ডাঃ ইৰা বিশ্বাসঃ নাৰীদেহত সৃষ্ট অন্যান্য ৰোগসমূহৰ দৰেই কিছু ৰোগে নাৰীৰ প্ৰজনন প্ৰক্ৰিয়াৰ লগত জড়িত অংগবিশেষ যেনে অ’ভাৰী (ডিম্বাশয়), ইউটেৰাছ (জৰায়ু) আদিক আক্ৰান্ত কৰে। এনেদৰে হোৱা ভিন্ন ৰোগৰ ফলস্বৰূপে নাৰীগৰাকীৰ দেহত বহু সমস্যাৰ সৃষ্টি কৰে। গৰ্ভধাৰণ কৰাৰ ক্ষমতাৰ পৰা আৰম্ভ কৰি মাহেকীয়া হোৱাৰ প্ৰক্ৰিয়াত খেলিমেলিৰ সৃষ্টি হোৱা আদি নানান সমস্যাই দেখা দিয়ে। এনে এবিধ সমস্যাই হৈছে পি চি অ’ ডি (পলিচিষ্টিক অভাৰীয়ান ডিজিজ) বা ডিম্বাশয়ত সৃষ্টি হোৱা চিষ্ট (অপ্ৰয়োজনীয়ভাৱে সৃষ্ট কোষৰ সমষ্টি)।
এই পি চি অ’ ডি বা ডিম্বাশয়ত এনেদৰে অপ্ৰয়োজনীয় কোষৰ সৃষ্টি কিদৰে হয়? এগৰাকী প্ৰজননক্ষম নাৰীৰ ডিম্বাশয়ে কি কৰে? অৱশ্যেই প্ৰতি মাহতেই প্ৰজনন প্ৰক্ৰিয়াৰ বাবে প্ৰয়োজনীয় আৰু পূৰঠ ডিম্বাণু প্ৰস্তুত কৰে। আৰু যেতিয়া ২৮ দিন বা এমাহৰ ভিতৰত প্ৰস্তুত হোৱা এই পূৰঠ ডিম্বাণু শুক্ৰাণুৰ সৈতে মিলিত নহয় বা প্ৰজনন প্ৰক্ৰিয়া নহয় বা গৰ্ভধাৰণ নহয় তেতিয়া সেই পূৰঠ ডিম্বাণু জৰায়ুৰ পাতলীয়া তৰপসহ যোনীদ্বাৰেৰে ওলাই আহে। ইয়াকেই এগৰাকী নাৰীৰ মাহেকীয়া হোৱা বুলি কোৱা হয়। মাহেকীয়াৰ ৰক্তস্ৰাৱত ডিম্বাণুৰ লগতে কিছু তেজো মিহলি হৈ থাকে।
এতিয়া কথাটো হ’ল যে কিছুমান কাৰণত ডিম্বাশয়ে পুৰঠ ডিম্বাণু প্ৰস্তুত কৰিব নোৱাৰা হয়। অৰ্থাৎ, অপৈণত বা আংশিকভাৱে পৈণত ডিম্বাণুহে সৃষ্টি কৰিবলৈ ধৰে, তাকো বৃহৎ পৰিমাণত। এনেদৰে সৃষ্টি হোৱা ডিম্বাণুবিলাকেই অভাৰী বা ডিম্বাশয়ত চিষ্টৰ সৃষ্টি কৰে। এই চিষ্টৰ ফলত ডিম্বাশয়টি আকাৰত ডাঙৰ হৈ পৰে আৰু এনড্ৰ’জেনছ নামৰ যিবিধ হ’ৰমন পুৰুষৰ দেহত উৎপন্ন হয়, সেইবিধ হ’ৰমন নাৰীদেহত উৎপন্ন হ’বলৈ ধৰে। সমগ্ৰ বিশ্বৰ প্ৰায় ১০% নাৰীয়েই এই চিষ্টৰ সমস্যাত আক্ৰান্ত হয় আৰু এই পৰিসংখ্যা লাহে লাহে ক্ৰমবৰ্ধমান। এনে নহয় যে পি চি অ’ ডিত আক্ৰান্ত নাৰী এগৰাকীয়ে গৰ্ভধাৰণ কৰিব নোৱাৰে, তাৰ বিপৰীতে গৰ্ভধাৰণত জটিলতাৰ সৃষ্টি হয়।
লগতে পঢ়ক বিশ্বৰ সৰ্বাধিক বিবাহ কৰা পুৰুষ! ৬৩ বছৰত ৫৩ গৰাকী নাৰীক বিবাহ কৰালে এক পুৰুষে!
এতিয়া আহিছো ডিম্বাশয়ৰ এই বিসংগতিৰ কাৰণৰ বিষয়ে। যদিওবা পি চি অ’ ডি ৰ আঁৰৰ প্ৰকৃত কাৰণৰ বিষয়ে স্পষ্টকৈ জনা নেযায়, তথাপি এনে কিছু কাৰক আছে- যিবোৰক পি চি অ’ ডিৰ সৃষ্টি হোৱাৰ চিকিৎসা-বিজ্ঞানসন্মত কাৰণ বুলি ধৰা হয়। যিবোৰ হ’ৰমনে আচলতে নাৰীদেহ এটিৰ প্ৰজনন বা সন্তান উৎপাদনক্ষম কৰি ৰখাত সহায় কৰে৷ যেনে ইষ্ট্ৰ’জেন, প্ৰজেষ্ট্ৰ’ৰেন আদিবোৰ হ’ৰমনৰ উৎপাদন দেহত হ্ৰাস পাবলৈ ধৰে, যাৰফলত ডিম্বাশয়ে পূৰঠ ডিম্বাণু প্ৰস্তুত কৰিবলৈ সক্ষম নহয়। নাৰীদেহত অত্যধিক মাত্ৰাত অগ্নাশয়ৰ পৰা ইনচুলিন নামৰ হ’ৰমনবিধ নিঃসৰিত হ’লে অত্যধিক মাত্ৰাত পুৰুষ হ’ৰমন (এনড্ৰ’জেনছ) উৎপন্ন হ’লে, নিম্ন মাত্ৰাত দেহত হৈ থকা প্ৰদাহৰ বাবে অনিয়মিত জীৱনশৈলী, প্ৰদূষণো পি চি অ’ ডিৰ কাৰণ হ’ব পাৰে। এই সমস্যাৰ কিছুমান লক্ষণৰ বিষয়ে তলত দিয়া হৈছে —
১. মাহেকীয়া খেলিমেলি হোৱা বা নিৰ্ধাৰিত সময়তকৈ পলমকৈ হোৱা,
২. মাহেকীয়া নোহোৱাকৈ থকা,
৩. অত্যধিক ৰক্তক্ষৰণ হোৱা,
৪. মুখ, পিঠি, পেট আৰু বুকুকে আদি কৰি, শৰীৰৰ বিভিন্ন অংশত অত্যধিক নোম গজা,
৫. মুখ, বুকু, স্তনৰ তলৰ অংশ, কটিবন্ধত ব্ৰণ ওলোৱা,
৬. ওজন বৃদ্ধি পোৱা,
৭. মূৰৰ চুলি পাতল হৈ সৰিবলৈ ধৰা,
৮. ডিঙি, স্তনৰ তলৰ অংশ আৰু কটিবন্ধৰ ছাল ক’লা পৰা ইত্যাদি।
লগতে পঢ়ক বাছ ষ্টেণ্ডৰ বেঞ্চত একেলগে বহে যুৱক-যুৱতীয়ে! স্থানীয় লোকৰ আপত্তি তিনিটা ভাগত বিভক্ত কৰিলে বেঞ্চ!
উপৰোক্ত লক্ষণসমূহ আপোনাৰ দেহত দেখা দিলে অনতিপলমে এগৰাকী স্ত্ৰীৰোগ বিশেষজ্ঞৰ কাষ চাপক। প্ৰয়োজনীয় দিশবোৰ চালি-জাৰি চোৱাৰ পিছত তেওঁ আপোনাক যাৱতীয় পৰীক্ষা আদি কৰিবলৈ পৰামৰ্শ দিব। সাধাৰণতে তেজৰ পৰীক্ষা আৰু আলট্ৰাচ’ন’গ্ৰাফীৰ যোগেদিয়েই পি চি অ’ ডি ধৰা পেলাব পাৰি।
এতিয়া আহিছো আন এক দিশলৈ। এই পি চি অ’ ডি হোৱাৰ ফলত আক্ৰান্ত নাৰীগৰাকীৰ দেহ আৰু মনত দেখা দিব পৰা আন আন কিছু আনুষাংগিক ৰোগগ্ৰস্ততাই দেখা দিয়ে। এনে কেইবিধমান ৰোগ হৈছে—
১. প্ৰস্ৰাৱদ্বাৰেৰে হোৱা অস্বাভাৱিক ৰক্তস্ৰাৱ,
২. সন্তানহীনতা,
৩. টাইপ-২ ডায়েবেটিছ বা মধুমেহ ৰোগ,
৪. অসময়ত হোৱা প্ৰসৱ বেদনা আৰু ফলত অপৈণতৰূপে বা পূৰ্ণাঙ্গ ৰূপ পোৱাৰ পূৰ্বেই জন্ম হোৱা শিশু,
৫. উচ্চ ৰক্তচাপ, হৃদৰোগ আৰু ষ্ট্ৰ’ক আদিৰ সম্ভাৱনা বৃদ্ধি পোৱা,
৬. ডিপ্ৰেছন, এংজাইতী (মানসিক),
৭. শ্লীপ এপিনা (টোপনিৰ মাজতে হঠাতে উশাহ লোৱা বন্ধ হৈ পুনৰ নিজে আৰম্ভ হোৱাৰ বিসংগতি) ইত্যাদি।
পি চি অ’ ডি ক আচলতে এক ৰোগ বুলি ক’ব নোৱাৰি, দেহৰ বিভিন্ন ৰোগ বা সমস্যাৰ ফলত সৃষ্ট এক জটিলতাহে বুলিব লাগিব। পি চি অ’ ডি হৈছে বুলি ধৰা পৰাৰ পিছত চিকিৎসকে যাৱতীয় দৰৱ আদি প্ৰদানৰ লগতেই দেহৰ অপ্ৰয়োজনীয় ওজন হ্ৰাস কৰাৰ পৰামৰ্শও দিব। শাৰীৰিক পৰিশ্ৰম, আসন, খোজ কঢ়া, পৰিমিত আৰু সুষম আহাৰ খোৱা আদিৰ মাধ্যমেৰে দেহৰ এক সন্তুলিত মাত্ৰাত ৰখা ওজনে পি চি অ’ ডি ৰ লগতেই আনুষংগিক সমস্যাসমূহকো নিলগাই ৰাখিব পাৰে। গতিকেই এই সমস্যাক লৈ চিন্তিত হোৱাৰ কাৰণ নাই। নিৰ্দ্দিষ্ট বিভাগৰ চিকিৎসকৰ পৰামৰ্শ ল’লেই হ’ল।
লেখকঃ- প্ৰসূতি আৰু স্ত্ৰীৰোগ বিশেষজ্ঞ, এণ্ড’-লেপাৰ’স্ক’পিক ছাৰ্জন আৰু সন্তানহীনতা বা বন্ধ্যাত্ব বিশেষজ্ঞ।
(এম বি বি এছ, এম এছ (প্ৰসূতি আৰু স্ত্ৰীৰোগ), ন্যূনতম সুবিধাৰে কৰা অস্ত্ৰোপচাৰ বিষয়ক ফেল’শ্বিপ (এফ এম এছ,চেন্নাই), উৎপাদনক্ষম দৰৱ বিষয়ক ফেল’শ্বিপ (এফ আৰ এম, চেন্নাই)-গুৱাহাটী মেট্ৰ’ হস্পিটেল, ফোন- ৮১৩৫০০২১৫১
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
