তাঞ্জানিয়াত হোৱা প্ৰচণ্ড বৰষুণৰ ফলত ১৫৫ জন নিহত, ক্ষতিগ্ৰস্ত ২০ হাজাৰৰো অধিক লোক
যোৱা কেইসপ্তাহমানৰ পৰা তাঞ্জানিয়াত হোৱা প্ৰচণ্ড বৰষুণৰ ফলত ভয়াৱহ বানপানীৰ সৃষ্টি হৈছে। এই পৰ্যন্ত বানপানী আৰু ভূমিস্খলনৰ ফলত ১৫৫ জন লোকে প্ৰাণ হেৰুৱাইছে।
প্ৰচণ্ড বৰষুণৰ বাবে বৰ্তমানৰ পৰিস্থিতিৰ প্ৰতি লক্ষ্য ৰাখি তাঞ্জানিয়াৰ প্ৰধানমন্ত্ৰী কাছিম মাজালিৱাই ইয়াৰ বাবে এল নিনো জলবায়ুৰ আৰ্হিক দোষাৰোপ কৰিছে। তাঞ্জানিয়াত হোৱা প্ৰবল বৰষুণৰ ফলত পথ, দলং আৰু ৰেলপথৰ ব্যাপক ক্ষতিসাধন হৈছে।
প্ৰধানমন্ত্ৰী মাজালিৱাই কয় যে, “এল নিনোৰ প্ৰচণ্ড বৰষুণৰ লগতে ধুমুহাই দেশৰ বিভিন্ন ঠাইত বানপানী আৰু ভূমিস্খলনৰ সৃষ্টি কৰিছে। ইয়াৰ ফলত বহু ক্ষতি হৈছে।” বৰষুণৰ বিধ্বংসী প্ৰভাৱৰ বাবে তেওঁ অস্থায়ী কৃষি পদ্ধতিক জগৰীয়া কৰে। এই অস্থায়ী কৃষি পদ্ধতিসমূহৰ ভিতৰত শস্য কাটি জ্বলোৱা, পশুধন অনিয়ন্ত্ৰিতভাৱে চৰা আৰু বনাঞ্চল ধ্বংস আদি অন্যতম।
তাঞ্জানিয়াৰ প্ৰধানমন্ত্ৰীয়ে কয় যে ধাৰাসাৰ বৰষুণৰ ফলত ৫১ হাজাৰ ঘৰ ক্ষতিগ্ৰস্ত হৈছে। ইয়াৰ ফলত ২০ হাজাৰৰো অধিক লোক ক্ষতিগ্ৰস্ত হৈছে। সংবাদ মাধ্যমৰ বাতৰি অনুসৰি বানত আবদ্ধ হৈ থকা লোকসকলক জৰুৰীকালীন সেৱাৰ জৰিয়তে নিৰাপদ স্থানলৈ লৈ যোৱা হৈছে।
বৰ্তমানেও কিছু কিছু ঠাইত বৰষুণ অব্যাহত আছে। যাৰ ফলত পৰিস্থিতি এতিয়াও শাম কটা নাই। উদ্ধাৰ অভিযানো অব্যাহত ৰাখিছে উদ্ধাৰকাৰী দলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
