যোৰহাটত শোকাৱহ ঘটনা, পত্নীৰ লগত কাজিয়া লগাৰ বাবেই কোলাৰ ৩ মহীয়া সন্তানক দলিয়ালে কুঁৱালৈ
যোৰহাট জিলাত কালি নিশা সংঘটিত হৈছে এক অতিকে শোকাৱহ ঘটনা। পিতৃয়ে নিষ্ঠুৰতাৰে প্ৰাণ কাঢ়িলে ৩ মহীয়া সন্তানৰ। যোৰহাটৰ মৰিয়নিত সংঘিটিত হৈছে এই ঘটনা।
মৰিয়নিৰ ডালিম চাহ বাগিছাৰ এই মৰ্মান্তিক ঘটনাত অকালতে প্ৰাণ হেৰুৱাই ৩ মহীয়া সন্তানটিয়ে। পতি-পত্নীৰ মাজৰ কাজিয়াই কাল হৈ নামিল সন্তানৰ বাবে। কাজিয়াত একো নাই হৈ ক্ৰোধতে পিতৃয়ে পত্নীৰ কোলাৰ কেচুঁৱা টানি দলিয়ালে কুঁৱালৈ।
এই ঘটনাই চেলেংহাটৰ প্ৰতিজন হৃদয়বান লোকৰ বুকু কঁপাই গৈছে। জানিব পৰা মতে চেলেংহাট আৰক্ষী চকীৰ অন্তৰ্গত ডালিম চাহ বাগিছাৰ টেকলা লাইনৰ অমৰ বৰাইক আৰু পত্নীৰ মাজত নিশা প্ৰায় ১০ মান বজাত কোনো কথাক লৈ কাজিয়াৰ সূত্ৰ পাত হয়।
দুয়োৰে কাজিয়াৰ মাজতে উন্মাদপ্ৰায় হৈ পৰা পিতৃ অমৰ বৰাইকে(৩০) তিনিমহীয়া কেঁচুৱাটো মাতৃৰ কোলাৰ পৰা টানি আজুৰি কাঢ়ি লৈ ঘৰৰ সমীপৰ এটা কুঁৱালৈ দলিয়াই দিয়ে। আনহাতে ঘটনা সংঘটিত কৰি চেলেংহাট আৰক্ষী থানাত আত্মসমৰ্পন কৰে হত্যাকাৰী অমৰে।
মাত্ৰ তিনিমাহত ভৰি দিয়া বৈষ্ণৱী বৰাইক নামৰ দুৰ্ভগীয়া কন্যা শিশুটি মৃত অৱস্থাত আজি কুঁৱাৰ পৰা আৰক্ষীয়ে উদ্ধাৰ কৰে। অমৰ বৰাইকক আৰক্ষীয়ে গ্ৰেপ্তাৰ কৰা লগতে শিশুটিৰ মৃতদেহ মৰণোত্তৰ পৰীক্ষাৰ বাবে JMCH প্ৰেৰণ কৰিছে। চেলেংহাটৰ বাগিছা এলেকাত অবাধ হাৰত অবৈধ সুৰাৰ প্ৰচলনৰ বাবেই এনেধৰণৰ মৰ্মান্তিক ঘটনা সংঘটিত হোৱা বুলি স্থানীয় ৰাইজে অভিযোগ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
