সমগ্ৰ বিশ্বৰে দৃষ্টি নিবদ্ধ ভাৰতৰ ওপৰত, ইছৰোই কৰিবলৈ গৈ আছে অভিলেখ গঢ়া কাম
৭৮ সংখ্যক স্বাধীনতা দিৱসৰ উদযাপন এতিয়া আৰু দুগুণ হ’বলৈ গৈ আছে। মহাকাশত আন এক ইতিহাস সৃষ্টিৰ বাবে সাজু ভাৰত। চন্দ্ৰযান-৩ চন্দ্ৰলৈ প্ৰেৰণ কৰি বিশ্ববাসীক শক্তি প্ৰদৰ্শন কৰা ইছৰ’ই আজি অৰ্থাৎ ১৬ আগষ্টত পুনৰ আন এক অভিলেখ কৰিবলৈ ওলাইছে। ইছৰোৰ নতুন উপগ্ৰহ উৎক্ষেপণৰ লগে লগে ভাৰতে এতিয়া পৃথিৱীৰ হৃদস্পন্দন শুনিব পাৰিব।
যদি ইছৰোৰ অভিযান সফল হয় তেন্তে ভাৰতে দুৰ্যোগৰ বিষয়ে সময়োপযোগী তথ্য লাভ কৰিব। ইছৰো অৰ্থাৎ ভাৰতীয় মহাকাশ গৱেষণা সংস্থাই আজি ১৬ আগষ্টৰ পুৱা ৯:১৭ বজাত ইয়াৰ শেহতীয়া পৃথিৱী পৰ্যবেক্ষণ উপগ্ৰহ EOS-08 উৎক্ষেপণ কৰিব। ইয়াক ক্ষুদ্ৰ উপগ্ৰহ উৎক্ষেপণ বাহন (এছএছএলভি)-ডি৩ৰ তৃতীয় আৰু চূড়ান্ত উন্নয়নমূলক বিমানৰ জৰিয়তে উৎক্ষেপণ কৰা হ’ব।
পৃথিৱী নিৰীক্ষণ উপগ্ৰহ (EOS-08) আৰু ষ্টাৰ্টআপ কোম্পানী স্পেচ ৰিক্সাৰ SR-0 উপগ্ৰহ কঢ়িয়াই অনা ভাৰতৰ ক্ষুদ্ৰ উৎক্ষেপণ বাহন SSLV উৎক্ষেপণৰ কাউণ্টডাউন আৰম্ভ হৈছে। ইছৰোৰ তথ্য অনুসৰি শুকুৰবাৰে পুৱা ২.৩০ বজাৰ পৰা উপগ্ৰহ উৎক্ষেপণৰ কাউণ্টডাউন আৰম্ভ হয়। এইটোৱেই হ’ব উন্নয়ন পৰ্যায়ত এছএছএলভিৰ তৃতীয় আৰু অন্তিম বিমান। ইয়াৰ পিছত ৰকেটটো সম্পূৰ্ণ অপাৰেচনেল মোডলৈ আহিব।
শুকুৰবাৰে পুৱা প্ৰায় ৯.১৭ বজাত অন্ধ্ৰ প্ৰদেশৰ শ্ৰীহৰিকোটাৰ সতীশ ধৱন মহাকাশ কেন্দ্ৰৰ পৰা ১৭৫.৫ কিলোগ্ৰাম ওজনৰ মাইক্ৰ’চেটেলাইট ই অ’ এছ-০৮ লৈ উৰণ কৰিব ৫০০ কেজি বহন ক্ষমতাৰ এছ এছ এল ভি। উপগ্ৰহটোৰ আয়ুস এবছৰ নিৰ্ধাৰণ কৰা হৈছে। ভাৰতীয় মহাকাশ গৱেষণা সংস্থা (ISRO)ৰ তথ্য অনুসৰি এই প্ৰস্তাৱিত অভিযানে SSLV উন্নয়ন প্ৰকল্প সম্পূৰ্ণ কৰিব। ইয়াৰ পিছত ইয়াক ভাৰতীয় উদ্যোগ আৰু ৰাজহুৱা খণ্ডৰ কোম্পানী নিউস্পেচ ইণ্ডিয়া লিমিটেডৰ মিছনৰ বাবে ব্যৱহাৰ কৰা হ’ব।
এছ এছ এল ভি ৰকেটটোৱে ৫০০ কিলোমিটাৰ কক্ষপথত মিনি, মাইক্ৰ’ বা নেনো উপগ্ৰহ (১০ৰ পৰা ৫০০ কিলোগ্ৰাম ভৰ) উৎক্ষেপণ কৰিবলৈ সক্ষম। ৰকেটৰ তিনিটা পৰ্যায় কঠিন ইন্ধনৰ দ্বাৰা চালিত হোৱাৰ বিপৰীতে চূড়ান্ত ভেলোচিটি ট্ৰিমিং মডিউল (ভিটিএম)ত তৰল ইন্ধন ব্যৱহাৰ কৰা হয়। উঠাৰ ঠিক ১৩ মিনিটৰ পিছত ৰকেটটোৱে ই অ’ এছ-০৮ক নিজৰ কক্ষপথত এৰি দিব আৰু প্ৰায় তিনি মিনিটৰ পিছত এছ আৰ-০ পৃথক হ’ব। দুয়োটা উপগ্ৰহ ৪৭৫ কিলোমিটাৰ উচ্চতাত ৰকেটৰ পৰা পৃথক হ’ব।
চেন্নাইস্থিত মহাকাশ খণ্ডৰ ষ্টাৰ্টআপ স্পেচ ৰিক্সাৰ বাবে এছ আৰ-০ হ’ব প্ৰথমটো উপগ্ৰহ। স্পেচ ৰিক্সাৰ সহ-প্ৰতিষ্ঠাপক তথা স্পেচ কিডজ ইণ্ডিয়াৰ প্ৰতিষ্ঠাপক মুখ্য কাৰ্যবাহী বিষয়া মিচেছ কেছানে জনোৱা মতে, ‘ইছৰোই বাণিজ্যিক ভিত্তিত আৰু ছটা উপগ্ৰহ নিৰ্মাণ কৰিব’। ইফালে ইছৰোৱে কয় যে ই অ’ এছ-০৮ অভিযানৰ প্ৰাথমিক উদ্দেশ্যৰ ভিতৰত মাইক্ৰ’ চেটেলাইটৰ ডিজাইন আৰু বিকাশ অন্তৰ্ভুক্ত। ইয়াৰ ভিতৰত মাইক্ৰ’ চেটেলাইট বাছৰ সৈতে সামঞ্জস্যপূৰ্ণ পেলোড ডিভাইচ সৃষ্টি কৰা আৰু ভৱিষ্যতৰ কাৰ্যক্ষম উপগ্ৰহৰ বাবে প্ৰয়োজনীয় নতুন প্ৰযুক্তি অন্তৰ্ভুক্ত কৰা।
পাছে এই অভিযান কিয় ইমান গুৰুত্বপূৰ্ণ? কিয় সমগ্ৰ বিশ্বৰে দৃষ্টি নিবদ্ধ ভাৰতৰ ওপৰত। ইয়াৰ সফলতাৰে ভাৰতে পৃথিৱীৰ হৃদস্পন্দন শুনিব পাৰিব। ইয়াৰ লগে লগে প্ৰাকৃতিক দুৰ্যোগৰ তথ্য সময়মতে উপলব্ধ হ’ব। এই উপগ্ৰহৰ জৰিয়তে ভূমিকম্প, ছুনামী বা অন্যান্য প্ৰাকৃতিক দুৰ্যোগৰ দৰে পৃথিৱীৰ গতিবিধিৰ তথ্য সহজে উপলব্ধ হ’ব। এই মহাকাশযানখনৰ মিছন লাইফ এবছৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
