এটা বছৰ সম্পূৰ্ণ হ’ল হাগ্ৰামা মহিলাৰীৰ বিটিচি পৰিষদৰ! কোকৰাঝাৰৰ বডোফা নগৰত উখল-মাখল পৰিৱেশ। হাগ্ৰামা মহিলাৰীৰ নেতৃত্বত বিটিচি পৰিষদে সম্পূৰ্ণ কৰিলে এবছৰ। বিটিচি পৰিষদৰ প্ৰথম বৰ্ষপূৰ্তিক কেন্দ্ৰ কৰি কোকৰাঝাৰৰ বডোফা নগৰত সৃষ্টি হৈছে উৎসৱমুখৰ পৰিৱেশ। বিটিচি সচিবালয়ৰ প্ৰাংগণত আয়োজন কৰা হৈছে এক আড়ম্বৰপূৰ্ণ অনুষ্ঠান।
প্ৰথম বৰ্ষপূৰ্তি অনুষ্ঠানক লৈ বিটিচি প্ৰশাসনে ব্যাপক প্ৰস্তুতি চলাইছে। এই বিশেষ অনুষ্ঠানত ৰাজ্য চৰকাৰৰ মন্ত্ৰী জয়ন্ত মল্লবৰুৱাৰ লগতে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য (CEM) তুলিৰাম ৰংহাঙো উপস্থিত থাকিব বুলি জানিব পৰা গৈছে। ইয়াৰ উপৰি বিভিন্ন ক্ষেত্ৰৰ বহু বিশিষ্ট ব্যক্তিয়ে অনুষ্ঠানত অংশগ্ৰহণ কৰিব।
মুখ্যমন্ত্ৰীৰ শুভেচ্ছা
বিটিচি পৰিষদৰ প্ৰথম বৰ্ষপূৰ্তি উপলক্ষে মুখ্যমন্ত্ৰীয়ে CEM হাগ্ৰামা মহিলাৰী আৰু বিটিচি পৰিষদলৈ শুভেচ্ছা জ্ঞাপন কৰিছে। পৰিষদৰ আগন্তুক দিনৰ কাম-কাজ অধিক সফল আৰু জনমুখী হোৱাৰ কামনাৰে শুভেচ্ছা জ্ঞাপন কৰা হৈছে।
প্ৰথম বৰ্ষপূৰ্তিৰ এই অনুষ্ঠানক কেৱল উদযাপন হিচাপে নহয়, বিটিচি অঞ্চলৰ উন্নয়নমূলক কাম-কাজৰ পৰ্যালোচনা আৰু ভৱিষ্যৎ পৰিকল্পনাৰ এক গুৰুত্বপূৰ্ণ মঞ্চ হিচাপেও বিবেচনা কৰা হৈছে।
বডোফা উপেন্দ্ৰ নাথ ব্ৰহ্মৰ সমাধিক্ষেত্ৰত শ্ৰদ্ধাঞ্জলি
বৰ্ষপূৰ্তি অনুষ্ঠানৰ অংশ হিচাপে দতমাত থকা বডোফা উপেন্দ্ৰ নাথ ব্ৰহ্মৰ সমাধিক্ষেত্ৰতো শ্ৰদ্ধাঞ্জলি অনুষ্ঠানৰ আয়োজন কৰা হৈছে। CEM হাগ্ৰামা মহিলাৰীৰ লগতে বিটিচিৰ কাৰ্যবাহী সদস্য (EM) আৰু পাৰিষদসকলে বডোফা উপেন্দ্ৰ নাথ ব্ৰহ্মৰ সমাধিক্ষেত্ৰত উপস্থিত হৈ পুষ্পাঞ্জলি অৰ্পণ কৰিব। বডোফা উপেন্দ্ৰ নাথ ব্ৰহ্মৰ অৱদানক স্মৰণ কৰি শ্ৰদ্ধা নিবেদন কৰাৰ লগতে বিটিচি অঞ্চলৰ উন্নয়নৰ বাবে নতুন সংকল্প গ্ৰহণ কৰা হ’ব।
বডোফা নগৰত নতুন নিৰ্মাণকাৰ্যৰ আধাৰশিলা
প্ৰথম বৰ্ষপূৰ্তি উপলক্ষে বডোফা নগৰত কেইবাটাও গুৰুত্বপূৰ্ণ উন্নয়নমূলক কামৰ শুভাৰম্ভ কৰা হ’ব। ইয়াৰ ভিতৰত হেলিপেড আৰু EMসকলৰ আৱাসগৃহৰ আধাৰশিলা স্থাপন অন্যতম। এই প্ৰকল্পসমূহে বিটিচি সচিবালয় আৰু প্ৰশাসনিক ব্যৱস্থাক অধিক শক্তিশালী কৰাৰ লগতে ভৱিষ্যতে প্ৰশাসনিক কাম-কাজ সুচাৰুৰূপে পৰিচালনাত সহায় কৰিব বুলি আশা কৰা হৈছে।
ভূমিহীন পৰিয়ালক মাটিৰ পট্টা, বিতৰণ হ’ব আৰ্থিক সাহায্য
বৰ্ষপূৰ্তিৰ অনুষ্ঠানত বিটিচি চৰকাৰে ভূমিহীন পৰিয়ালৰ বাবেও গুৰুত্বপূৰ্ণ পদক্ষেপ গ্ৰহণ কৰিব। অনুষ্ঠানত ভূমিহীন পৰিয়ালক মাটিৰ পট্টা প্ৰদান কৰাৰ লগতে বিভিন্ন ক্ষেত্ৰত আৰ্থিক সাহায্যৰ চেক বিতৰণ কৰা হ’ব। ইয়াৰ ফলত দীৰ্ঘদিন ধৰি ভূমিৰ অধিকাৰৰ পৰা বঞ্চিত হৈ থকা বহু পৰিয়ালে সকাহ লাভ কৰাৰ সম্ভাৱনা আছে। লগতে আৰ্থিক সাহায্যই প্ৰয়োজনীয় লোকসকলক স্বাৱলম্বী হোৱাৰ ক্ষেত্ৰতো সহায় কৰিব বুলি আশা কৰা হৈছে।
বিটিচি পৰিষদৰ এবছৰ সম্পূৰ্ণ হোৱাৰ উপলক্ষে কোকৰাঝাৰৰ বডোফা নগৰত এতিয়া উৎসৱমুখৰ পৰিৱেশ। আড়ম্বৰপূৰ্ণ অনুষ্ঠানক লৈ প্ৰশাসন আৰু দলীয় কৰ্মীসকলৰ মাজতো ব্যাপক উৎসাহ দেখা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
