বুধবাৰে ভয়ংকৰ ভূমিকম্পত পূব আফগানিস্তানসহ পাকিস্তানৰ সীমান্তৱৰ্তী এলেকা কঁপি উঠিল। আফগানিস্তানত উৎপত্তি হোৱা ভয়ংকৰ ভূমিকম্পটোৱে চুবুৰীয়া দেশ পাকিস্তানৰো ক্ষতিগ্ৰস্ত কৰিছে।
ৰিখটাৰ স্কেলৰ ৭.১ প্ৰাৱল্যৰ ভূমিকম্পটোৰ ফলত আফগানিস্তানত অতি কমেও ১০০০ লোকৰ মৃত্যু হোৱা বুলি দেশখনৰ ডিজাষ্টাৰ ৰেচপন্স ফ’ৰ্চে প্ৰকাশ কৰিছে। আনহাতে আহত হৈছে ১৫ শৰো অধিক লোক।
ভূকম্পত বিধ্বস্ত হোৱা অঞ্চলসমূহত উদ্ধাৰ অভিযান আৰম্ভ হৈছে। আহতসকলক উদ্ধাৰ কৰি চিকিৎসালয়ত ভৰ্তি কৰোৱা হৈছে।
লগতে পঢ়ক আমাজনৰ পৰা ডিৰাকলৈ সম্পদ লুণ্ঠনৰ একেই কাহিনী…
তালিবান প্ৰশাসনৰ সূত্ৰই প্ৰকাশ কৰা অনুসৰি আফগানিস্তানৰ পাকটিকা প্ৰদেশত আটাইতকৈ অধিক লোকৰ মৃত্যু হৈছে। প্ৰদেশখনত মৃত্যু হোৱা লোকৰ সংখ্যা শতাধিক। আহত লোকৰ সংখ্যা দুশ পঞ্চাশৰো অধিক। এই তথ্য দিছে তালিবান প্ৰশাসনৰ দুৰ্যোগ ব্যৱস্থাপনা কাৰ্যালয়ৰ মুৰব্বী মহম্মদ নাছিম হাক্কানীয়ে।
তালিবান প্ৰশাসনৰ সূত্ৰই প্ৰকাশ কৰা অনুসৰি নাংগাৰহাৰ আৰু খোষ্ট অঞ্চলতো এই ভূমিকম্পত কমেও ১৫ জন লোকৰ মৃত্যু হয়।
আমেৰিকাৰ জিঅ’লজিকেল চাৰ্ভেই প্ৰকাশ কৰা অনুসৰি বুধবাৰে পুৱা দক্ষিণ-পূব আফগান চহৰ খোষ্টৰ পৰা ৪৪ কিলোমিটাৰ দূৰত্বত এই ভূমিকম্পটোৰ অভিকেন্দ্ৰ আছিল। পৃথিৱীৰ ভূপৃষ্ঠৰ পৰা ৫১ কিলোমিটাৰ ভূগৰ্ভত ইয়াৰ উৎপত্তি বুলি জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
