মানৱেন্দ্ৰ কুমাৰ দাস:- যোৱা এপ্ৰিল মাহত ভাৰতৰ শ্বেয়াৰ বজাৰত প্ৰায় সকলো শ্বেয়াৰৰ দাম নিম্নগামী হৈছে। অৰ্থাৎ প্ৰায়বোৰ কোম্পানীৰ শ্বেয়াৰৰ দাম বহু কমিছে। কিন্তু কিয়?
ইয়াৰ পূৰ্বে আমি উল্লেখ কৰিছোঁ যে, নিৰ্দিষ্ট সময়ত স্বাভাৱিক ভাৱে শ্বেয়াৰৰ দাম নিম্নগামী হয়। আৰু সেইবাবে শ্বেয়াৰ বজাৰৰ প্ৰতি মানুহৰ উৎসুকতাও বেছি। কেইবাটাও স্বাভাৱিক প্ৰক্ৰিয়াৰ বাবে শ্বেয়াৰৰ দাম নিম্নগামী হয়। সেই সমূহৰ অন্যতম কাৰক হৈছে প্ৰ’ফিট বুক অৰ্থাৎ বিনিয়োগ কৰা ধনৰ লাভ আদায় কৰা বা লাভত শ্বেয়াৰ বিক্ৰী কৰা।
এটা উদাহৰণ দিছোঁ। ২০২০ চনৰ ১০ নবেম্বৰত ভাৰত হেভী ইলেক্ট্ৰিকেলচ চমুকৈ ‘ভেল’ৰ এটা শ্বেয়াৰৰ দাম আছিল ২৮/- টকা। ধৰা হ’ল কোনো এজন ট্ৰেডাৰ বা বিনিয়োগকাৰীয়ে ভেলৰ ১০০০ শ্বেয়াৰ ক্ৰয় কৰিলে। ইয়াৰ বাবদ তেওঁ শ্বেয়াৰ বজাৰত বিনিয়োগ কৰা ধনৰ পৰিমান হ’ব ২৮,০০০/- টকা।
অৰ্থাৎ তেওঁ ভেল নামৰ কোম্পানীটোত ২৮,০০০/- টকা বিনিয়োগ কৰিলে। ইয়াৰ পাছত ২০২১ চনৰ ১২ মে’ তাৰিখে ভেল কোম্পানীৰ এটা শ্বেয়াৰৰ দাম ৭৬/- টকালৈ বৃদ্ধি হয়। আৰু সেই সময়ত বিনিয়োগকাৰীয়ে ভেল কোম্পানীৰ ১০০০টা শ্বেয়াৰ বিক্ৰী কৰিলে ৭৬,০০০/- টকা পাব।
ইয়াত বিনিয়োগ কৰা ধনৰ পৰিমান আছিল ২৮,০০০/- টকা। আৰু তেওঁ শ্বেয়াৰ বিক্ৰী কৰি পোৱা ধনৰ পৰিমান ৭৬,০০০/- টকা। ইয়াত লাভৰ পৰিমাণ ৪৮,০০০/- টকা। ২৮,০০০/- টকা বিনিয়োগ কৰি ছয় মাহৰ অন্ত ৪৮,০০০/- টকা লাভ পালে বিনিয়োগকাৰীয়ে শ্বেয়াৰ বিক্ৰী কৰিবই।
শ্বেয়াৰ বজাৰত এই প্ৰক্ৰিয়াটোক প্ৰ’ফিট বুক বুলি কোৱা হয়। সাম্প্ৰতিক সময়ত বিনিয়োগকাৰীয়ে প্ৰ’ফিট বুক কৰা বাবে ভাৰতৰ ইকুইটী মাৰ্কেটত কেতবোৰ কোম্পানীৰ শ্বেয়াৰৰ দাম যথেষ্ট কমিছে। গতিকে এই প্ৰক্ৰিয়াটো শংকাৰ বিষয় নহয়। শ্বেয়াৰ বজাৰৰ ঐতিহাসিক তথ্যৰ পৰা দেখা যায় যে, প্ৰতি বছৰে এপ্ৰিল আৰু নবেম্বৰ/ডিচেম্বৰ মাহত প্ৰ’ফিট বুক কৰাৰ এক প্ৰবনতা সৃষ্টি হয়।
ইয়াতে আন এটা শ্বেয়াৰৰ তথ্য দিব বিচাৰিছোঁ। ২০২০ চনৰ ১২ নবেম্বৰ তাৰিখে বেংক অব বৰোদাৰ এটা শ্বেয়াৰৰ দাম আছিল ৪৫/টকা। আৰু ২০২২ চনৰ ৭ এপ্ৰিলত ইয়াৰ দাম হয় ১১৯/- টকা। অৰ্থাৎ প্ৰায় ডেৰ বছৰত এই শ্বেয়াৰটোৱে বিনিয়োগকাৰীক দুগুণতকৈও অধিক লাভ দিছে।
অৱশ্যে ইয়াকো মনত ৰখা উচিত যে, ২০২০ আৰু ২০২১ বৰ্ষত কৰ’না মহামাৰীৰ বাবে শ্বেয়াৰ বজাৰতো লকডাউনৰ প্ৰভাৱ পৰিছিল। সেই সময়ত দেশত লকডাউনৰ বাবে অন্য ব্যৱসায় স্তব্ধ হৈ পৰিছিল। গতিকে উপাৰ্জনৰ বিকল্প পথ হিচাপে বহু লোকে শ্বেয়াৰ বজাৰত নতুনকৈ ব্যৱসায় আৰম্ভ কৰে।
ক’ভিডকালীন সময়চোৱাত আমাৰ দেশত প্ৰায় ৪২ লক্ষ লোক নতুনকৈ শ্বেয়াৰ বজাৰত জড়িত হয়। তেওঁলোকৰ বেছি ভাগে বিশেষ তথ্য নজনাকৈ বা যধেমধে বহু শ্বেয়াৰ ক্ৰয় কৰিছিল। পৰিণতিত কিছুমান শ্বেয়াৰৰ দাম অতি কম সময়ত অৰ্থাৎ ৪/৫ মাহত চাৰিগুণ পৰ্যন্ত বাঢ়িছিল।
কিন্তু শ্বেয়াৰ বজাৰত তেনে বৃদ্ধি স্বাভাৱিক নহয়। অৱশ্যে অভিজ্ঞ আৰু পাকৈত ট্ৰেডাৰসকলে প্ৰ’ফিট বুক কৰিবলৈ যথেষ্ট সুবিধা লাভ কৰিছিল। আন কিছুমান শ্বেয়াৰৰ ট্ৰেডিং লেভেল নিৰ্দিষ্ট সীমাৰ বহু ওপৰলৈ উঠি যায়। এতিয়া বিনিয়োগকাৰীয়ে তেনে শ্বেয়াৰত প্ৰ’ফিট বুক কৰিছে ।
তাৰ বাবে যোৱা ৭ এপ্ৰিলৰ পৰা এতিয়ালৈকে কিছুমান শ্বেয়াৰৰ নিম্নগামী ধাৰা অব্যাহত আছে। বহু ক্ষেত্ৰত এই নিম্নগামী ধাৰা বিনিয়োগকাৰীৰ বাবে এক সুবৰ্ণ সুযোগ।
এই সুযোগ ল’ব পাৰিলে আগন্তুক ছয় মাহৰ ভিতৰত কিছুমান শ্বেয়াৰৰ পৰা চাৰি পাঁচ গুন পৰ্যন্ত লাভ আৰ্জন কৰাৰ সুবিধা আহিব। কিন্তু কোন কোম্পানীৰ শ্বেয়াৰত বিনিয়োগ কৰিব? এই প্ৰশ্নৰ উত্তৰ পৰবৰ্তী লেখাত উল্লেখ কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
