সলনি হ’ব নেকি দল! টি-২০ বিশ্বকাপৰ দল ঘোষণাৰ পাছতে ৰোহিত শৰ্মাৰ বিস্ফোৰক মন্তব্য- ‘ৱেষ্ট ইণ্ডিজতহে সদৰি কৰিম সকলো’
টি-২০ বিশ্বকাপৰ বাবে ভাৰতীয় দলৰ ঘোষণাৰ লগে লগে বহু প্ৰশ্নৰ উন্মেষ ঘটিছিল। কিয় সুদক্ষ খেলুৱৈ ৰিংকু সিঙক নিৰ্বাচিত নহ’ল… চাৰিজন স্পিনাৰ কিয় নিৰ্বাচিত হ’ল… হাৰ্দিক পাণ্ডিয়াক কিয় সহ অধিনায়ক হিচাপে নিযুক্তি দিয়া হ’ল…
টিম ইণ্ডিয়াৰ ঘোষণাৰ বাবে ৪৮ ঘণ্টা অপেক্ষা কৰাৰ পিছত এই প্ৰশ্নবোৰৰ উত্তৰ পোৱা গৈছে। ভাৰতীয় অধিনায়ক ৰোহিত শৰ্মা আৰু মুখ্য নিৰ্বাচক অজিত আগৰকাৰে সংবাদমেলৰ আয়োজন কৰি এই সকলোবোৰ প্ৰশ্নৰ উত্তৰ দিয়ে। লগতে ৰোহিত শৰ্মাই কয়- ‘ৱেষ্ট ইণ্ডিজতহে সদৰি কৰিম বাকি সকলো’।
বিচিচিআইয়ে মঙলবাৰে টি-২০ বিশ্বকাপৰ বাবে ভাৰতীয় দলৰ নাম ঘোষণা কৰিছিল। ইয়াৰ প্ৰায় ৪৮ ঘণ্টাৰ পাছত বৃহস্পতিবাৰে ভাৰতীয় ক্ৰিকেট দলটোৰ অধিনায়ক ৰোহিত শৰ্মা আৰু মুখ্য নিৰ্বাচক অজিত আগৰকাৰে দলটোৰ সৈতে জড়িত প্ৰশ্নৰ উত্তৰ দিয়ে।
উল্লেখ্য যে, ১ জুনৰ পৰা ৱেষ্ট ইণ্ডিজ আৰু আমেৰিকাত অনুষ্ঠিত হ’ব টি-২০ বিশ্বকাপ। ৫ জুনত অনুষ্ঠিত হ’ব ভাৰতৰ প্ৰথমখন খেল।
আজিৰ সংবাদমেলখনত সদৰি কৰা অনুসৰি- কে এল ৰাহুলক দলত নিৰ্বাচিত নোহোৱাৰ প্ৰশ্নত মুখ্য নিৰ্বাচক অজিত আগৰকাৰে কয় যে কে এল এজন উৎকৃষ্ট খেলুৱৈ। দলৰ হৈ তেওঁৰ প্ৰদৰ্শন অতি উত্তম। কিন্তু আই পি এলত তেওঁ বেছি বেটিং কৰে, আনহাতে টিম ইণ্ডিয়াক মিডল অৰ্ডাৰত খেলা এজন ৰক্ষক বেটছমেনৰ প্ৰয়োজন আছিল। ঋষভ পণ্টে ৪-৫ নম্বৰত খেলে। সঞ্জু চেমছনো তেনে এজন বেটছমেন, যিয়ে প্ৰয়োজন অনুসৰি আৰম্ভণি নাইবা মাজত খেলিব পাৰে। সেইবাবেই কে এল ৰাহুলৰ সলনি ঋষভ পন্ত আৰু সঞ্জু চেমছনক অগ্ৰাধিকাৰ দিয়া হৈছিল।
আনহাতে টিম ইণ্ডিয়াত ৪ স্পিনাৰ সন্দৰ্ভত ৰোহিত শৰ্মাই কয়, ‘মই এতিয়াই সকলো ক’ব নোৱাৰো। মই বেছি নকওঁ কাৰণ বিপক্ষৰ অধিনায়কেও শুনি আছে। কিন্তু এইটো নিশ্চিত যে আমি দলত ৪ জন স্পিনাৰ বিচাৰিছিলো। ৱেষ্ট ইণ্ডিজ বা আমেৰিকাত অনুষ্ঠিত হ’ব লগা খেল দিনৰ ভাগত হ’ব। ইয়াৰ ফলত স্পিনাৰৰ ভূমিকা বৃদ্ধি পাব। ইয়াৰ পিছত ৰোহিতে কয়, ‘যেতিয়া মই ৱেষ্ট ইণ্ডিজত প্ৰথম সংবাদমেল অনুষ্ঠিত কৰিম, তেতিয়া মই প্ৰকাশ কৰিম যে কিয় ৪ জন স্পিনাৰ নিৰ্বাচিত কৰা হৈছে।’ লগতে তেওঁ কয় যে টিম ইণ্ডিয়াত পাণ্ডিয়াকে ধৰি ৪ জন বেষ্ট বলাৰ আছে। সেয়েহে দলটো ভাৰসাম্যপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
