মানৱেন্দ্ৰ কুমাৰ দাসঃ অসমৰ মুখ্যমন্ত্ৰী ড০ হিমন্ত বিশ্ব শৰ্মা চুবুৰীয়াই ৰাষ্ট্ৰ বাংলাদেশতো এতিয়া আকৰ্ষণৰ কেন্দ্ৰবিন্দু হৈ পৰিছে৷ চুবুৰীয়া ৰাষ্ট্ৰখনৰ প্ৰধানমন্ত্ৰী শ্বেখ হাছিনাই মুকলিকৈ প্ৰশংসা কৰিছে অসমৰ মুখ্যমন্ত্ৰীগৰাকীক৷
উল্লেখযোগ্য যে মুখ্যমন্ত্ৰী ড০ হিমন্ত বিশ্ব শৰ্মাই অসমৰ আন্তঃগাঁথনিৰ উন্নয়ন আৰু কৃষিখণ্ডৰ সংস্কাৰৰ বাবে যি আঁচনি গ্ৰহণ কৰিছে সেই আঁচনিৰ প্ৰতি বাংলাদেশে সহযোগ আগবঢ়াব বিচাৰিছে৷ বিগত সময়ছোৱাত কেপিটেল ইনভেষ্টমেণ্টত অসমৰ অগ্ৰগতিয়ে এক বিশেষ স্থান লাভ কৰিছে৷ পৰিকাঠামো নিৰ্মাণৰ ক্ষেত্ৰতো ৰাজ্য চৰকাৰে গ্ৰহণ কৰা ভূমিকা চুবুৰীয়া ৰাষ্ট্ৰখনৰ দৃষ্টিগোচৰ হৈছে৷
কেৱল সিমানেই নহয়, বাংলাদেশৰ বৈদেশিক পৰিক্ৰমা বিভাগৰ মন্ত্ৰী ড০ আব্দুল মোমিনে অসমৰ আৰ্থ-সামাজিক বিকাশ আৰু কৃষিখণ্ডৰ সংস্কাৰ প্ৰক্ৰিয়াত সমভাগী হ’ব বুলি ঘোষণা কৰিছে৷ বিগত সময়ছোৱাত বাংলাদেশৰ কৃষি আৰু উদ্যোগ খণ্ডৰ বিকাশে বিশ্বৰ সকলো দেশকে চেৰ পেলাইছে৷ অৰ্থনৈতিক বিকাশৰ হাৰো বিশ্বৰ ভিতৰতে ক্ষিপ্ৰতৰ৷ অৰ্থাৎ চুবুৰীয়া ৰাষ্ট্ৰখন ফাষ্ট গ্ৰ’য়িং ইক’ন’মী হিচাপে চিহ্নিত হৈছে৷ খোদ ৰাষ্ট্ৰসংঘৰ প্ৰতিবেদনত উল্লেখ পাইছে এই তথ্য৷
লগতে পঢ়ক নাৰীক অপমান কৰি গ্ৰেপ্তাৰৰ পাছত কি ক’লে সয়ম্ভূ আচাৰ্য পংকজ পাঠকে?
ঠিক সেই সময়তে অসমৰ আৰ্থ-সামাজিক উন্নয়নত চামিল হ’বলৈ বাংলাদেশে আগ্ৰহ প্ৰকাশ কৰাটো ৰাজ্যবাসীৰ বাবেও এক সুখবৰ৷ কিন্তু বাংলাদেশ চৰকাৰে অসমৰ কৃষি আৰু আন্তঃগাঁথনিৰ ক্ষেত্ৰত বিনিয়োগ কৰিবলৈ আগ্ৰহ প্ৰকাশ কৰিছে কিয়? ইয়াৰ আঁৰতো আছে মুখ্যমন্ত্ৰী ড০ হিমন্ত বিশ্ব শৰ্মাৰ দীৰ্ঘম্যাদী পৰিকল্পনাৰ তথ্য৷
উল্লেখযোগ্য যে অসমৰ ৰাজহ বিভাগে প্ৰকাশ কৰা তথ্য অনুসৰি ৪ লাখ হেক্টৰতকৈ অধিক পতিত ভূমিত অবৈধ জনবসতি গঢ়ি উঠিছে৷ আৰু এই বিস্তীৰ্ণ এলেকাত কৃষি প্ৰকল্প গঢ়ি তুলিব পাৰিলে খাদ্য-শস্য আৰু পাম শস্য উৎপাদনত অসমে বিশেষ স্থান লাভ কৰিব পাৰিব৷ আৰু সেই অনুসৰি মুখ্যমন্ত্ৰীগৰাকীয়ে পৰ্যায়ক্ৰমে পতিত ভূমিসমূহ বেদখলমুক্ত কৰিবলৈ আঁচনি লৈছে৷
জানিব পৰা মতে বান পৰিস্থিতি সামান্য উন্নত হ’লেই চৰ অঞ্চলত উচ্ছেদ অভিযান তীব্ৰতৰ কৰি তোলা হ’ব৷ এই খবৰ আনকি আন্তঃৰাষ্ট্ৰীয় পৰ্যায়তো প্ৰকাশিত হৈছে৷ প্ৰস্তাৱিত আঁচনি অনুসৰি যদি ২ লাখ হেক্টৰ ভূমিও বেদখলমুক্ত হয় তেন্তে সেই স্থানত কৃষি ব্যৱস্থাৰ পৰ্যাপ্ত সুবিধা থাকিব৷ অসমত কৃষি আৰু মৎস্য উৎপাদন ক্ষেত্ৰত বৈপ্লৱিক পৰিৱৰ্তন অহাটো নিশ্চিত হোৱা বুলি ক’ব পাৰি৷ সেইবাবে অসমৰ কৃষি আৰু উদ্যান শস্য প্ৰকল্পসমূহত সম্পূৰ্ণভাৱে সহযোগ কৰিবলৈবাংলাদেশ চৰকাৰে আগ্ৰহ প্ৰকাশ কৰিছে৷
লগতে পঢ়ক অৱশেষত চৰকাৰৰ চক্ৰব্যুহ ফালিলে বৰ্ষাশ্ৰীয়ে! উচ্চ ন্যায়ালয়ে প্ৰদান কৰিলে জামিন
এই উদ্দেশ্যে অসমৰ মুখ্যমন্ত্ৰীগৰাকীক বাংলাদেশলৈ আমন্ত্ৰণ জনোৱা বুলিও চৰকাৰী সূত্ৰই প্ৰকাশ কৰিছে৷ সেই মৰ্মে অহা ছেপ্টেম্বৰ মাহত মুখ্যমন্ত্ৰী ড০ হিমন্ত বিশ্ব শৰ্মা বাংলাদেশ অভিমুখে ৰাওনা হোৱাৰ সম্ভাৱনা আছে৷ ইফালে বাংলাদেশে অসমৰ কৃষি আৰু বাণিজ্য খণ্ডত বিনিয়োগ কৰিলে শাক-পাচলি আৰু মাছৰ লগতে বিভিন্ন খাদ্য সামগ্ৰী সুলভ মূল্যত উপলব্ধ হ’ব বুলিও চৰকাৰী সূত্ৰই দাবী কৰে৷ কিয়নো চুবুৰীয়া ৰাষ্ট্ৰ বাংলাদেশত মৎস্য আৰু শাক-পাচলিৰ উৎপাদন দেশখনৰ ৰাষ্ট্ৰীয় চাহিদাতকৈয়ো বেছি৷
অৰ্থাৎ বাংলাদেশৰ উপভোক্তাসকলৰ বাবে প্ৰয়োজনতকৈ অধিক শাক-পাচলি আৰু মৎস্য উৎপাদন হয়৷ তেনে পৰিস্থিতিত চুবুৰীয়া ৰাষ্ট্ৰখনে কৃষি আৰু মৎস্য প্ৰকল্প যুটীয়াভাৱে গঢ়ি তুলিবলৈ যদি সক্ষম হয়, তেন্তে অসমতো মাছ আৰু বিভিন্ন শাক-পাচলি সুলভ মূল্যত উপলব্ধ হ’ব৷ বিশেষকৈ ইলিছ মাছৰ লগতে সাগৰীয় মাছো অসমৰ ৰাইজে সহজে আৰু কম মূল্যত ক্ৰয় কৰিব পাৰিব৷
লগতে পঢ়ক ফোঁপোলা ৰাজ্যৰ স্বাস্থ্য বিভাগ! ডিব্ৰুগড়ত শল্য চিকিৎসক নাই! গুৱাহাটীলৈ প্ৰেৰণ মইনা নায়কক
সাম্প্ৰতিক সময়ত গুৱাহাটীৰ বজাৰত বাংলাদেশৰ ইলিছ মাছ অৰ্থাৎ পদ্দা ইলিছ হিচাপে পৰিচিত মাছৰ প্ৰতিকেজিত খুচুৰা বিক্ৰী মূল্য ১,৫০০ টকা৷ কিন্তু সেই একেই মাছ বাংলাদেশৰ বজাৰত ১০০ৰ পৰা ১৫০ টকাৰ ভিতৰত৷ অৰ্থাৎ অসমত ১০ গুণ দৰত বাংলাদেশৰ মাছ বিক্ৰী হ’ব লাগিছে৷ কিন্তু অসম আৰু বাংলাদেশৰ মাজত যদি দ্বি-পাক্ষিক বাণিজ্যিক চুক্তি সম্পাদিত হয়, তেন্তে ১,৫০০ টকীয়া ইলিছ মাছ গুৱাহাটীৰ বজাৰত ২০০-২৫০ টকাৰ ভিতৰত পোৱা হ’ব৷ একেদৰে বিভিন্ন প্ৰকাৰৰ সাগৰীয় মাছ আৰু ছী ফুডো গুৱাহাটীৰ লগতে অসমৰ বজাৰত সুলভ হ’ব৷ এইবাবে বাংলাদেশ চৰকাৰে অসমৰ মুখ্যমন্ত্ৰীক আমন্ত্ৰণ জনোৱাটো ৰাজ্যবাসীৰ বাবে এক সুখবৰ হিচাপে বিবেচিত হৈছে৷
অৱশ্যে এইক্ষেত্ৰত আগন্তুক সময়ছোৱাত মুখ্যমন্ত্ৰী ড০ হিমন্ত বিশ্ব শৰ্মাৰ ৰাজনৈতিক দক্ষতা আৰু নীতিৰ ওপৰত নিৰ্ভৰ কৰিব প্ৰস্তাৱিত প্ৰকল্পৰ সফলতা-বিফলতা৷ কিন্তু তৎসত্ত্বেও চুবুৰীয়া ৰাষ্ট্ৰ বাংলাদেশৰ বিনিয়োগ আৰু সহযোগিতাত কৃষিখণ্ডৰ লগতে মৎস্য উৎপাদনত বৈপ্লৱিক পৰিৱৰ্তন আহিব বুলি আশা কৰিব পাৰি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
