এগৰাকীৰ উদীয়মান কবি তথা শিক্ষকৰ বিৰুদ্ধে ভয়ংকৰ অভিযোগ উত্থাপন হৈছে৷ অৰূপ কুমাৰ দাস নামৰ তৰুণ কবিগৰাকীয়ে পত্নীক হত্যা কৰি এই সমগ্ৰ ঘটনাটোক আত্মহত্যাৰ ৰূপ দিয়াৰ গুৰুতৰ অভিযোগ উত্থাপন হৈছে৷
অভিযোগ অনুসৰি পৰকীয়া প্ৰেমৰ বাবেই স্বামী অৰূপ কুমাৰ দাসে কিছুদিনৰ পৰা পত্নীৰ ওপৰত মানসিক আৰু শাৰীৰিক অত্যাচাৰ চলাই আহিছিল৷
উল্লেখ্য যে বাক্সা জিলাৰ বাবাপাটাৰ দক্ষিণ গণকগাড়ী গাঁৱৰ অৰূপ কুমাৰ দাসে পল্লৱী দাসৰ সৈতে প্ৰেমৰ সম্পৰ্কত অহাৰ পাছতে ২০১৯ বৰ্ষত সামাজিকভাৱে বিবাহপাশত আৱদ্ধ হৈছিল৷ তেওঁলোকৰ প্ৰায় তিনিবছৰীয়া বৈবাহিক জীৱন সুখেৰে চলি আছিল৷ আজিৰ পৰা সাত মাহৰ পূৰ্বে পত্নী পল্লৱীয়ে এটি পুত্ৰ সন্তানো জন্ম দিয়ে৷
লগতে পঢ়ক মহিলাৰ ডিম্বাশয়ত সৃষ্টি হোৱা চিষ্ট বা PCOD কি? এই বিষয়ে জানো আহক…
অভিযোগ অনুসৰি তেতিয়ালৈকে তেওঁলোকৰ বৈবাহিক জীৱন সুখেৰে চলি আছিল যদিও কবি স্বামীৰ পৰকীয়া প্ৰেমে তেওঁলোকৰ সংসাৰত জুই লগোৱাৰ অভিযোগ উত্থাপন হৈছে৷ পত্নী পল্লৱীয়ে স্বামী অৰূপ কুমাৰ দাসৰ অবৈধ প্ৰেমৰ সম্পৰ্কে জানিব পাৰি সেই বিষয়ে স্বামী আৰু স্বামীৰ পৰিয়ালক জনোৱাৰ পাছৰে পৰা স্বামী অৰূপে পল্লৱীক মানসিক আৰু শাৰীৰিক অত্যাচাৰ চলাবলৈ আৰম্ভ কৰে বুলি অভিযোগ উঠিছে৷
এই অত্যাচাৰৰ সীমা অতিক্ৰম কৰি যোৱা ১৩ ছেপ্টেম্বৰত স্বামী অৰূপ কুমাৰ দাসে পত্নী পল্লৱীক হত্যা কৰি আত্মহত্যাৰ ৰূপ দিয়াৰ ভয়ংকৰ অভিযোগ উত্থাপন হৈছে৷ পল্লৱীৰ ভাতৃয়ে সামাজিক মাধ্যমত অভিযোগ কৰা মতে যোৱা ১৩ ছেপ্টেম্বৰৰ পুৱা প্ৰায় ৩.৩০ বজাত স্বামী অৰূপ কুমাৰ দাসে পল্লৱীৰ ভাতৃক ফোন কৰি জনাই যে পল্লৱীয়ে আত্মহত্যা কৰে৷
ইফালে মৃত পল্লৱীৰ শৰীৰত আঘাতৰ চিহ্ণ স্পষ্ট হৈ থকা দেখা গৈছে৷ ডিঙিৰ লগতে পল্লৱীৰ বাওঁ গালত আঘাতৰ চিহ্ণ স্পষ্ট হোৱাৰ লগতে উক্ত স্থানৰ পৰা তেজো নিগৰি অহা স্পষ্ট হৈ আছে৷ আনহাতে মজিয়াতো তেজৰ চেকুৰা স্পষ্ট হৈ থকাৰ অভিযোগ কৰি পল্লৱীৰ পৰিয়ালে চিপলৈ আত্মহত্যা কৰা পল্লৱীৰ শৰীৰত আঘাতৰ চিহ্ন আৰু মজিয়াত তেজৰ চেকুৰা ক’ৰ পৰা আহিল বুলিও প্ৰশ্ন কৰিছে৷ ভাতৃয়ে লগতে দাবী কৰিছে যে মৃত পল্লৱীৰ চকুত চকুপানীও ওলাই থকাও স্পষ্ট হৈ আছিল৷
আনহাতে, পল্লৱীয়ে স্বামী অৰূপৰ অবৈধ প্ৰেমৰ সম্পৰ্কে স্বামীক প্ৰশ্ন কৰা আৰু স্বামী পৰিয়ালক জনোৱাৰ পাছতে স্বামীয়ে শাৰীৰিক আৰু মানসিক অত্যাচাৰ চলাই অহাৰ কথা নিজৰ বান্ধৱীক হোৱাটছএপৰ যোগে অৱগত কৰা বুলিও জানিব পৰা গৈছে৷
যোৱা ফেব্ৰুৱাৰিত এটা পুত্ৰ সন্তানৰ জন্ম দিয়া পল্লৱীয়ে সাতমহীয়া সন্তানক এৰি কোনো কাৰণতে আত্মহত্যা কৰিব নোৱাৰে বুলি দাবী কৰি পল্লৱীৰ পৰিয়ালে ঘটনাৰ সন্দৰ্ভত লাভদাংগুৰি আৰক্ষী চকীত এজাহাৰ দাখিল কৰিছে যদিও আৰক্ষীয়েও কোনো পদক্ষেপ নোলোৱাৰ অভিযোগ উত্থাপন কৰিছে৷ পল্লৱীৰ পৰিয়ালে আৰক্ষীক ঘটনাটো সঠিক তদন্ত কৰি দোষীক কঠোৰ শাস্তি দিবলৈ দাবী জনাইছে৷
উল্লেখ্য যে অৰূপ কুমাৰ দাস এগৰাকী শিক্ষক হোৱাৰ লগতে তৰুণ প্ৰজন্মৰ এজন পৰিচিত কবি৷ ইতিমধ্যে কবি অৰূপ কুমাৰ দাসৰ ‘গছে যি কথা পাতকো নক’লে’ শীৰ্ষক এখন কাব্যগন্থও প্ৰকাশ পাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
