অসম লাইভ২৪ঃ ফুটবল সম্ৰাটৰ প্ৰস্থান। অতীত হ’ল ফুটবলৰ এটা যুগৰ। ৮২ বছৰ বয়সত শেষ নিশ্বাস ত্যাগ কৰে ফুটবল সম্ৰাট পেলে। দীৰ্ঘদিন ধৰি কলনৰ কৰ্কটত আক্ৰান্ত হৈ আছিল ফুটবল সম্ৰাটগৰাকী। ২০২২ ৰ বিশ্বকাপ ফুটবল চলি থকাৰ সময়তে চিকিৎসালয়ত ভৰ্তী কৰা হৈছিল পেলেক। হাস্পতালৰ পৰাই পেলে শাৰিৰীক যন্ত্ৰণাকো আওকান কৰি ব্ৰাজিলৰ সমৰ্থনত এটাৰ পাছত আনটো পোষ্ট কৰিছিল পেলে। শুভেচ্ছা জনাইছিল ব্ৰাজিলৰ তাৰকা খেলুৱৈ নেইমাৰকো। কিন্তু চিকিৎসকৰ সকলো প্ৰচেষ্টা বিফল হ’ল। বৃহস্পতিবাৰে পৃথিৱীৰ পৰা বিদায় মাগিলে ফুটবল সম্ৰাট পেলে। ফুটবলাৰগৰাকীৰ কন্যাই ইনষ্টাগ্ৰামযোগে পোষ্ট কৰি পিতৃৰ মৃত্যুৰ খবৰ দিছে বিশ্ববাসীক।
ইয়াৰ পূৰ্বেও সামাজিক মাধ্যমত একাধিকবাৰ পেলেৰ মৃত্যুৰ গুজব ওলাইছিল। এইবাৰো মৃত্যুৰ খবৰ ভাইৰেল হৈ পৰাৰ পাছত একাংশই এয়া ভুৱা খবৰ বুলিয়েই বাৰে বাৰে খবৰটোৰ সত্যাসত্য প্ৰমাণ কৰাৰ চেষ্টাও চলাইছিল। অৱশ্যে পেলেৰ কন্যা কেলি নাছিমেণ্টোৰ ইনষ্টাগ্ৰাম পোষ্টে সকলোৰে ভুল ভাঙে। সম্ৰাটহীন হ’ল ফুটবল বিশ্ব। বিগত কিছুদিন ধৰি পেলেৰ শাৰীৰিক অৱস্থাৰ অৱনতি ঘটিছিল। কৰ্কটৰ কোষে খুলি খুলি খাইছিল পেলেৰ শৰীৰ। উদ্বেগেৰে দিন কটাইছিল বিশ্ব ফুটবলপ্ৰেমীয়ে। কৰ্কটৰ বিৰুদ্ধে শেষ পৰ্যন্ত হাৰ মানিলে ফুটবল সম্ৰাটেও। কিছুদিন পূৰ্বে পেলেৰ কন্যা নাছিমেণ্টোয়ে এটা ভিডিঅ’ শ্বেয়াৰ কৰি পেলেৰ শৰীৰৰ হতাশাজনক দিনবোৰৰ কথা শ্বেয়াৰ কৰিছিল। ছবি আঁকি কেলিয়ে দেখুওৱাইছিল সকলো। ফুটবল সম্ৰাটগৰাকীয়ে শেষ সময়তো জীৱনৰ ক্ষণবোৰ উপভোগ কৰিব বিচাৰিছিল। কৈছিল পিতৃ আৰু বেছি দিন এই পৃথিৱীৰ অতিথি নহয়। সেয়াই হ’ল, বৃহস্পতিবাৰে বিদায় মাগিলে পেলেই।
৩ খনকৈ বিশ্বকাপৰ নায়ক আছিল পেলে
১৯৪০ চনৰ ২৩ অক্টোবৰত ব্ৰাজিলৰ এক অতি দৰিদ্ৰ পৰিয়ালত জন্মগ্ৰহণ কৰিছিল পেলে। পিতৃয়ে নাম দিছিল এডছন অৰান্তেছ দ্যা নাছিমেণ্টো। ১৯৫৮ চনত ব্ৰাজিলৰ হৈ প্ৰথম বিশ্বকাপ খেলিছিল পেলে। তেতিয়া পেলে নাবালক। ইমান কমবয়সতে এখন দেশৰ হৈ বিশ্বকাপ খেল প্ৰথমগৰাকী খেলুৱৈয়ে হৈছে পেলে। মুঠ চাৰিবাৰকৈ বিশ্বকাপত অংশগ্ৰহণ কৰিছিল পেলেই। চাৰিবাৰৰ খেলত তিনিবাৰেই পেলে নেতৃত্বাধীন ব্ৰাজিল হৈছিল বিশ্বচেম্পিয়ন। বিশ্বৰ কোনো তাৰকা খেলুৱৈয়ে আজিলৈকে তিনিবাৰকৈ বিশ্বকাপ জয় কৰাৰ নজিৰ নাই।
ৰাজপুত্ৰৰ পাছতেই সম্ৰাটহীন হ’ল ফুটবল বিশ্ব
ফিফা মেগাজিনৰ জুৰি বৰ্ডৰ বিচাৰত পেলেই বিংশ শতাদ্বীৰ শ্ৰেষ্ঠ ফুটবলাৰ। এই বিষয়টোক লৈ যদিও বিতৰ্ক অব্যাহত আছে তথাপিও বৰ্তমানলৈকে সাধাৰণ ফুটবলপ্ৰেমীয়ে কিন্তু পেলেকেই ফুটবল সম্ৰাট বুলি মানি আহিছে। ফুটবলৰ ৰাজপুত্ৰ মাৰাডোনাই ২০২০ চনত বিদায় মাগিছিল পৃথিৱীৰ পৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
