চিনেমা মুক্তিৰ বাবে বলীউডত শুকুৰবাৰ, দক্ষিণত বৃহস্পতিবাৰ কিয়! কেতিয়াৰ পৰা আৰম্ভ হ’ল এই নিয়ম?
বলীউডৰ চিনেমা বেছিভাগেই শুকুৰবাৰে মুক্তি পায় আৰু বৃহস্পতিবাৰক দক্ষিণৰ চিনেমাৰ বাবে নিৰ্বাচিত কৰা হয়। পাছে কিয় গোটেই সপ্তাহটোত ছবিখনৰ মুক্তিৰ বাবে কেৱল এই দুটা দিন কিয় বাছি লোৱা হ’ল?
শুকুৰবাৰে ছবিএখন মুক্তি পোৱা নিয়মটো প্ৰথমে হলিউডত ১৯৪০ চনৰ পৰা আৰম্ভ হৈছিল। ভাৰততো বলীউডৰ ছবি মুক্তিৰ বাবে এই দিনটো নিৰ্বাচন কৰা হয়।
লগতে চলচ্চিত্ৰ নিৰ্মাতাসকলে শুকুৰবাৰ বাছি লোৱাৰ এটা ডাঙৰ কাৰণ হ’ল এই দিনটোক দেৱী লক্ষ্মীৰ দিন বুলি গণ্য কৰা হয়। শুকুৰবাৰৰ পৰা আৰম্ভ কৰা কামে ধন-সম্পত্তি আৰু সফলতা কঢ়িয়াই আনে বুলি বিশ্বাস কৰা হয়, সেইবাবেই ছবি নিৰ্মাতাসকলে শুকুৰবাৰৰ পৰাই নিজৰ ছবি আৰম্ভ কৰাটো শুভ বুলি গণ্য কৰে।
শুকুৰবাৰে এখন ছবি মুক্তিৰ আটাইতকৈ ব্যৱহাৰিক কাৰণটো হ’ল এইটো সপ্তাহৰ শেষ কৰ্মদিন। ইয়াৰ পিছত শনিবাৰ আৰু দেওবাৰৰ বন্ধ থাকে, যাৰ বাবে মানুহে পৰিয়াল আৰু বন্ধু-বান্ধৱীৰ সৈতে চিনেমা উপভোগ কৰিবলৈ যায়। যাৰ ফলত ছবি খনৰ মুক্তিৰ প্ৰথমটো সপ্তাহতে টকাৰ সংগ্ৰহ বহুত হৈ পৰে, যিটো ছবিখনৰ প্ৰাৰম্ভিক সফলতাৰ পৰিমাপ হৈ পৰে।
শুকুৰবাৰে হলিউডত ছবি মুক্তিৰ ধাৰাটো ক্ৰমান্বয়ে ভাৰততো জনপ্ৰিয় হৈ উঠিল। ১৯৬০ চনত ভাৰতত মুক্তি পোৱা মোগল-ই-আজমে শুকুৰবাৰে মুক্তি পোৱাৰ পাছতে বিপুল সফলতা লাভ কৰিছিল। তেতিয়াৰ পৰাই এই দিনটো ছবি মুক্তিৰ বাবে স্বীকৃতি লাভ কৰে।
আনহাতে দক্ষিণ ভাৰতীয় চলচ্চিত্ৰ জগতত বৃহস্পতিবাৰক ছবি মুক্তিৰ দিন বুলি গণ্য কৰা হয়। ইয়াৰ কাৰণ হৈছে ধৰ্মীয় আৰু জ্যোতিষীয় বিশ্বাস। বৃহস্পতিবাৰক ভগৱান বিষ্ণু আৰু গুৰু গ্ৰহ বৃহস্পতিৰ দিন বুলি গণ্য কৰা হয়, যিটো দিনক শুভ আৰু ভাগ্যৱান দিন হিচাপে দেখা যায়। এই কাৰণেই দক্ষিণত বৃহস্পতিবাৰে ছবি মুক্তিৰ পৰম্পৰা আছে।
প্ৰথম অৱস্থাত ভাৰতত চিনেমাৰ বাবে কোনো নিৰ্দিষ্ট দিন নাছিল। কিন্তু আজিৰ সময়ত যিকোনো ছবিৰ সফলতাৰ প্ৰথম মাপকাঠি হ’ল প্ৰথম সপ্তাহৰ সংগ্ৰহ।
অৱশ্যে উৎসৱ বা ৰাষ্ট্ৰীয় বন্ধৰ দিনক কেন্দ্ৰ কৰি ছবি মুক্তিৰ ধাৰাও সলনি হোৱা দেখা যায়। উদাহৰণস্বৰূপে দীপাৱলী, ঈদ বা খ্ৰীষ্টমাছত মুক্তি পোৱা ছবিয়ে বক্স অফিচত আলোড়নৰ সৃষ্টি কৰে, কিন্তু সাধাৰণ মুক্তিৰ কথা ক’লে বলীউডত শুকুৰবাৰ আৰু দক্ষিণত বৃহস্পতিবাৰক অগ্ৰাধিকাৰ দিয়া হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
