দীৰ্ঘ প্ৰতীক্ষাৰ অৱসান৷ নতুন মুখ্যমন্ত্ৰী লাভ কৰিলে মণিপুৰে৷ মুখ্যমন্ত্ৰী হ’ব BJP নেতা যুমনাম খেমচান্দ সিং৷ মঙ্গলবাৰে দিল্লীত বিজেপিৰ পৰিষদীয় দলৰ বৈঠকত তেওঁকেই নেতা হিচাপে বাচি লোৱা হৈছে৷ ইয়াৰ ফলত ৰাজ্যত প্ৰায় ১ বছৰ ধৰি চলা ৰাষ্ট্ৰপতি শাসনৰ অৱসান ঘটিব৷
২০২৫ চনৰ ১৩ ফেব্ৰুৱাৰীৰ পৰা মণিপুৰত ৰাষ্ট্ৰপতি শাসন জাৰি আছিল৷ ৰাজনৈতিক অস্থিৰতা আৰু প্ৰশাসনিক সংকটৰ জোৰত নিৰ্বাচিত এন বীৰেণ সিঙৰ চৰকাৰ ভাঙি দিছিল কেন্দ্রই৷ অৱশেষত দিল্লীৰ কেন্দ্ৰীয় নেতৃত্বৰ সেউজ সংকেত লাভ কৰি চৰকাৰ গঠনৰ কুচকাৱাচ আৰম্ভ কৰিছে বিজেপিয়ে৷
এই সিদ্ধান্তক স্বাগত জনাই বিজেপি বিধায়ক থোকচম ৰাধেশ্যাম সিঙে কৈছে, ‘জনগণৰ নিৰ্বাচিত চৰকাৰ আকৌ গঠন হোৱাটো জৰুৰী আছিল৷ কেন্দ্ৰীয় নেতৃত্বৰ নিৰ্দেশত আৰু খেমচান্দ সিঙৰ নেতৃত্বত আমি মণিপুৰৰ সমস্ত সমস্যাৰ সমাধান কৰিম৷
কোন এই যুমনাং খেমচান্দ সিং?
সিংজামেয়ি বিধানসভাই কেন্দ্ৰৰ পৰা ২০১৭ আৰু ২০২২ চনৰ পাছত দুবাৰ জয়ী হৈছিল খেমচান্দ সিং৷ মণিপুৰ বিধানসভাৰ স্পিকাৰ হিচাপে সফলভাৱে দায়িত্ব পালনৰ ওপৰিও এন বীৰেন সিং চৰকাৰৰ মন্ত্ৰীসভাত শিক্ষা, গ্ৰামোন্নয়ন আৰু আৱাসন দপ্তৰৰ দৰে গুৰুত্বপূৰ্ণ মন্ত্ৰণালয়ৰ দায়িত্বত আছিল তেওঁ৷ এই ৰাজনীতিবিদৰ কান্ধতেই এইবাৰ মণিপুৰৰ শান্তি আৰু স্থিতাবস্থা উভতাই অনাৰ গুৰুদায়িত্ব দিলে পদ্মশিৱিৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
