কেন্দ্ৰীয় চৰকাৰৰ কৰ্মচাৰীৰ বাবে ভাল খবৰ, পেঞ্চন পৰিকল্পনাৰ পৰিৱৰ্তন
কেন্দ্ৰীয় কৰ্মচাৰীৰ স্বাৰ্থত কেন্দ্ৰীয় চৰকাৰে লৈছে এটা ডাঙৰ সিদ্ধান্ত। এতিয়া ইউনিফাইড পেঞ্চন আঁচনি (ইউপিএছ) বাছি লোৱা কৰ্মচাৰীসকলেও একেখিনি কৰ সুবিধা লাভ কৰিব যিবোৰ এতিয়ালৈকে কেৱল এনপিএছৰ অধীনতহে উপলব্ধ আছিল।
এতিয়া চৰকাৰে এই বিকল্প বাছনি কৰাৰ সময়সীমা ৩০ জুনৰ পৰা ২০২৫ চনৰ ৩০ ছেপ্টেম্বৰলৈ বৃদ্ধি কৰিছে। বৰ্তমানৰ কৰ্মচাৰীৰ লগতে অৱসৰপ্ৰাপ্ত কৰ্মচাৰী আৰু মৃত পেঞ্চনাৰৰ পত্নীকো এই সময় বৃদ্ধি কৰা হৈছে। বিত্ত মন্ত্ৰালয়ৰ এই পদক্ষেপে কেন্দ্ৰীয় চৰকাৰৰ কৰ্মচাৰীৰ বাবে ইউনিফাইড পেঞ্চন আঁচনি আৰু অধিক উন্নত কৰি তুলিব।
উল্লেখ্য যে চলিত বৰ্ষৰ আৰম্ভণিতে ২০২৫ চনৰ ১ এপ্ৰিলৰ পৰা কেন্দ্ৰীয় চৰকাৰৰ অসামৰিক সেৱাত যোগদান কৰাসকলৰ বাবে এন পি এছৰ অধীনত বিকল্প হিচাপে ইউনিফাইড পেঞ্চন আঁচনি প্ৰৱৰ্তন কৰা হৈছিল। ইউ পি এছৰ অধীনত কৰ্মচাৰীজনৰ মৌলিক দৰমহা আৰু ডিয়াৰনেছ এলাৱেন্সৰ ১৮.৫% কেন্দ্ৰীয় চৰকাৰে বৰঙণি আগবঢ়ায়।
একে সময়তে কৰ্মচাৰীজনে ১০% বৰঙণি আগবঢ়াব লাগিব। এই আঁচনিৰ উদ্দেশ্য হৈছে চৰকাৰী কৰ্মচাৰীসকলক অৱসৰৰ পিছত নিশ্চিত পেঞ্চন প্ৰদান কৰা। যিটো এন পি এছতকৈ অধিক সুস্থিৰ আৰু পৰম্পৰাগত লাভভিত্তিক বুলি গণ্য কৰা হয়।
বৰ্তমান এন পি এছৰ অধীনত সামৰি লোৱা কেন্দ্ৰীয় চৰকাৰৰ কৰ্মচাৰীসকলক ইউ পি এছলৈ যোৱাৰ এককালীন বিকল্প দিয়া হৈছে। কিন্তু এই বিকল্প বাধ্যতামূলক নহয় বৰঞ্চ স্বেচ্ছামূলক।
বিত্ত মন্ত্ৰালয়ৰ মতে, ইউ পি এছ বাছি লোৱা কৰ্মচাৰীসকলে এতিয়া টিডিএছ ৰেহাই আৰু অন্যান্য সকলো কৰ সুবিধাও লাভ কৰিব যিবোৰ এতিয়ালৈকে কেৱল এনপিএছৰ অধীনতহে দিয়া হৈছিল। এই সিদ্ধান্তই দুয়োখন পেঞ্চন আঁচনিৰ মাজত সমতা স্থাপন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
