অসম লাইভ২৪ঃ প্ৰধানমন্ত্ৰীৰ ‘মন কী বাত’ৰ ১০০ সংখ্যক খণ্ড চোৱাৰ বাবে শিৱসাগৰৰ ঐতিহাসিক ৰংঘৰৰ চৌহদত ব্যাপক প্ৰস্তুতি। সন্ধিয়া ৭ বজাৰ পৰা ডিজিটেল প্ৰজেক্টৰৰ সহায়ত প্ৰত্যক্ষ কৰাৰ ব্যৱস্থা কৰা হৈছে প্ৰধানমন্ত্ৰীৰ ‘মন কি বাত’ৰ।
ভাৰত চৰকাৰৰ সাংস্কৃতিক মন্ত্ৰণালয়ৰ উদ্যোগত তথা পুৰাতত্ব বিভাগৰ সহযোগত ৰংঘৰত বিশেষ আয়োজন কৰা হৈছে। দেশৰ মুঠ ১৩টা প্ৰাচীন কীৰ্তিচিহ্নৰ চৌহদত ‘মন কী বাত’ৰ অনুষ্ঠান প্ৰত্যক্ষ কৰাৰ ব্যৱস্থা গ্ৰহণ কৰা হৈছে। তাৰ ভিতৰত আছে ৰংঘৰৰ চৌহদো।
ইপিনে ঐতিহাসিক ৰংঘৰক নিশা প্ৰজেক্টৰৰ সহায়ত দিয়া হৈছে নতুন ৰূপ। ৰং–বিৰঙী আলোকসজ্জা দেখা গৈছে ৰংঘৰত। যাক লৈ এতিয়া সৃষ্টি হৈছে মিশ্ৰিত প্ৰতিক্ৰিয়াৰ। কোনোৱে যদি শলাগিছে, কোনোৱে কৰিছে সমালোচনা। এনেধৰণৰ আলোকসজ্জাৰে ৰংঘৰক বিকৃত ৰূপ দিয়া বুলিও অভিযোগ কৰিছে একাংশই।
ইপিনে সমষ্টিৰ বিধায়ক অখিল গগৈয়ে এই সন্দৰ্ভত দিয়া ফেচবুক প’ষ্টত লিখিছে, ‘ৰংঘৰত এইবোৰ কিয়? মই আজি শিৱসাগৰত নাই। কিন্তু বহুজনে ফোন কৰি আৰু ৱাটচএপত জনাইছে যে কাইলৈ প্ৰধান মন্ত্ৰী ডাঙৰীয়াৰ “মন কী বাত” কাৰ্যসূচীৰ বাবে ৰংঘৰ চৌহদত কিছু নিৰ্মাণ গঢ়ি তোলা হৈছে আৰু প্ৰজেক্টৰৰ জৰিয়তে ৰংঘৰটোত ধৰ্মীয় চিহ্নৰ প্ৰতিফলন ঘটোৱা হৈছে। সকলোৱে এই কাণ্ড আপত্তিজনক বুলি মোক অভিযোগ দিছে। মই নিজ চকুৰে দেখা নাই; কিন্তু ৰংঘৰৰ দৰে জাতীয় সম্পদ এটাত চৰকাৰে জাতিৰ স্বাভিমানত আঘাত পৰা কোনো কাম নকৰা ভাল। মই সংশ্লিষ্ট সকলো পক্ষক জাতিৰ স্বাভিমানত হাত নিদিবলৈ আহ্বান জনালো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ