অতিকে শোকাৱহ, এটা জন্তুৰ প্ৰাণ ৰক্ষা কৰিবলৈ গৈ দুই শিশুসহ প্ৰাণ হেৰুৱালে এটা পৰিয়ালৰে ৫জনে
পুৱাই এক অতিকে শোকাৱহ দুৰ্ঘটনা। এটা নিমাত জন্তুৰ প্ৰাণ ৰক্ষা কৰিবলৈ গৈ নিজেই প্ৰাণ হেৰুৱালে এটা পৰিয়ালে। এই শোকাৱহ পথ দুৰ্ঘটনাটো সংঘটিত হৈছে উত্তৰ প্ৰদেশৰ বৰেলী-ফাৰুখাবাদ ৰাজ্যিক ঘাইপথৰ মদনাপুৰ অঞ্চলত।
ঘটনা সন্দৰ্ভত জানিব পৰা অনুসৰি, এটা জন্তুক বচাবলৈ গৈ বাহনখনে সন্মুখৰ পৰা অহা এখন ট্ৰাকৰ সৈতে প্ৰচণ্ড জোৰে মুখামুখি সংঘৰ্ষ হয়। এই দুৰ্ঘটনাত গাড়ীখনত অহা দুই শিশুসহ পাঁচজন লোকে ঘটনাস্থলীতে প্ৰাণ হেৰুৱায়।
দুৰ্ঘটনাটোত প্ৰাণ হেৰুওৱা ৰিয়াছাত আলী (৪০ বছৰ) কাপোৰৰ ব্যৱসায় কৰিছিল। বুধবাৰে নিশা প্ৰায় ৯ মান বজাত পত্নী আমনা বেগম (৩৮ বছৰ), কন্যা গুড়িয়া (৬ বছৰ), খুশী (১০ বছৰ), পুত্ৰ সুভান (৭ বছৰ)ৰ সৈতে গাড়ীৰে দিল্লীলৈ ৰাওনা হৈছিল। এক বিবাহৰ অনুষ্ঠানত অংশ লোৱাৰ উদ্দেশ্যে গৈছিল পৰিয়ালটো।
নিশা প্ৰায় দহ মান বজাত বৰেলী-ফাৰুখাবাদ পথৰ মদনপুৰ অঞ্চলৰ বৰখেদা জয়পাল গাঁৱৰ ওচৰত হঠাতে ৰাজপথত এটা জন্তু আহি পৰাত, সেই জন্তুক বচাবলৈ চেষ্টা কৰি বাৰেলীৰ পৰা অহা এখন ট্ৰাকৰ সৈতে সংঘৰ্ষ হয় পৰিয়ালটোৰ। সংঘৰ্ষ ইমানেই ভয়ংকৰ আছিল যে পৰিয়ালটো থকা বাহনখন উৰি গৈ টুকুৰা টুকুৰ হৈ পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
