অসম লাইভ২৪ঃ গোৱালপাৰাৰ বিজেপি নেত্ৰী জোনালী নাথৰ মৃত্যুৱে জোকাৰিছে ৰাজ্য৷ ঘটনাৰ লগে লগেই আৰক্ষীয়ে সমগ্ৰ ঘটনাৰ তাৎক্ষণিক তদন্তও কৰিছে৷ তাৰপিছতো এইবাৰ আকৌ ন্যায় বিচাৰি ওলাইছে জোনালী নাথৰ কন্যা আৰু স্বামী৷ আৰক্ষীৰ তদন্তত সন্তুষ্ঠ হোৱা নাই জোনালীৰ পৰিয়াল৷ জোনালীক হত্যা কৰাৰ পাছতেই পৰিয়ালটোকো আকৌ এবাৰ হত্যা কৰা হৈছে বুলি অভিযোগ জোনালীৰ কন্যা আৰু স্বামীৰ৷ কান্দি কান্দি জোনালীৰ স্বামী আৰু কন্যাৰ মুখ্যমন্ত্ৰীলৈ আহ্বান৷
জোনালীৰ কন্যাই কয়, ‘প্ৰেমিক-প্ৰেমিকা এইবোৰ কথা সঁচা নহয়৷ আৰক্ষীয়ে ভুল ইনভেষ্টিগেছন কৰিছে৷ এয়া হ’বই নোৱাৰে৷ মায়ে মোক জন্ম দিছে৷ পাপাৰ সৈতে মাৰ ২৭ বছৰীয়া সংসাৰ৷ পাপাই এইবোৰ শুনি কান্দি কান্দি পাগল হৈছে৷ জোনালী নাথৰ মৃত্যুক লৈ আৰক্ষী বিভাগে দিয়া ৰিপৰ্টক লৈ ক্ষোভিত হৈ পৰিছে জোনালী নাথৰ কন্যা আৰু স্বামী। জোনালী নাথৰ মৃত্যু হ’ল, মৃত্যুৰ পাছতেই তেওঁৰ ওপৰত মিছা অপবাদ দিয়া হৈছে বুলি মন্তব্য কৰিছে জোনালীৰ স্বামীয়েও।
জোনালীৰ স্বামীয়ে কয়, ‘হত্যাকাৰীক গ্ৰেপ্তাৰ কৰিল ভালপাইছো৷ আইজিপিয়ে দিয়া মিছা অপবাদ মই মানিব নোৱাৰো৷ জোনালীকেই নহয় এই কথাই আমাকো মাৰি পেলালে৷ জোনালী আৰু মোৰ ২৭ বছৰীয়া সংসাৰ৷ হত্যাকাৰীয়ে ক’লেই সকলো কথা মানি ল’ব নেকি? ছোৱালী হোষ্টেলত থাকে, তাই কেনেকৈ হোষ্টেললৈ যাব? মুখ্যমন্ত্ৰী মহোদয়ে কিবা এটা কৰক৷ আমাক চিবিআই তদন্ত লাগে৷
উল্লেখ্য যে বুধবাৰে জোনালী নাথৰ স্বামীয়ে CIDৰ IGP দেৱৰাজ উপাধ্যায়ৰ বিৰুদ্ধে এজাহাৰ দাখিল কৰিছে৷ জোনালী নাথৰ হত্যাৰ পাছতেই হত্যাকাৰী হাছানুৰে দুয়োৰে মাজত প্ৰেমৰ সম্পৰ্ক থকা বুলি আৰক্ষীৰ ওচৰত স্বীকাৰ কৰিছিল৷ হত্যাকাৰী হাছানুৰৰ স্বীকাৰোক্তিৰ ভিত্তিতেই আৰক্ষীয়েও সংবাদমেলযোগে এই কথা প্ৰচাৰ কৰিছিল৷ হত্যাকাৰী হাছানুৰে ক’লে বুলিয়েই এই কথা কেনেকৈ সত্য বুলি মানি ল’লে আৰক্ষীয়ে সেই কথাৰ উত্তৰ বিচাৰিছে এতিয়া জোনালীৰ দুৰ্ভগীয়া পৰিয়ালটোৱে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
