ মাজত বিজেপি প্ৰীতি কমাই দিলে।
বুথ সমীক্ষাত লাভ কৰা তথ্য অনুসৰি উত্তৰপ্ৰদেশৰ ৮০খন আসনৰ মাজত ৬০খনতকৈ বেছি আসন বিজেপিয়ে লাভ কৰিব বুলি দাবী কৰা হৈছিল। বিজেপিৰ লক্ষ্য যদিও ৮০ আছিল কিন্তু সমীক্ষাই ৬০খনমানহে আসন দিছিল এন ডি এক। ৰাম মন্দিৰ নিৰ্মাণৰ পাছত উত্তৰপ্ৰদেশৰ মানুহে নিৰ্বাচনত দুহাত তুলি আশীৰ্বাদ দিলেও ভোট কিন্তু নিদিলে বিজেপি দলক। ৰাম কেৱল ধৰ্মীয় বিশ্বাস, ৰামক ৰাজনীতিলৈ টানি অনাৰ পক্ষপাতী নহল উত্তৰপ্ৰদেশৰ জনতা। আনকি যি স্থানত ৰাম মন্দিৰ নিৰ্মাণ কৰা হৈছে সেই ফৈজাবাদ সমষ্টিটো বিজেপিৰ প্ৰাৰ্থী পৰাস্ত হয়।
ইয়াৰোপৰি দেশৰ জিডিপি বৃদ্ধিৰ পৰিপেক্ষিতত বৰ্তমান বিশ্বৰ পঞ্চম অৰ্থনীতিৰ দেশ ভাৰত। কিন্তু বাস্তৱত মানুহে দেখিছে যে গেছ চিলিণ্ডাৰ, নিত্য প্ৰয়োজনীয় সামগ্ৰীৰ দাম বাঢ়িব ধৰিছে। এই মূল্যবৃদ্ধিৰ বিৰুদ্ধে লেথাৰিকৈ প্ৰচাৰো কৰিছে বিৰোধীয়ে। সেই প্ৰচাৰেও বিজেপিক হৰুওৱাত সহায় কৰিছে বুলি দাবী কৰিছে বিশ্লেষকে।
এই নিৰ্বাচনত বিৰোধীৰ অস্ত্ৰ আছিল কৰ্মসংস্থাপনহীনতা। ১০বছৰত এনডিএ চৰকাৰে নিবনুৱা দূৰ কৰিব নোৱাৰিলে। মোদী চৰকাৰে সাধাৰণ মানুহক চাকৰি প্ৰদানৰ নামত আভূৱা ভৰাৰ কথাও বিৰোধীয়ে প্ৰচাৰ চলাইছিল। মোদীৰ একনিষ্ঠ ভোটাৰৰ মাজত আছে মহিলাসকল। কিন্তু এইবাৰৰ নিৰ্বাচনত দৰিদ্ৰ মহিলাসকলক কংগ্ৰেছে প্ৰতি মাহত ৮৫০০ টকা আৰু প্ৰতি বছৰে ১লাখ টকা দিয়াৰ প্ৰতিশ্ৰুতি দিছে। ৰাহুল গান্ধীয়ে উত্তৰ প্ৰদেশৰ জনসভাসমূহত এই প্ৰতিশ্ৰুতি দিছে। সম্ভৱত উত্তৰপ্ৰদেশ বিজেপিয়ে ৰাহুলৰ এই প্ৰচাৰ সভাৰ বাবেই ভোট হেৰুওৱাইছে বুলি দাবী কৰিছে বিশেষজ্ঞই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
