চৰণেহে জানে মৰণৰ ঠাই… হাঁহি হাঁহি ওলাই গৈছিল ঘৰৰ পৰা৷ উদ্দেশ্য কেদাৰনাথ দৰ্শন৷ ভৱামতেই গৈ উপস্থিত হ’ল কেদাৰনাথ মন্দিৰৰ কাষতো৷ কিন্তু জীৱন্তে আৰু তেওঁ উভতি নাহিল নিজ বাসগৃহলৈ৷ কেদাৰনাথ দৰ্শন কৰিবলৈ গৈ অকাল মৃত্যুক সাবটিলে এগৰাকী যুৱতীয়ে। মৰিগাঁৱৰ দলংঘাটৰ পাপৰি ডেকা নামৰ যুৱতীগৰাকী তীৰ্থ ভ্ৰমণৰ বাবে কেদাৰনাথলৈ গৈছিল বন্ধু বান্ধবীৰ সৈতে৷ তাতেই মৃত্যুক সাবটি ল’লে পাপৰি ডেকাই৷
জানিব পৰা অনুসৰি, কেদাৰনাথলৈ যোৱাৰ পথত স্বাস প্ৰস্বাস জনিত কাৰণত অসুস্থ হৈ পৰিছিল পাপৰি ডেকা৷ আৰু তাতেই তেওঁ মৃত্যুক সাবটি লোৱা বুলি জানিব পৰা গৈছে৷ ৪মে তাৰিখে মৃত্যুক সাবটি লৈছে যুৱতী গৰাকীয়ে৷ কেদাৰনাথৰ পৰা মাত্র ৫০০ মিটাৰ নিলগত এই কৰুণ ঘটনা সংঘটিত হয়। বৃহস্পতিবাৰে পুৱা মৃতদেহ নিজ গৃহলৈ লৈ আহাৰ পিছতেই এক অবৰ্ণনীয় শোকাকুল পৰিবেশ বিৰাজ কৰে গাঁওখনত।
উল্লেখ্য যে পাপৰি ডেকাৰ অহা ডিচেম্বৰ মাহত বিবাহ সম্পন্ন হোৱাৰ কথা আছিল৷ কিন্তু সেয়া আৰু হৈ নুঠিল৷ শেষত আজি মৃতদেহত সামাজিক ৰীতি নীতিৰে সেন্দুৰ দিছে হবলগীয়া স্বামী গুৱাহাটীৰ জ্যোতি প্ৰসাদ দত্তই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
