অসম লাইভ২৪ঃ হিন্দু পৰিয়ালত কন্যাৰ বিবাহৰ ক্ষেত্ৰত কন্যাদানৰ নিয়ম প্ৰচলিত আছে। প্ৰতিগৰাকী ছোৱালীৰ জীৱনত এই বিশেষ মুহূৰ্তটো অত্যন্ত গুৰুত্বপূৰ্ণ। এই নিয়মক লৈ যুগে যুগে বহুতৰে আপত্তিও আছে। এইবাৰ কন্যাদানক লৈ বিশেষ পৰ্যবেক্ষণ কৰিছে এলাহবাদ হাইকৰ্টে।
হিন্দু মেৰিজ এক্ট ১৯৫৫ৰ ছেকশ্ব্যন ৭ অনুসৰি কোনো হিন্দু বিবাহৰ বৈধতাৰ বাবে সাতপাকৰ নিয়ম মনাটো অত্যন্ত জৰুৰী। হিন্দু বিবাহত এই নিয়ম পালন কৰা হয়। এজন পুৰুষে এগৰাকী যুৱতীক অগ্নিসাক্ষী ৰাখি সাতপাক ঘূৰে আৰু এজনে আনজনৰ হাতত ধৰি সাতটাকৈ প্ৰতিজ্ঞা গ্ৰহণ কৰে। এই অংগীকাৰ কৰা মানেই হিন্দু বিবাহ সম্পন্ন হোৱা। ১৯৫৫ চনৰ হিন্দু বিবাহ আইনত কন্যাদানৰ ৰীতি পালনৰ কথা উল্লেখ নাই।
কিয় কন্যাদান কৰা হয়?
প্ৰায়সকল হিন্দু পৰিয়ালত বিবাহৰ ক্ষেত্ৰত কন্যাদানৰ নিয়ম পালন কৰা হয়। কন্যাৰ পিতৃ-মাতৃয়ে এই নিয়ম পালন কৰিবলৈ গৈ আৱেগিকো হৈ পৰে। এই নিয়ম অনুসৰি পিতৃ-মাতৃয়ে নিজ হাতে কন্যাক জোঁৱাৱেকৰ হাতত তুলি দিয়ে। মন্ত্ৰোচ্চাৰণৰ মাধ্যমেৰে কন্যাদান কৰে পিতৃয়ে। কন্যাৰ দায়িত্ব জোঁৱায়েকৰ হাতত তুলি দিয়া এই ৰীতি হিন্দু বিবাহ এক্টত বাধ্যতামূলক নহয় বুলি স্পষ্টকৈ জনাই দিছে এইবাৰ এলাহবাদ হাইকৰ্টে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
