অসম লাইভ২৪ঃ ইজৰাইলী সেনাৰ হাতত আকৌ প্ৰাণ হেৰুৱালে পেলেষ্টাইনী কিশোৰে। ৱেষ্ট বেংকত চলি থকা সামৰিক অভিযানতেই নৃশংসভাৱে হত্যা কৰা হৈছে কিশোৰজনক। ইজৰাইলী সেনাই দাবী কৰা অনুযায়ী সেনাৰ অভিযানৰ সময়ত ভুলবশত গুলী লাগি নিহত হৈছে কিশোৰজন।
পেলেষ্টাইন স্বাস্থ্যমন্ত্ৰণালয়ে প্ৰকাশ কৰামতে কিশোৰজনৰ নাম মহম্মদ বলহান। বয়স ১৫ বছৰ। মৃত কিশোৰজনৰ পেট, কান্ধ, মূৰত পোৱা গৈছে বুলেটৰ চিহ্ন। শেহতীয়াকৈ ইজৰাইল আৰু পেলেষ্টাইন দুই প্ৰতিবেশী দেশৰ মাজত উত্তেজনা অব্যাহত আছে। ইজৰাইল আৰু পেলেষ্টাইনৰ মাজত চলি থকা সংঘাতত বৰ্তমানলৈ ৮০ জন পেলেষ্টাইনী সেনা আৰু ১৮ জন ইজৰাইলীৰ মৃত্যুও হৈছে।
উল্লেখ্য যে ২০২১ চনৰ মে মাহৰ পৰাই জেৰুজালেমৰ আল আক্সা মছজিদত ইহুদি আৰু মুছলমান সম্প্ৰদায়ৰ মাজত আৰম্ভ হৈছে সংঘাত। শেহতীয়াকৈ ৰমজানৰ নামাজ পঢ়ি থকাৰ সময়তে জেৰুজালেমৰ আল আক্সা মছজিদত আক্ৰমণ কৰিছে। আক্ৰমণৰ পাছতেই ১১ দিন ধৰি হামাছ আৰু ইজৰাইলী সেনাবাহিনীৰ মাজত যু্দ্ধ চলি আছে। সংঘৰ্ষত বৰ্তমানলৈ ২৫৬ জন পেলেষ্টাইনীৰ মৃত্যু হৈছে। এই সংঘৰ্ষৰ পূৰ্বেও তিনিবাৰকৈ ৰক্তক্ষয়ী যুদ্ধ হৈছে দুই দেশৰ মাজত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
