কিছুদিনৰ পৰা LPG চিলিণ্ডাৰৰ নাটনি হোৱা বুলি চৰ্চা চলিছিল। কিন্তু আমেৰিকা-ইৰাণৰ সংঘাতৰ মাজতে কেন্দ্ৰীয় চৰকাৰে দেশখনৰ পেট্ৰ’ল, ডিজেল, ৰন্ধন গেছৰ যোগান সম্পূৰ্ণৰূপে সুৰক্ষিত বুলি নিশ্চিত কৰিছে। চৰকাৰৰ তথ্য অনুসৰি যোৱা কিছুদিনত ঘৰুৱা এল পি জি ৰিফিল বুকিং হ্ৰাস পাইছে। শেহতীয়া তথ্য অনুসৰি দেশত এল পি জি বুকিং প্ৰায় ৭৭ লাখলৈ হ্ৰাস পাইছে, যিটো ১৩ মাৰ্চত ৮৮.৮ লাখ আছিল। অৰ্থাৎ মাত্ৰ দুদিনতে প্ৰায় ১২ লাখ বুকিং হ্ৰাস পাইছে। ইন্ধনৰ যোগান স্বাভাৱিকভাৱে অব্যাহত থকাৰ বাবে চৰকাৰে স্পষ্ট কৰি দিছে যে জনসাধাৰণে আতংকিত হোৱাৰ কোনো প্ৰয়োজন নাই।
চৰকাৰে উল্লেখ কৰে যে, এল পি জি বুকিঙৰ বাবে ডিজিটেল মাধ্যমৰ ব্যৱহাৰ দ্ৰুতগতিত বৃদ্ধি পাইছে। প্ৰায় ৮৭% বুকিং এতিয়া অনলাইন, যিটো পূৰ্বে ৮৪% আছিল। এই বৃদ্ধিৰ ফল হৈছে তেল বিপণন কোম্পানীসমূহে মানুহক ডিজিটেলভাৱে বুকিং কৰিবলৈ উৎসাহিত কৰাৰ পদক্ষেপ। চৰকাৰৰ মতে, দেশৰ সকলো ঘৰুৱা শোধনাগাৰে সম্পূৰ্ণ ক্ষমতাৰে কাম কৰি আছে আৰু ইয়াত পৰ্যাপ্ত খাৰুৱা তেলৰ মজুত আছে।
চৰকাৰে কৈছে যে, ভাৰত পেট্ৰ’ল আৰু ডিজেল উৎপাদনত আগবঢ়া আৰু ঘৰুৱা প্ৰয়োজন পূৰণৰ বাবে এই ইন্ধনসমূহৰ আমদানিৰ প্ৰয়োজন নাই। তেল বিপণন কোম্পানীসমূহেও উল্লেখ কৰিছে যে সমগ্ৰ দেশতে পেট্ৰ’ল পাম্প বা এল পি জি বিতৰকত ইন্ধনৰ নাটনিৰ কোনো খবৰ পোৱা নাই। পেট্ৰ’ল, ডিজেল, এল পি জিৰ যোগান স্বাভাৱিকভাৱে অব্যাহত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
