তিনিবাৰ তেওঁ প্ৰধানমন্ত্ৰী হৈছিল, তাৰপিছতেই ১৭ বছৰ জে’ল, উভতি চাওঁ আহক খালেদা জিয়াৰ সংঘাতপূৰ্ণ জীৱনক

খালেদাই সৰুকালত মিছন স্কুলত পঢ়াশুনা কৰিছিল৷ ৫ বছৰত সেই বিদ্যালয়ত ভৰ্তি হৈছিল খালেদা৷ ইয়াৰ পাছতেই দিনাজপুৰ চৰকাৰী বালিকা উচ্চ বিদ্যালয়ৰ পৰা পাছ কৰে ১৯৬০ চনত৷ সেই বছৰতেই তেওঁৰ বিয়া হয় জিয়াউৰ ৰহমানৰ সৈতে৷ তেতিয়াই তেওঁৰ নাম হয় খালেদা জিয়া বা বেগম খালেদা জিয়া৷ তেওঁৰ স্বামী জিয়াউৰ ৰহমান আছিল পাকিস্তান সেনাবাহিনীৰ এজন কেপ্টেইন৷ পৰবৰ্তী সময়ত তেওঁ বাংলাদেশৰ ৰাষ্ট্ৰপতি হয়৷

ৰাজনীতিত প্ৰৱেশ

১৯৮১ চনত খালেদাৰ জীৱনলৈ এক কঠিন সময় আহে৷ সেই বছৰৰ ৩০ মেত সামৰিক অভ্যুত্থানত প্ৰাণ হেৰুৱাই জিয়াউৰ ৰহমানে৷ ইয়াৰপাছতেই খালেদাৰ ৰাজনীতিত প্ৰৱেশ৷ তেওঁ ১৯৮২ চনত বিএনপিত যোগ দিয়ে৷ ১৯৮৪ চনৰ ১০ মেত দলৰ চেয়াৰপাৰ্ছন হিচাপে তেওঁ বিনা প্ৰতিদ্বন্দ্বিতাৰে জয়ী হয়৷ ইয়াৰপাছতেই তেওঁৰ জীৱনে নতুন মোৰ লয়৷

১৯৯১ চনত প্ৰথমবাৰ প্ৰধানমন্ত্ৰী

চন ১৯৯১৷ সেই বছৰেই প্ৰথমবাৰৰ বাবে নিৰ্বাচনত জয়ী হৈ প্ৰধানমন্ত্ৰী হয় খালেদা জিয়া৷ তাৰপিছতেই আকৌ ১৯৯৬ চনত তেওঁৰ মূৰত পৰে আন এক গধুৰ দায়িত্ব৷ তেতিয়াই ৰাজনৈতিক চাপত পৰি তেওঁ প্ৰধানমন্ত্ৰী পদ এৰিবলৈ বাধ্য হয়৷ ইয়াৰপাছতেই আকৌ ২০০১ চনত তেওঁ প্ৰধানমন্ত্ৰী হয়৷ ২০০৬ চন পৰ্যন্ত তেওঁ সেই দায়িত্বত আছিল৷

২০০৭ চনৰ পৰা খালেদা জিয়াৰ জীৱনত নামি আহে অন্ধকাৰ৷ সেই সময়ত তেওঁৰ বিৰুদ্ধে একাধিক গোচৰো তৰা হয়৷ ১ ছেপ্টেম্বৰ ২০০৭ চনত তেওঁক দুৰ্নীতিৰ গোচৰত গ্ৰেপ্তাৰ কৰা হয়৷ এই সময়ত তেওঁ এবছৰতকৈ বেছি সময় ধৰি কাৰাগাৰত আছিল৷ ২০০৮ চনৰ ছেপ্টেম্বৰত আদালতৰ নিৰ্দেশত জামিনত মুক্তি পায়৷ কেৱল সেয়াই নহয় ২০১৮ চনত জিয়া আৰফানেজ ট্ৰাষ্ট দুৰ্নীতি গোচৰ আৰু জিয়া চেৰিটেবল ট্ৰাষ্ট দুৰ্নীতি গোচৰৰ মামলাত জিয়াক মুঠ ১৭ বছৰৰ কাৰাদণ্ড দিয়া হয়৷ ২০১৯ চনৰ এপ্ৰিলৰ পৰাই স্বাস্থ্যৰ অৱনতি হয় তেওঁৰ৷ সেই সময়ত তেওঁক চিকিৎসাৰ বাবে হাস্পতাললৈ স্থানান্তৰ কৰা হয়৷ ২০২০ চনৰ মাৰ্চত মানৱিক কাৰণত তেওঁক ছমাহৰ বাবে গৃহবন্দী কৰি মুক্তি দিয়া হয়৷

আকৌ জুলাই অভ্যুত্থানৰ পাছত খেল সলনি হয়৷ এই সময়ত হাছিনা ক্ষমতাচ্যুত হয়৷ ইয়াৰপাছতেই নতুন চৰকাৰে খালেদাক সকলো গোচৰৰ পৰা মুক্তি দিয়ে৷ মুক্তি লাভ কৰি নতুনকগৈ যুঁজ দিয়াৰ বাবে সাজুও হৈছিল খালেদা জিয়া৷ কিন্তু তেওঁৰ সেই ইচ্ছা পূৰণ নহ’ল৷ শেষত ৮০ বছৰ বয়সত আজি শেষনিশ্বাস ত্যাগ কৰে খালেদা জিয়াই৷