নৰেন্দ্ৰ মোদীৰ তৃতীয় মন্ত্ৰীসভাত কমিল মহিলা সদস্যৰ সংখ্যা৷ পূৰ্বে মোদী মন্ত্ৰীসভাত মহিলাৰ সংখ্যা আছিল ১০গৰাকী৷ দেওবাৰে সন্ধীয় গঠিত হোৱা নতুন মন্ত্ৰীসভাত সদস্য হিচাপে শপত লৈছে ৭গৰাকী মহিলা সাংসদে৷ এই মন্ত্ৰীসভাত বাদ পৰিছে স্মৃতি ইৰাণীসহ কেইবাগৰাকীও গুৰুত্বপূৰ্ণ মহিলা৷

বিজেপিৰ নেতৃত্বাধীন এন ডি এ চৰকাৰ গঢ়িলেও লোকসভাত এইবাৰ নিৰংকুশ সংখ্যাগৰিষ্ঠতা লাভ নকৰিলে মোদীৰ দলে৷ সেয়ে মন্ত্ৰীত্বৰ ক্ষেত্ৰত সহযোগী দলৰ চাহিদাও পূৰণ কৰিব লগা হৈছে মোদীয়ে৷ এইবাৰ মোদীয়ে বাদ দিব লগা হৈছে নিজৰ দলৰ বহুকেইজন গুৰুত্বপূৰ্ণ সদস্যক৷ দেওবাৰে সন্ধিয়া ৰাষ্ট্ৰপতি ভৱনত প্ৰধানমন্ত্ৰী হিচাপে শপতগ্ৰহণ কৰিছে মোদীয়ে৷ তেওঁৰ সৈতে শপত লৈছে মুঠ ৭১গৰাকী মন্ত্ৰীয়ে৷ মোদীৰ এই নতুন মন্ত্ৰীসভাত মুঠ ৩০গৰাকী পূৰ্ণমন্ত্ৰী আছে৷ বাকী ৪১ গৰাকী হৈছে উপমন্ত্ৰী বা প্ৰতিমন্ত্ৰী৷

নিৰ্মলা সীতাৰমণ বিজেপিৰ ৰাজ্যসভাৰ সাংসদ৷ সেয়ে লোকসভা নিৰ্বাচন খেলা নাই নিৰ্মলাই৷ পূৰ্বৰ মন্ত্ৰীসভাত তেওঁ বিত্তমন্ত্ৰীৰ দায়িত্বত আছিল৷ দেওবাৰে তেওঁ আকৌ মন্ত্ৰী হিচাপে শপত লৈছে৷ অৱশ্যে এইবাৰ কি দপ্তৰত আছে সেই কথা এতিয়াও জানিব পৰা হোৱা নাই৷ লেথাৰিকৈ ৩বাৰ তেওঁ মোদী মন্ত্ৰীসভাৰ সদস্য হৈছে৷ ইয়াৰোপৰি অন্নপূৰ্ণ দেৱী, লেথাৰিকৈ ৩বাৰ মোদী মন্ত্ৰীসভাত মন্ত্ৰিত্ব লাভ কৰা মহিলা সাংসদ৷ অন্নপূৰ্ণা দেৱী ঝাৰখণ্ডৰ এগৰাকী শক্তিশালী কৰ্মী৷ তেওঁ অবিচি সম্প্ৰদায়ৰ নেত্ৰী৷ ঝাৰখণ্ড আৰু অবিভক্ত বিহাৰৰ মন্ত্ৰী আছিল তেওঁ৷ ইয়াৰ পূৰ্বে তেওঁ আৰজেডিৰ সৈতে যুক্ত আছিল৷ ঝাৰখণ্ডৰ বিজেপিৰ সাংগঠনিক কামকাজত তেওঁৰ সক্ৰিয়তা যথেষ্ট বেছি৷

মধ্যপ্ৰদেশৰ আদিবাসী নেত্ৰী সাবিত্ৰী ঠাকুৰ৷ মোদী মন্ত্ৰীসভাত প্ৰতিমন্ত্ৰী হিচাপে শপত লৈছে সাবিত্ৰীয়ে৷ এইবাৰ নিৰ্বাচনত তেওঁ ধাৰ কেন্দ্ৰৰ পৰা বিজেপিৰ হৈ জয়ী হৈছে৷ তাৰপিছতেই মোদী মন্ত্ৰীসভাত আছে নিমুবেন বাস্তুনিয়া৷ গুজৰাটৰ ভাৱনগৰ কেন্দ্ৰৰ পৰা এইবাৰ লোকসভা নিৰ্বাচনত জয়ী হৈ মোদী মন্ত্ৰীসভাত আসন লাভ কৰিছে নিমুবেনে৷ ২০১৩ৰ পৰা ২০২১ চন পৰ্যন্ত তেওঁ গুজৰাট বিজেপিৰ মহিলা মৰ্চাৰ দায়িত্বত আছিল৷ দেওবাৰে প্ৰতিমন্ত্ৰী হিচাপে শপত লৈছে এইগৰাকী নিমুবেনে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ