আজি দ্বিতীয় দিনাও ইউক্ৰেইনৰ ওপৰত ৰাছিয়াই আক্ৰমণ অব্যাহত ৰাখিছে৷ আন্তঃৰাষ্ট্ৰীয় সংবাদ মাধ্যমত প্ৰকাশিত খবৰ অনুসৰি ৰাছিয়াৰ আক্ৰমণত শ শ লোকৰ মৃত্যু ঘটিছে৷ শেহতীয়াকৈ প্ৰকাশ পোৱা মতে ৰুছ ৰকেট আক্ৰমণত ৰাজধানী কীয়েভত অতি কমেও ১৩৭ গৰাকী লোকৰ মৃত্যু ঘটিছে৷
ৰাছিয়াই কিয় ইউক্ৰেইন আক্ৰমণ কৰিলে? প্ৰতিবেশী ৰাষ্ট্ৰ ইউক্ৰেইনৰ সৈতে ৰাছিয়াৰ শত্ৰুতা এতিয়াৰে নহয়৷ কিন্তু প্ৰতিবেশী ৰাষ্ট্ৰ ইউক্ৰেইনক ৰাছিয়াই আক্ৰমণ কৰাত NATOৰ ভূমিকা কি?
ইউক্ৰেইনেৰে পূৰ্বৰে পৰা ৰাছিয়াৰ শত্ৰুতা থকাৰ পিছতো NATO অৰ্থাৎ North Atlantic Treaty Organizationত ইউক্ৰেইনৰ অন্তভুৰ্ক্তকৰণক লৈ পুনৰ সমস্যাৰ সৃষ্টি হয়৷ ৰাছিয়াই চিৰ বৈৰী ৰাষ্ট্ৰ ইউক্ৰেইনক NATOত অন্তভুৰ্ক্ত কৰাটো প্ৰথমৰে পৰা তীব্ৰ বিৰোধ কৰি আহিছে৷
উল্লেখ্য যে NATOত উত্তৰ আমেৰিকাৰ দুই ৰাষ্ট্ৰ ক্ৰমে আমেৰিকা যুক্তৰাষ্ট্ৰ, কানাডা আৰু ইউৰোপৰ ২৭ খন ৰাষ্ট্ৰসহ মুঠ ৩০ খন ৰাষ্ট্ৰ আছে৷ আৰু NATOৰ ৩০ ৰাষ্ট্ৰৰ নিজা সৈন্য বাহিনী আছে যিয়ে সদস্য ৰাষ্ট্ৰৰ নিৰাপত্তা সুনিশ্চিত কৰে৷
অৰ্থাৎ বৰ্হি ৰাষ্ট্ৰই আক্ৰমণ কৰিলে NATOবাহিনীয়ে সদস্য ৰাষ্ট্ৰলৈ নিজা সৈন্য বাহিনী প্ৰেৰণ কৰে৷ ইউক্ৰেইনকো আমেৰিকা ব্ৰিটেইনসহ NATOৰ সদস্য ৰাষ্ট্ৰসমূহে NATOত অন্তভুৰ্ক্ত কৰিবলৈ চেষ্টা কৰি আহিছে৷ প্ৰধানত কৃষ্ণ সাগৰৰ বিশাল ব্যৱসায়িক কেন্দ্ৰৰ প্ৰতি চকু থকা আমেৰিকাই NATOত ইউক্ৰেইনক যোগ দিয়াটোত কূটনৈতিক, সামৰিক আৰু ব্যৱসায়িক কাৰণ আছে বুলিও চৰ্চা লাভ কৰি আহিছে৷
শীতল যুদ্ধৰ সময়ৰে পৰা ৰাছিয়া আৰু আমেৰিকাৰ মাজত এক প্ৰকাৰে ছায়া যুদ্ধ অব্যাহত আছে৷ ইফালে ইউক্ৰেইন হৈছে ৰাছিয়াৰ পিছতে ভৌগোলিকভাৱে ইউৰোপৰ দ্বিতীয় বৃহত্তম দেশ৷ ৰাছিয়াৰ সৈতে ছায়া যুদ্ধত প্ৰবৃত্ত থকা আমেৰিকাৰ বাবে সেয়ে ইউক্ৰেইন কূটনৈতিক আৰু ভৌগোলিকভাৱে অতি গুৰুত্বপূৰ্ণ ৰাষ্ট্ৰ৷ ইউক্ৰেইনক NATOত অন্তভুৰ্ক্ত কৰি ল’ব পাৰিলেই আমেৰিকাই পশ্চিম ইউৰোপৰ বৃহৎ অঞ্চলটো সামৰিক সঞ্চালনৰ লগতে কূটনৈতিক আৰু ব্যৱসায়িক বিস্তাৰো কৰিব পাৰিব৷
অৰ্থাৎ ইক্ৰেইনক NATOত অন্তভুৰ্ক্ত কৰাই ল’ব পাৰিলে কেৱল ইউক্ৰেইনৰে নহয়, আমেৰিকাৰ সামৰিক, কূটনৈতিক আৰু ভৌগোলিকভাৱেও বৃহৎ লাভৱান হ’ব পাৰিব৷ ইয়াৰোপৰি NATOত ইউক্ৰেইনক অন্তভুৰ্ক্ত কৰাই ল’ব পাৰিলে আমেৰিকাই ইউক্ৰেইনৰ কান্ধত ভেজা ছায়া যুদ্ধকো অধিক প্ৰসাৰিত কৰিব পাৰিব৷
ৰাছিয়াই মাৰ্কিন যুক্তৰাষ্ট্ৰৰ এই সমৰনীতি আৰু কূটনৈতিক কাৰছাজিক সথিকভাৱে বুজিব পাৰিলে৷ চিৰ বৈৰী ইউক্ৰেইনৰ আমেৰিকাৰ সৈতে মিত্ৰতা আৰু NATOত অন্তভুৰ্ক্তি সেয়ে ৰাছিয়াই তীব্ৰতাৰে বিৰোধ কৰি আহিছে৷ ৰাছিয়াই বাৰে বাৰে দাবী কৰি আহিছে যে NATOএ ৰাছিয়াত বেদখল কৰিবলৈ পশ্চিম ইউৰোপত সামৰিক কাৰ্যকলাপ বৃদ্ধি কৰিছে৷ ৰাছিয়াই সেয়ে পশ্চিম ইউৰোপত NATOৰ সামৰিক কাৰ্যকলাপ বন্ধ কৰিবলৈ দাবী জনাই আহিছে৷
ইফালে ৰাছিয়াৰ ৰাষ্ট্ৰপতি ভ্লাদিমিৰ পুটিনে দাবী কৰিছে যে আমেৰিকাই ১৯৯০ চনৰ নিৰাপত্তা নিশ্চয়তা ভংগ কৰি ইউৰোপৰ পূৱ দিশেও NATOক ব্যৱহাৰ কৰিবলৈ ধাৱমান হ’ব বিচাৰিছে৷ অৱশ্যে নাটোৱে ৰাছিয়াৰ এই দাবীসমূহ নাকচ কৰি এয়া এক প্ৰতিৰক্ষামূলক মিত্ৰতা বুলি অভিহিত কৰি আহিছে।কিন্তু ৰাছিয়াই NATOৰ এই দাবীক খাৰিজ কৰি ইউক্ৰেইনক NATOত অন্তভুৰ্ক্ত কৰিলেই আক্ৰমণ কৰাৰ হুংকাৰ প্ৰদান কৰি আহিছিল৷
ইফালে ইউক্ৰেইনৰ ৰাছিয়ান মূলৰ লোকৰ বসতি প্ৰধান অঞ্চলসমূহক স্বাধীন ৰাষ্ট্ৰ হিচাপে প্ৰতিষ্ঠা কৰি ইউক্ৰেইনৰ ৰাজহাড় ভাঙিবলৈ সদাসচেষ্ট হৈ আহিছে৷ আনফালে কৃষ্ণ সাগৰৰ উপদ্বীপ ক্ৰিমিয়াক, যিটোক পশ্চিম ইউৰোপৰ বাণিজ্যিক ঘাটি বুলিব পাৰি তাক ৰাছিয়াই ২০১৪ চনতে সামৰিক অভিযানেৰে দখল কৰিলে৷ যিটোৱে আমেৰিকা ব্ৰিটেইনসহ NATOৰ আগ্ৰাসী ৰাষ্ট্ৰ বাবে সমৰনীতি আৰু ব্যৱসায়িকভাৱে বৃহৎ ক্ষতি হিচাপে বিবেচিত হৈ আহিছে৷
ইমানৰ পিছতো আমেৰিকা ব্ৰিটেইনসহ NATOএ ইউক্ৰেইনক বলিৰ পাঠা সজালে বুলিয়ে চৰ্চা লাভ কৰিছে৷ ৰাছিয়াই বাৰে বাৰে ইউক্ৰেইন আক্ৰমণ কৰাৰ ভাবুকি দি অহাৰ পিছতো NATOএ দুয়োপক্ষকে উচতাই জুল খালে৷
ৰাছিয়াই আক্ৰমণ কৰাৰ পিছত NATOএ আনুষ্ঠানিকভাৱে প্ৰকাশ কৰিছে ইউক্ৰেইনৰ সৈতে থাকিলেও NATOএ ইউক্ৰেইনক সামৰিকভাৱে কোনো সহায় নকৰে৷ অৰ্থাৎ ইউক্ৰেইনলৈ NATOএ সৈন্য বাহিনী প্ৰেৰণ নকৰে৷ NATOএ আন্তঃৰাষ্ট্ৰীয় নীতি উলংঘা নকৰো বুলি ঘোষণা কৰি এই সিদ্ধান্ত লোৱা বুলি প্ৰকাশ কৰিছে৷ এতিয়া প্ৰশ্ন হৈছে NATOএ ইউক্ৰেইনক সামৰিকভাৱে সহায় কৰিবলৈ প্ৰস্তুত নাছিল তেনে ইউক্ৰেইনক বলিৰ পঠা সজোৱা নাই নে? দুই ম’হৰ যুঁজত বিৰিণাৰ মৰণৰ দৰে সাধাৰণ ইউক্ৰেইনৰ জনতাও বলিৰ পঠা হোৱা নাই নে?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
