সঞ্জয় লীলা ভানচালীৰ পৰিচালনাত নিৰ্মিত কালজয়ী ছবি ‘দেৱদাস’ মুক্তি পোৱাৰ ২৪ বছৰ সম্পূৰ্ণ হৈছে। এই ছুপাৰহিট ছবিখনৰ মুখ্য ভূমিকাত অভিনয় কৰিছিল বলিউডৰ বাদশ্বাহ শ্বাহৰুখ খানে। আনহাতে ছবিখনৰ ‘পাৰো’ৰ চৰিত্ৰটোত অভিনয় কৰিছিল ঐশ্বৰ্য ৰায় আৰু ‘চন্দ্ৰমুখী’ চৰিত্ৰটোত অভিনয় কৰিছিল মাধুৰী দীক্ষিতে। ছবিখনৰ প্ৰতিটো গান এতিয়াও দৰ্শকৰ হৃদয়ত আছে। ২০০২ চনত মুক্তি পোৱা ‘দেৱদাস’ আজিও ভাৰতীয় চলচ্চিত্ৰৰ অন্যতম জনপ্ৰিয় আৰু স্মৰণীয় ছবিৰ ভিতৰত গণ্য কৰা হয়। বিশাল আয়োজন, দৃষ্টিনন্দন ছেট, শক্তিশালী অভিনয় আৰু সুমধুৰ সংগীতে এই ছবিখনক এক বিশেষ স্থান দান কৰিছে।
ঐশ্বৰ্য নে মাধুৰী, কোনে লাভ কৰিছিল বেছি পাৰিশ্ৰমিক?
ছবিখনৰ দুটা মুখ্য চৰিত্ৰত অভিনয় কৰা ঐশ্বৰ্য ৰায় আৰু মাধুৰী দীক্ষিতৰ মাজত কোনে অধিক পাৰিশ্ৰমিক লাভ কৰিছিল জানেনে? এক প্ৰতিবেদন অনুসৰি, ছবিখনত ‘পাৰো’ৰ চৰিত্ৰত অভিনয় কৰাৰ বাবে ঐশ্বৰ্য ৰায়ে প্ৰায় ১.৫ কোটি টকা পাৰিশ্ৰমিক লাভ কৰিছিল। সেই সময়ত এগৰাকী অভিনেত্ৰীৰ বাবে এই পৰিমাণৰ পাৰিশ্ৰমিক যথেষ্ট বেছি বুলি ধৰা হৈছিল। ছবিখনত তেওঁৰ ৰূপ-সৌন্দৰ্য অধিক উজ্জ্বল কৰি তুলিবলৈ কলকাতাৰ পৰা প্ৰায় ৬০০খন শাৰী অনা হৈছিল। আনহাতে, ‘চন্দ্ৰমুখী’ৰ চৰিত্ৰত অভিনয় কৰাৰ বাবে মাধুৰী দীক্ষিতে প্ৰায় ২.৭ৰ পৰা ৩ কোটি টকা পাৰিশ্ৰমিক লাভ কৰিছিল। অৰ্থাৎ পাৰিশ্ৰমিকৰ ক্ষেত্ৰত তেওঁ ঐশ্বৰ্য ৰায়তকৈ বহু আগত আছিল মাধুৰী। ইয়াৰ উপৰিও, ছবিখনত তেওঁ সন্দীপ খোছলাই ডিজাইন কৰা প্ৰায় ১৫ লাখ টকা মূল্যৰ পোছাক পৰিধান কৰিছিল।
শ্বাহৰুখ খানৰ পাৰিশ্ৰমিক কিমান আছিল?
ছবিখনত দেৱদাসৰ মুখ্য চৰিত্ৰত অভিনয় কৰা শ্বাহৰুখ খানে প্ৰায় ৩.৫ কোটি টকা পাৰিশ্ৰমিক লাভ কৰিছিল। আনহাতে, চুন্নীলালৰ চৰিত্ৰত অভিনয় কৰা জেকি শ্ৰফে প্ৰায় ১ কোটি টকা পাৰিশ্ৰমিক হিচাপে লৈছিল। প্ৰতিবেদন অনুসৰি, বাজেটৰ কিছু সমস্যাৰ বাবে কিছুমান শিল্পীয়ে ছবিখনৰ কিছুমান অংশৰ শ্বুটিঙত কোনো পাৰিশ্ৰমিক নোলোৱাকৈও সহযোগিতা আগবঢ়াইছিল, যাতে ছবিখনৰ নিৰ্মাণ সম্পূৰ্ণ কৰিব পৰা যায়।
প্ৰায় ৫০ কোটি টকা বাজেটত নিৰ্মিত ‘দেৱদাস’-এ ভাৰতত প্ৰায় ৪১.৬৭ কোটি টকা আৰু বিশ্বজুৰি প্ৰায় ৯০.৬৩ কোটি টকা আয় কৰিছিল। ছবিখনৰ ভব্য ছেটসমূহেও সেই সময়ত ব্যাপক চৰ্চা লাভ কৰিছিল। কেৱল চন্দ্ৰমুখীৰ কোঠাৰ ছেট নিৰ্মাণতেই প্ৰায় ১২ কোটি টকা ব্যয় কৰা হৈছিল, যাৰ ফলত ‘দেৱদাস’ সেই সময়ৰ অন্যতম ব্যয়বহুল ভাৰতীয় চলচ্চিত্ৰ হিচাপে পৰিচিত হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
