ৰাছিয়াৰ ইউক্ৰেইন আক্ৰমণে তিনিটা দিন অতিক্ৰম কৰিলে৷ ইউক্ৰেইনৰ প্ৰধান চহৰসমূহৰ লগতে সামৰিক ঘাটি, অস্ত্ৰ ভাণ্ডাৰ, বিমান ঘাটি আদিক যুদ্ধবাজ ৰাছিয়াই আক্ৰমণৰ লক্ষ্য কৰি ল’লেও ইউক্ৰেইনৰ সেনাৰ লগতে সাধাৰণ নাগৰিকৰো প্ৰাণ হানি হৈছে৷
ইফালে ইউক্ৰেইনৰ সেনাই আগ্ৰাসী ৰুছ সেনাক প্ৰতিৰোধৰ লগতে প্ৰত্যাক্ৰমণৰ চেষ্টাও কৰিছে৷ যুদ্ধ বিধ্বস্ত দেশখনৰ ৰাষ্ট্ৰপতি ভ’ল’দিমিৰ জেলেনস্কিয়ে ইউক্ৰেইনৰ সৈন্যৰ মনোবল বৃদ্ধি কৰিবলৈ বুলেটপ্ৰুফ জাকেট পৰিধান কৰি সামৰিক শিবিৰবোৰ পৰিভ্ৰমণ কৰিছে৷
ৰাষ্ট্ৰপতি জেলেনস্কিয়ে কোনোপ্ৰধ্যে ৰাছিয়াৰ ওচৰত আত্মসমৰ্পণ নকৰো বুলি ঘোষণা কৰিছে৷ ৰাষ্ট্ৰপতিৰ মনোবল বৃদ্ধিয়ে ইউক্ৰেইনৰ সৈন্য বাহিনীক ৰাছিয়াক প্ৰত্যাক্ৰমণ কৰিবলৈ অধিক সাহসী কৰি তুলিছে৷
ইয়াৰ মাজতে ইউক্ৰেইনৰ সেনাই দাবী কৰিছে যে তেওঁলোকৰ প্ৰত্যাক্ৰমণত ১ হাজাৰো অধিক ৰুছ সৈন্যৰ প্ৰাণ হানি হৈছে৷ শনিবাৰে ইউক্ৰেইন সেনাই দাবী কৰা অনুসৰি ১ হাজাৰো অধিক ৰুছ সেনাৰ মৃত্যু হৈছে৷ কিন্তু ৰুছ সেনাই এই মুহূৰ্তলৈকে এই সম্পৰ্কে কোনো মুখ খোলা নাই৷
ইউক্ৰেইন সেনাই লগতে দাবী কৰিছে যে তেওঁলোকে শত্ৰুপক্ষৰ অতি কমেও ৮০ খন টেংকাৰ, ৫১৬ খন অস্ত্ৰসজ্জিত গাড়ী, ৭ খন হেলিকপ্টাৰ, ১০ খন যুদ্ধ বিমান আৰু ২০ খন ক্ৰুজ ক্ষেপণাস্ত্ৰ ধ্বংস কৰিছে৷
আন্তঃৰাষ্ট্ৰীয় সংবাদ সংস্থাসমূহে প্ৰকাশ কৰা অনুসৰি শনিবাৰে ইউক্ৰেইনৰ ৰাজধানী কীয়েভত তুমুল যুদ্ধ অব্যাহত আছে৷ দেশখনৰ ৰাজধানী চহৰখন বিস্ফোৰণত কঁপি উঠিছে৷ ৰাছিয়ান সৈন্যই তীব্ৰ আক্ৰমণ কৰিলেও এতিয়াও ৰাজধানী চহৰখন দখল কৰিবলৈ সক্ষম হোৱা নাই৷
ইউক্ৰেইনৰ চৰকাৰে ৰাছিয়াৰ সৈন্যক প্ৰতিহত কৰিবলৈ সাধাৰণ নাগৰিকক হাতত অস্ত্ৰ তুলি যুদ্ধ কৰিবলৈও আহ্বান জনাইছে৷
ইফালে এতিয়ালৈকে ইউক্ৰেইনৰ অতি কমেও ২১১ টা সামৰিক ঘাটি সম্পূৰ্ণৰূপে ধ্বংস কৰা বুলি দাবী কৰিছে ৰাছিয়াৰ প্ৰতিৰক্ষা মন্ত্ৰালয়ে৷
ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইনৰ সৈন্যক যুদ্ধ এৰি শান্তি আলোচনাৰ আহ্বান জনাইছে৷ ইউক্ৰেইনৰ ৰাষ্ট্ৰপতিৰ মুখপাত্ৰই প্ৰকাশ কৰিছে যে ৰাছিয়াৰ এই আহ্বানৰ পিছতে আলোচনাৰ বাবে উপযুক্ত স্থান আৰু সময় নিৰ্ধাৰণৰ বাবে কথা বতৰা চলিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
